10 حركات يوجا هتساعدك على التخلص من الم الدورة الشهرية

كل البنات بيتعرضوا لالم الدورة الشهرية وبتبقى فترة صعبة جدا على كل بنت وكل واحدة ممكن تكون بتعالج الالم بطريقة مختلفة, وغالبا الاعراض بتختلف حسب العمر لان هرموناتنا هي اللي بتتحكم في الدورة الشهرية, وجسمنا بيمر بتغيرات كتير خلال الفترة دي, بعضهم جسدي زي الانتفاخ, وآلام في البطن واسفل الضهر, وبعض الاعراض بتكون نفسية او عاطفية زي القلق والتوتر والتعب والتهيج.

وعشان نتخلص من الم الدورة الشهرية تحريك الجسم هيكون هو انسب حل, والدراسات اثبتت ان اليوجا ليها تأثير فوري فعال جدا على الالم, وفوايد ايجابية كتير تانية على الجسم كله, ولان التركيز في اليوجا بيكون اكتر على النفس ده بيساعد على تخفيف الالم والاجهاد بشكل فعال جدا, والنهاردة من خلال موضوعنا هنقولك على حركات يوجا لالم الدورة الشهرية ونتيجتها هتفاجئك جدا وهتلاقي ان الالم والتقلصات اختفت.

10 حركات يوجا لالم الدورة الشهرية:

1- الحركة الاولى:

اول حركة بسيطة جدا هتقعدي على الارض وتفردي رجلك الشمال, اتني الرجل التانية وخلي القدم لجوه ضاغطة بشكل بسيط على الفخد من جوه, انزلي براسك اسنديها على ركبتك, والذراعين مفرودين لقدام, واتنفسي ببطء وانتي في الوضع ده واثبتي عليه لمدة 5 دقايق, الحركة دي هتساعدك جدا على تخفيف الالم والتقلصات.

2- الحركة التانية:

الحركة دي بتريح منطقة الفخدين والورك, وبتخفف الالم وبتساعد ان المبايض تقوم بوظايفها بشكل صحيح, اقعدي على الارض, اتأكدي ان العمود الفقري مفرود بشكل مستقيم, وخلي بطن رجلك الاتنين قصاد بعض, وامسكي القدمين بايدك عند منطقة الكاحل, اثبتي على الوضع ده لمدة 5 دقايق وانتي مغمضة عنيكي ومحافظة على التنفس ببطء.

3- الحركة التالتة:

عشان تعملي الحركة دي صح اسندي على ركبك الاتنين على الارض, والركبتين يكونوا تحت منطقة الوركين على طول, والايد قدام شوية عن الكتفين, حركي الركبة اليمين لقدام وخلي القدم قدام الركبة الشمال, دلوقتي بقى تقدري ترجعي رجلك الشمال لورا بحركة بطيئة وتظبطي القعدة كويس, وتاخدي نفس اثناء الحركة, اثبتي كام دقيقة على الوضع ده وبعدين اعملي نفس الحركة للجنب التاني.

4- الحركة الرابعة:

الحركة دي مش بس مفيدة للضهر, لكن كمان مفيدة جدا لزيادة الطول, وتمديد الجزء الامامي من الجسم اثناء الحركة بيساعد على تحفيز وتنشيط الاعضاء التناسلية, نامي على بطنك, اتني ركبك الاتنين, وامسكي منطقة الكاحل بايديكي, اثبتي على الوضع وانتي بتاخدي نفس من 5 – 8 مرات وبعدها نزلي جسمك ببطء.

5- الحركة الخامسة:

الحركة دي تعتبر من اسهل الحركات اللي ممكن تعمليها هتساعدك على تخفيف التوتر وكمان هتعمل تمدد للرقبة والضهر, والتمرين دي فعال جدا بشكل خاص لالم اسفل الضهر, اقعدي على الارض وانتي تانية ركبك, ويكون القدم والصوابع لامسة الارض, وسعي ما بين الركبتين مسافة مريحة بالنسبة لك, انزلي لقدام وخلي الجذع ما بين الفخدين, ومدي الذراعين قدامك, وجبينك على الارض, اثبتي على الوضع ده لمدة 5 دقايق مع التنفس بعمق.

6- الحركة السادسة:

الحركة دي مفيدة جدا لآلام الضهر الخفيفة, والقلق والتشنجات, اسندي ركبك على الارض, وسعي الساقين عن بعض, انحني بجسمك ببطء لورا وامسكي القدمين بايديكي, لو حسيتي انك مش قادرة تعمليه لفترة طويلة او تفضلي على الوضع ده فترة خدي كام نفس بس وارجعي للوضع الاول اعدلي جسمك.

7- الحركة السابعة:

الحركة دي مفيدة جدا للعمود الفقري, وتعتبر مساج خفيف لمنطقة البطن, وبتزود من تدفق الدم في جميع انحاء الجسم, وبتحسن عملية الهضم, نامي على ضهرك على الارض وافردي جسمك بشكل مريح, اتني ركبتك اليمين للناحية التانية وامسكيها عند منطقة الركبة بالايد الشمال وبصي الناحية التنية, ومدي الذراع للجنب على شكل حرف T, اثبتي على الوضع ده لمدة دقايق وحافظي على النفس بعمق من بطنك. 

8- الحركة التامنة:

الحركة دي هايلة جدا لعملية التمثيل الغذائي في الجسم, وتخفيف تقلصات الدورة الشهرية, وعلاج الامساك, وكمان بتخفف من الام اسفل الضهر, اقفي وخلي القدمين اوسع شوية من الوركين, ابدأي انزلي ببطء واتني الركبتين وخدي وضع القرفصاء, بس خلي بالك متخليش الركبتين يبقوا قدام القدمين خليهم بمحاذاة القدمين, هاتي الكوعين قدام منطقة الصدر والكفين لامسين بعض, واتأكدي ان الضهر مستقيم والقدمين مسطحين على الارض, واثبتي على الوضع ده لمدة دقايق مع التنفس بعمق.

9- الحركة التاسعة:

الحركة دي كمان مفيدة جدا لانها بتعمل تمديد للبطن وبالتالي بتخفف من الام الدورة الشهرية, كمان بتقلل من التعب والاجهاد, نامي على بطنك على الارض, ابعدي ما بين الوركين مسافة بسيطة, اسندي بالذراعين جنب منطقة الصدر, ارفعي الصدر لفوق, وحافظي على الكوعين متنين شوية, اسحبي الكتفين لورا ومدي الرقبة لفوق.

10- الحركة العاشرة:

الحركة دي من اسهل الحركات اللي ممكن تعمليها, هتنامي على ضهرك على الارض, وتمدي رجليكي الاتنين لفوق تسنديهم على الحيطة, وتخلي القدمين مواجهين للسقف, وتمدي الذراعين جنبك, وخليكي مسترخية على الوضع ده اي مدة تحبيها لان الحركة بسيطة جدا ومريحة للجسم.

8 اسباب لزيادة الوزن في فترة الدورة الشهرية..وازاي نعالجها ونمنعها