10 ماسكات طبيعية بالطماطم لكل انواع البشرة..لبشرة خالية من اي عيوب

بقلمريهام محمود فيبشرة visibility1932

الطماطم من المكونات اللي موجودة في مطبخنا على طول وبنستخدمها تقريبا بشكل يومي, والنهاردة هنقولكم على فوايدها الجمالية وازاي تستخدموها لحل كتير من مشاكل البشرة من خلال ماسكات طبيعية بالطماطم لكل انواع البشرة المختلفة.

– فوايد الطماطم للبشرة:

1- الطماطم بتحتوي على مضادات الاكسدة وبعض الانزيمات اللي بتساعد على تقليل نشاط انزيم التيروسيناس اللي بيسبب افراز الميلانين المسئول عن تغيير لون الجلد وغمقانه, يعني الطماطم بتحتوي على خصائص لتفتيح البشرة.

2- بتقلل من شيخوخة الجلد, وبتساعد على تحسين الجلد وتجديده ببطء, كمان بتحتوي على الليكوبين كاروتين اللي يعتبر حامي طبيعي من ضرر اشعة الشمس.

3- الطماطم بتزود من انتاج الكولاجين والايلاستين وبالتالي ده بيقلل من التجاعيد والخطوط الدقيقة والبقع الداكنة.

4- بتحتوي على خصائص مضادة للجراثيم, ومضاد للفطريات.

5- بتساعد على تقشير الجلد وازالة الجلد الميت, بتقلل من حجم المسام الواسعة.

6- الطماطم بتساعد على موازنة الرقم الهيدروجيني للجلد وبتحافظ عليه من افراز دهون زيادة وانسداد المسام.

ماسكات طبيعية بالطماطم
ماسكات طبيعية بالطماطم

– ماسكات طبيعية بالطماطم لكل انواع البشرة:

1- ماسك الطماطم لعلاج حب الشباب:

هاتي ثمرة طماطم صغيرة اهرسيها, ضيفي عليها من 3 – 4 نقط من زيت شجرة الشاي, و 1 معلقة صغيرة من زيت الجوجوبا, اخلطي المكونات كلها مع بعض كويس, طبقي الماسك على البشرة والرقبة, سيبيه ينشف لمدة 15 دقيقة وبعدها اغسليه بمية دافية.

زيت شجرة الشاي يعتبر علاج فعال جدا لحب الشباب لانه مطهر للبشرة, زيت الجوجوبا مرطب عميق للبشرة وفي نفس الوقت هيمنع افراز الدهون الزيادة اللي ممكن تسد المسام وتأدي لظهور حب الشباب, الطماطم هتساعد على توهج الجلد وهتخلي بشرتك منورة وصحية.

ماسكات طبيعية بالطماطم
ماسكات طبيعية بالطماطم

2- ماسك الطماطم للبشرة العادية:

هاتي ثمرة طماطم طلعي القلب او اللب بتاعها في طبق, ضيفي عليه 2 معلقة صغيرة من مسحوق خشب الصندل, و ½ معلقة صغيرة كركم, اخلطي المكونات كويس مع بعض, طبقي الماسك على الوش والرقبة, سيبيه لمدة 15 دقيقة وبعدين اغسليه بمية باردة, كرري الماسك 3 مرات في الاسبوع.

خشب الصندل ليه فوايد هايلة جدا للبشرة لانه بيساعد على تقليل اثار الشمس على البشرة, وتفتيح البشرة بشكل طبيعي.

ماسكات طبيعية بالطماطم
ماسكات طبيعية بالطماطم

3- ماسك الطماطم لازالة التان وحروق الشمس:

هاتي ثمرة طماطم متوسطة طلعي القلب بتاعها صفيه خدي منه العصير بس, ضيفي 1 معلقة صغيرة من عصير الطماطم, مع و 1 معلقة صغيرة زبادي او لبن رايب, اخلطيهم كويس مع بعض وطبقي الماسك على الوش والرقبة, امسحي الوش بفوطة مبلولة وبعدين اغسليه بمية باردة.

الماسك ده حرفيا يعتبر افضل ماسك لازالة التان وحتى حروق الشمس السيئة, ومناسب لكل انواع البشرة, لان المكونات اللي فيه كلها بتحتوي على خصائص تبييض البشرة بشكل طبيعي, وعلاج حروق الجلد وشفاءه تماما.

ماسكات طبيعية بالطماطم
ماسكات طبيعية بالطماطم

4- ماسك الطماطم للبشرة الجافة:

ضيفي لب ثمرة طماطم صغيرة مع 1 معلقة صغيرة زيت زيتون, اخلطيهم مع بعض كويس, طبقي الماسك على البشرة, سيبيه 15 دقيقة وبعدين اغسليه بمية دافية, كرري الماسك كل يوم لافضل النتايج.

الطماطم وزيت الزيتون يعتبروا عنصرين ممتازين جدا لترطيب الجلد الجاف بعمق, وهتحافظ على جلدك صحي ومنور وخالي من اي عيوب.

ماسكات طبيعية بالطماطم
ماسكات طبيعية بالطماطم

5- ماسك الطماطم لتقليل حجم المسام:

ضيفي 2 معلقة صغيرة من طين البشرة, مع 2 معلقة صغيرة من لب الطماطم, اخلطيهم كويس مع بعض, طبقي الماسك على البشرة وسيبيه من 10 – 15 دقيقة, وبعدها اغسليه بالمية ورطبي البشرة بكريم مرطب, كرري الماسك مرة واحدة في الاسبوع.

معروف ان الطين ليه فوايد هايلة جدا في ازالة الشوائب وتنضيف المسام بعمق, وتضييق المسام وشدها, والحمض اللي موجود في الطماطم هيساعد على تطهير المسام وتحسين صحة الجلد.

ماسكات طبيعية بالطماطم
ماسكات طبيعية بالطماطم

6- ماسك الطماطم للبشرة الدهنية:

ضيفي 2 معلقة صغيرة من عصير الطماطم, مع 2 معلقة صغيرة من عصير الخيار, وبقطعة قطن خدي من الخليط وادهني الوش والرقبة, سيبيه لمدة 15 دقيقة وبعدين اغسليه بالمية.

الخيار يعتبر مبرد ومنعش للبشرة وبيهدي وبيقلل من تهيج الجلد, ولان البشرة الدهنية معروفة ان دايما المسام بتكون واسعة وبتفرز دهون كتير وبتلمع, عصير الخيار بيحقق التوازن الهيدروجيني للبشرة وبيقلل من افراز الدهون عن طريق ظبط درجة حموضة الجلد, والطماطم من ناحية تانية بتدخل في المسام بعمق وبتنضفها من البكتيريا وبتخلي البشرة صحية وبتحميها من حب الشباب.

ماسكات طبيعية بالطماطم
ماسكات طبيعية بالطماطم

7- ماسك الطماطم لعلاج شوائب وعيوب البشرة:

هاتي ثمرة طماطم متوسطة استخرجي اللب بتاعها, ضيفي عليه 2 معلقة صغيرة عسل نحل, اخلطيهم مع بعض كويس, طبقي الماسك على الوش والرقبة, سيبيه ينشف لمدة 15 دقيقة, وبعدين اغسليه بمية دافية, ونشفي البشرة ورطبيها.

العسل يعتبر مبيض طبيعي للبشرة, وممتاز جدا لعلاج كل عيوب البشرة من البقع والعلامات والندبات, والطماطم هتساعد على توهج الجلد والحفاظ عليه صحي.

ماسكات طبيعية بالطماطم
ماسكات طبيعية بالطماطم

8- ماسك الطماطم لعلاج الرؤوس السودا:

ضيفي لب ثمرة طماطم مع 1 معلقة صغيرة زبادي, ضيفي لهم شوفان مطحون بالتدريج لحد ما توصلي لقوام سميك, طبقي الماسك على البشرة وسيبيه لمدة 10 دقايق, بعد ال 10 دقايق افركي الماسك بالراحة من على البشرة بحركات دائرية, وبعدها اغسلي البشرة بالمية.

الماسك ده بيساعد على التخلص من اي انسداد في المسام والرؤوس السودا, لان الشوفان يعتبر مقشر طبيعي للبشرة ولما بينشف وتفركيه بيسحب كل الرؤوس السودا من البشرة, كرري الماسك مرتين في الاسبوع في البداية, وبعدها مرة واحدة في الاسبوع.

ماسكات طبيعية بالطماطم
ماسكات طبيعية بالطماطم

9- ماسك الطماطم للهالات السودا:

ضيفي 1 معلقة صغيرة من عصير الطماطم مع 1 معلقة صغيرة من جل الالوفيرا, اخلطيهم كويس مع بعض, هاتي قطعتين قطن اغمسيهم في الخليط لمدة دقيقة, وبعدها حطي القطن على عينك لمدة 10 دقايق, وبعدها شيلي القطن وامسحي العين بقطعة قماش او فوطة مبلولة.

الالوفيرا يعتبر علاج ممتاز جدا للهالات السودا, وبيهدي الجلد وبيمنع تكوين الاكياس تحت العين, والطماطم مع خصائص التبييض الطبيعية هتقلل من تصبغ الجلد تحت العين وعلاج الهالات.

ماسكات طبيعية بالطماطم
ماسكات طبيعية بالطماطم

10- ماسك الطماطم للبشرة الملتهبة:

ضيفي 1 معلقة كبيرة جل الالوفيرا مع لب ثمرة طماطم متوسطة, اخلطيهم كويس مع بعض, طبقي الماسك على الوش والرقبة, سيبيه لمدة 15 دقيقة وبعدين اغسليه بالمية.

جل الالوفيرا فعال جدا في تهدئة وعلاج التهاب الجلد, وبيساعد على استرخاء البشرة قبل تطبيق اي منتج عليه, والطماطم اكيد لما بيتضاف معاه بيزود من فايدته على البشرة.

ماسكات طبيعية بالطماطم
ماسكات طبيعية بالطماطم

8 مكونات طبيعية موجودة في مطبخك هتغنيكي عن مستحضرات التجميل

مكونات طبيعية لجمال البشرة