احلى اماكن الخروج في القاهرة

بقلمريهام محمود فيمنوعات visibility18085

القاهرة اكيد مليانة بالاماكن الحلوة اللي ممكن نتفسح وننبسط فيها, والنهاردة من خلال موضوعنا حاولنا نجمع لكم احلى اماكن الخروج في القاهرة اللي ممكن تقضوا فيها وقت حلو مع اصحابكم وعيلتكم.

اماكن الخروج في القاهرة:

طبعا احنا هنحدد اماكن فسحنا على حسب احنا خارجين مع اصحابنا ولا مع العيلة, حابين نروح اماكن مفتوحة, ولا نسهر في مكان, ولا نزور اماكن اثرية او دينية, او نروح نحضر حفلة موسيقية, لان اكيد كل وقت بيمر علينا بنبقى محتاجين حاجة مختلفة من الحاجات دي.

– المولات:

اول حاجة اللي متاحه لكل الناس وتناسب كل الاعمار هي المولات لان متوفر فيها اماكن التمشية, والشوبينج, كافيهات, مطاعم, اماكن للعب الاطفال لو معاكي اطفال هيقدروا يتبسطوا, يعني المولات تعتبر مناسبة للخروجات مع الاصحاب او الخروجات العائلية, وطبعا المولات في مصر كتير جدا ومن اشهرها مول العرب, مول مصر, سيتي ستارز, كايرو فيستيفال, جنينة مول, طيبة مول, السراج مول, وغيرها من المولات الكتير جدا اللي نقدر نزورها.

اماكن الخروج في القاهرة
اماكن الخروج في القاهرة

– اماكن الموسيقى والحفلات:

لو انتي من محبات الحفلات والموسيقى نقدر نرشح لك ساقية الصاوي من الاماكن اللي ممكن تقضي فيها وقت حلو وتحضري فيها حفلات منوعة وفي نفس الوقت بسعر رخيص.

الصفحة الرسمية لساقية الصاوي تقدروا تتابعوا عليها الحفلات

https://www.facebook.com/Sawy.Culturewheel/

اماكن الخروج في القاهرة
اماكن الخروج في القاهرة

كمان من الاماكن المميزة جدا كايرو جاز كلوب وده مكان للي حابين يروحوا مكان مختلف ويجربوا حاجة جديدة لانه بيتقدم فيه موسيقى الجاز, وبتتعمل فيه حفلات تانية منوعة بشكل يومي.

ودي الصفحة الرسمية الخاصة بالمكان تقدروا تتابعها عليها برنامج الحفلات

https://www.facebook.com/cjcagency/

اماكن الخروج في القاهرة
اماكن الخروج في القاهرة

ممكن كمان تتابعوا صفحة كايرو زووم من الصفحات اللي ممكن تعرفك اماكن كتير للسهر اللي تقدري تقضي فيها وقت حلو مع اصحابك.

https://www.facebook.com/CairoZoom/

اماكن الخروج في القاهرة
اماكن الخروج في القاهرة

– شوارع وسط البلد:

شوارع وسط البلد او القاهرة الخديوية من الاماكن اللي ممكن تتمشي فيها بالليل وتستمعي بجمال المكان لانه بيتميز بالشكل المعماري المميز جدا, كمان بعد التجديدات المكان هناك بقى تقريبا شبه شوارع اوروبا ورجع له فخامته وجماله اللي كان موجود ايام الملك فاروق والخديوي اسماعيل.

اماكن الخروج في القاهرة
اماكن الخروج في القاهرة

– اماكن دينية واثريه:

لو حابة بقى تحسي بجو روحاني جميل ونقاء وصفاء نفسي يبقى اكيد متتردديش انك تروحي الحسين, وشارع المعز وتتمشي في القاهرة الفاطمية, واكيد مينفعش تروحي هناك من غير ماتدخلي خان الخليلي وتقعدي على قهوة الفيشاوي وتشربي الشاي بالنعناع.

كمان من الاماكن اللي موجودة حوالين المنطقة دي وتقدري تروحيها هي منطقة الغورية او حي الغورية في منطقة الجمالية والحي ده بيتميز بالنقوش والزخارف الاسلامية الجميلة جدا, والحي بيضم منطقة الخيامية المشهورة جدا ببيع الاقمشة وكتير من العرايس بيروحوا يشتروا مفروشاتهم من هناك لان اسعاره مميزة جدا.

كمان هنلاقي هناك آثار من العصر الفاطمي والايوبي والمملوكي, زي جامع الاقمر, تكية السلحدار, باب زويلة, باب الفتوح, المدرسة الكاملية, ومجموعة السلطان قنصوة الغوري مؤسس شارع الغورية وهو واحد من المباني الاثرية النادرة.

اماكن الخروج في القاهرة
اماكن الخروج في القاهرة

– قلعة صلاح الدين:

قلعة صلاح الدين من اكتر الاماكن المميزة جدا اللي تقدري تتعرفي من خلالها على العصر الايوبي, والعصر الاسلامي, والقلعة بتضم مسجد محمد علي المعروف بجماله المبهر جدا, واكتر من متحف زي متحف العربات, والمتحف العسكري, ومتحف الحديقة, ومن اعلى مكان في القلعة تقدري تشوفي مصر من فوق وتستمتعي بمنظر جميل جدا.

اماكن الخروج في القاهرة
اماكن الخروج في القاهرة

– اماكن مغامرات:

لو عايزة تعيشي تجربة مختلفة وتعملي حاجة مجنونة مع اصحابك يبقى اكيد الاماكن دي هي هتكون اختيارك.

The battle field:

لو انتي من عشاق افلام الاكشن والحروب العصابات يبقى اكيد ده المكان المناسب ليكي, هي عبارة عن لعبة بتتكون من فريقين وبيلعبوا ضد بعض وبيتنافسوا لحد ما فريق منهم يكسب في النهاية, والتجربة فريدة ومميزة جدا ومليانة بالاثارة والمكان معمول فيه مؤثرات واضواء ورملة واسلحة للعب طبعا عشان تعيشك التجربة كانها حقيقية, وسعر التذكرة فيه تقريبا 150 جنية لمدة ساعة.

العنوان: كونكرد بلازا مول, الدور التاني, شارع التسعين, القاهرة الجديدة.

اماكن الخروج في القاهرة
اماكن الخروج في القاهرة

Escapology:

لو بتحبي افلام الرعب واتفرجتي على سلسلة افلام Saw يبقى ده مكانك المناسب, وفكرة اللعبة بتعتمد على اكتر من غرفة بتختاري واحدة منهم تدخلي فيها وتبدأي تحلي الالغاز لحد ما توصلي لمفتاح الغرفة عشان تخرجي منها في خلال ساعة او اقل, واللعبة مافيهاش اي عنف ولا مجهود بدني هي بتعتمد على القدرة العقلية بس في حل الالغاز, ولو عايزة تشويق اكتر ده هتلاقيه في الغرفة رقم 13 في اللعبة, ولو عندك قدرة عقلية عالية جدا يبقى لازم تدخلي مكتب هتلر اللي يعتبر هو الاصعب في اللعبة كلها, سعر تذكرة الدخول تقريبا 450 جنية لكل افراد الفريق المشتركين في اللعبة.

العنوان: 65 شارع البساتين, الحي السابع, الشيخ زايد الجيزة.

اماكن الخروج في القاهرة
اماكن الخروج في القاهرة

The horror house:

لو عايزة تعيشي تجربة مرعبة وتروحي ديزني لاند من غير ما تسافري اكيد بيت الرعب هيكون اختيارك لانه معمول زي بيت الرعب اللي موجود في ديزني لاند, والبيت بيتكون من 8 غرف وكل غرفة فيها مفاجأة مرعبة مستنياكي جوه, وكل ما كان قلبك اقوى هتقدري تقعدي في الغرفة وقت اطول وبننصحك تقعدي وقت ميقلش عن 5 دقايق كحد اقصى حسب قوة تحملك وقوة قلبك, سعر التذكرة تقريبا 100 جنية من 12 الضهر ل 5 المغرب, و 125 جنية من ل 12 بالليل.

العنوان: ميراج مول, الدور التالت, طريق القاهرة السويس الصحراوي, التجمع الاول القاهرة الجديدة.

اماكن الخروج في القاهرة
اماكن الخروج في القاهرة

احلى اماكن الخروج والفسح في القاهرة

أماكن الخروج والفسح فى القاهرة
أماكن الخروج والفسح فى القاهرة