نصايح ايه اللى تعمليه و ايه اللى تتجنبيه علشان تحصلى على مانيكير مثالى لفرحك

بقلمآية حسان فيأظافر visibility582

وانتى عروسة، بيبقى فى وراكى تفاصيل كتير تهتمى بيها، القاعة و الباند و الفستان و المكياج و الورد و تجهيزات الاكل و دعوات المعازيم و حاجات كتيرة اوى ، لكن من الحاجات اللى لازم تهتمى بيها كمان علشان تعملى لوك عروسة يليق بيكى فى ليلة العمر من غير ولا غلطة هى الأظافر، وعلشان ماتحتاريش كتير فى ايه اللى لازم او مش لازم تعمليه، فى المقال ده بنات حوا هتقولك نصايح ايه اللى تعمليه و ايه اللى تتجنبيه علشان تحصلى على مانيكير مثالى لفرحك. 

نصايح ايه اللى تعمليه و ايه اللى تتجنبيه علشان تحصلى على مانيكير مثالى لفرحك

علشان تقدرى تعملى مانيكير مثالى لفرحك لازم تبدأى تهتمى بايديكى و أظافرك من على الاقل 3 أسابيع لشهر قبل الفرح، كريما ت وسكربات و طبعا مهم تعملى باديكير و تستخدمى الكريم المرطب على ايديكى خصوصا بعد الشاور و قبل النوم، ودلوقتى خلينا نعرف أكتر .. 

ايه اللى المفروض تعمليه : 

1- استخدمى الكريم المرطب بانتظام و اعملى مساج لايديكى كويس و بشكل دورى ” ممكن كل يوم او يوم ويوم” . 

2- ادى لنفسك الفرصة انك تجربى ألوان ودرجات كتيرو تشوفى شكلها على ايدك قبل الفرح بوقت كافى علشان تتأكدى انك خدتى قرار صح و مرتاحاله. 

3- لما ترسي على اللون اللى هتختارى تستخدميه يوم فرحك خلاص، اشترى علبتين او تلاتة منه علشان لو علبة اتكسرت او ضاعت يبقى عندك بديل ليها علشان مش هيبقى فى وقت انك تختارى او تجربى من جديد. 

4- ممكن صحباتك او الـ bride maids  يساعدوكى فى اختيار اللون بأنهم يجربوا الوان مختلفة على اديهم، لانه شكل ألوان المانيكير بيختلف من ايد لايد بسبب اختلاف لون بشرة كل حد فينا عن التانى. 

5- لو الكوافير او الـ makeup artist او لو حتى قررتى تروحى لـ manicurist متخصص، خدى المانيكير اللى اختارتيه واشترتيه معاكى، ماتجاذفيش بأنها هى اللى تختارلك لون او انك تستخدمى لون من عندها. 

ايه اللى لازم تتجنبيه : 

1- ماتعمليش المانيكير و بعدين تستخدمى مرطب عليه بعد ما تخلصى على طول او تستخدمى spray tan ، الترتيب كده غلط، خلصى اى حاجة محتاجة تعمليها فى ايدك من ترطيب او تنعيم او تقشير وبعد كده اعملى المانيكير آخر حاجة. 

2- ماتعمليش كعروسة اى nail art، اولا لانه أصعب مما انتى متخيلة و اللى بتعملهولك لو  مش محترفة لأقصى رجة ممكن النتيجة تطلع غير مرضية بالمرة ! وكمان هيشتت الانتباه بعيد عن دبلتك و خاتم الجواز و الشبكة و اللى المفروض يبقوا هما نقطة التركيز الاساسية فى يوم زى ده. 

3- ماتستعجليش و تقولى هعمل المانيكير بدرى علشان ارتاح منه و ابقى خلصته، صحيح انه فى انواع من المانيكير دلوقتى بتدوم لأسابيع زى الجيل مانيكير، لكن فى الوقت الضيق اللى قبل الفرح بيبقى فى وراكى مشاوير و حاجات كتير عايزة تخلص و ده معناه انه هتستخدمى ايدك أكتر من اى وقت عادى، خلى المانيكير آخر حاجة تتعمل قبل الفرح علشان تضمنى انه يبقى شكله حلو و فريش من غير اى تكسير او تشققات. 

4- ابعدى ايدك بعد ما تعملى مانيكير مثالى لفرحك خلاص عن اى مواد كيميائية او مياة سخنة . 

شوفى معانا كمان إزاي تطولي اظافرك بطرق طبيعية وسريعة؟!