ازاي تكافحي التعب وتحسني حالة بشرتك في الشتا
في الشتا معظمنا تقريبا بيبقى في حالة خمول وكسل, وبنحس بالبرد وان اطرافنا متجمدة من البرد, وده بيحصل لان في الشتا عادة بنتحرك اقل, وكمان ممكن يحصل بسبب نقص الفيتامينات A, C, E, اللي بتخلي الكبد يقوم بوظايفة بشكل سليم ويوصل الدفء للدم, وده كله مش بيأثر بس علينا من الناحية الصحية كمان بيأثر بشكل سلبي على بشرتنا, عشان كده النهاردة من خلال موضوعنا هنقولك على نصايح ازاي تكافحي التعب وتحسني بشرتك في الشتا.
ازاي تكافحي التعب وتحسني بشرتك في الشتا:
– النوم المريح:
اول حاجة عشان نحافظ على صحتنا بشكل عام وعلى بشرتنا اننا نحصل على نوم مريح, وغالبا نقص الاكسجين في فترة الليل بيكون سبب رئيسي ان في كتير من الاشخاص مش بيناموا كويس وبالتالي بيصحوا تاني يوم مرهقين وتعبانين وحاسين بالخمول والكسل, وده لان في كتير بيقعوا في غلطة بيناموا على تدفئة في البيت وبينسوا التهوية وبالتالي بيقل الاكسجين في المكان وبيحصل ارق, عشان كده ضروري ان يكون في شباك مفتوح عشان نخلي الهوا النقي يدخل المكان, هتلاقي نفسك نمتي كويس وهتصحي الصبح نشيطة.
ونصيحة لكل بنات اللي بيعانوا من البشرة الجافة انك ممكن تستخدمي الجهاز المرطب تشغليه طول الليل وانتي نايمة جنب السرير, وهتلاحظي الفرق بعد ايام من استخدامه انه حسن حالة بشرتك جدا.
شوفي من هنا تكنيك مذهل وفعال للتخلص من الارق هيخليكي تنامي في دقيقة واحدة بس.
– نصايح عشان تقومي الصبح بسهولة:
لو نمتي 8 ساعات يوميا هتلاقي نفسك بتصحي لوحدك بعد الوقت ده لانك هتكوني اخدتي كفايتك من النوم, لكن المشكلة ان في كتير من الاشخاص مش بيقدروا يعملوا ده عشان كده هنقولك على نصايح ازاي تقومي الصبح بسهولة حتى لو مش واخدة كفايتك من النوم.
1- اعملي استرتشينج في السرير اول ما تقومي من النوم, يعني مدي اطرافك ايدك ورجلك ورقبتك لورا وقدام, وبعد ما تعملي الاسترتشينج متتسرعيش انك تقومي من السرير وخدي وقتك قبل ما تقومي من السرير.
2- تدليك النقط او الاماكن المتحكمة في الصحيان او اللي ممكن تساعدنا على تنشيط الجسم بسرعة, وفي نقطة مهمة جدا هي اللي ممكن ندلكها عشان تساعدنا على الصحيان بسرعة وهي موجودة ما بين الصوباع الابهام والسبابة, دلكي المنطقة دي عدد مرات ميقلش عن 100 مرة مع التنفس بعمق, هتحسي بطاقة بعد عملية التدليك دي وهتبقي جاهزة انك تخرجي من السرير بكل نشاط.
3- اغسلي وشك بمية بمية دافية وبعدها مية باردة بالتبادل كذا مره ورا بعض, بعدها دلكي وشك بصوابعك تدليك خفيف, الطريقة دي بتحسن من تدفق الدم وبتقلل كمان من التورم الصباحي للوش.
4- فرك الاذنين, الحيلة دي هايلة وفعالة جدا لتنشيط الجسم الصبح, افركي الاول المنطقة اللي ورا الاذن, وبعدين افركي الاذن نفسها وابدأي بالجزء اللي تحت, هتلاقي نفسك جسمك دفي, وكمان الحركة دي بتحسن الدورة الدموية.
شوفي من هنا 20 حيلة هتساعدك تصحي بدري نشيطة.
– تاكلي ايه عشان تحسي بدفا اكتر؟
كتير من البنات وزنهم بيزيد في الشتا لان الجسم بيكون محتاج طاقة عشان يحس بالدفا, عشان كده مهم جدا انك تاكلي اكل صحي, وتعتمدي على نظام غذائي متوازن من الكربوهيدرات والدهون والفيتامينات اللي هتساعدك تفضلي دافية من غير اي زيادة في الوزن.
الدهون مهمة جدا لانها بتوفر الطاقة وبتحافظ على الجسم دافي وبتساعد على هضم الفيتامينات E, A, ممكن تاكلي المنتجات الحيوانية اللي بتحتوي على الدهون زي الزبدة والاسماك واللحوم, الافوكادو والمكسرات وزيت بذور الكتان كمان غنية جدا بالدهون الصحية, واكيد متنسيش الكربوهيدرات في النظام الغذائي, كلي الخضروات الطازة زي الجزر, البنجر, الملفوف, القرع, الخضروات غنية جدا بالالياف هتخليكي تحسي بالشبع لفترة طويلة وبالتالي مش هتاكلي كتير وتكسبي وزن.
وبننصحك انك تستبدلي القهوة الصبح بكوباية شاي اخضر افضل صحيا, لانها هتمدك بالطاقة والفيتامينات ومضادات الاكسدة.
– تحسين حالة الجلد:
بشرتك مع قلة الفيتامينات والجو البرد والارهاق بتتعرض للجفاف والتقشر وبتبقى شكلها شاحب ومش صحي, لان تغيرات الجو بتقلل كمية الدهون في البشرة وبتخليها جافة, عشان كده لازم تهتمي جدا بيها بشكل مكثف بالكريم المرطب وسيروم البشرة في روتين العناية اليومية ببشرتك الصبح وبالليل عشان تحافظي عليها من الجفاف.
وبالنسبة لتنضيف الجلد استخدمي غسول بشرة خفيف بدل الغسول الجل الرغوي, ومتغسليش بالغسول اكتر من مرة واحدة في اليوم خلال فصل الشتا, متستخدميش مستحضرات التجميل القلوية اللي ممكن تسبب جفاف وحكة البشرة وتخلي بشرتك شكلها شاحب وباهت, ومن اهم الفيتامينات اللي محتاجاها البشرة في فصل الشتا هما فيتامين E, A, لانها بتساعد على تسريع عملية تجديد البشرة, وحماية حاجز الدهون في الجلد اللي بيحافظ على رطوبتها, استخدمي الكريمات المرطبة اللي بتحتوي على الفيتامينات دي.
شوفي من هنا افضل انواع مقشر وغسول البشرة بالاسعار.
– العناية بأنواع البشرة المختلفة:
1- كل نوع بشرة بتحتاج عناية مختلفة في فصل الشتا, البشرة الدهنية قاعدة بسيطة جدا ليها وهي استخدمي الكريمات المرطبة لو بتعاني من مشاكل او جفاف في بشرتك, اتجنبي المنتجات اللي فيها كحول, ولو بتستخدمي مستحضرات تجميل طبية اختاري المنتجات اللي بتدعم ترطيب الجلد بشكل طبيعي.
2- البشرة الجافة مهم جدا ترطيبها وتغذيتها خلال فصل الشتا, اختاري المنتجات اللي بتحتوي على حمض اللينوليك لانها هتساعدك على حماية البشرة من عوامل الجو البرد والهوا.
3- البشرة المختلطة بتحتاج عناية خاصة لانها بتجمع ما بين الدهنية والجافة, استخدمي كريم الترطيب المناسب للبشرة الدهنية على منطقة ال T-Zone لانها دي المنطقة اللي بيتراكم فيها الدهون اكتر, وكريم التغذية على منطقة الخدين, وبكده هتغذي بشرتك وتتجنبي انك تزودي فيها الدهون في نفس الوقت.
شوفي من هنا انواع الكريمات المرطبة المناسبة لكل نوع بشرة.
– متنسيش تدخلي في نظامك الغذائي فيتامين B لان عدم وجود الفيتامين ده بيسبب التهاب الجلد وخصوصا في فصل الشتا, وهتلاقي فيتامين B6 موجود في البطاطس والاسماك والكبدة.
– استخدمي المنتجات اللي بترطب البشرة ويكون ليها تأثير مضاد للاكسدة عشان تمنعي شيخوخة الجلد, لان في اي موسم في السنة ضروري انك تحمي بشرتك من الجذور الحرة اللي بتسبب تجاعيد البشرة حتى في فصل الشتا ممكن الشمس تكون مضرة زي الصيف, عشان كده لازم نحمي بشرتنا طول السنة.
– وقاعدة مهمة جدا لكل البنات, حطي الكريم قبل الخروج بفترة متقلش عن ساعة, عشان تدي البشرة فرصة تمتصه كويس, وميتحولش لقناع جليدي على الوش بسبب الجو البرد اول ما تخرجي, واحرصي على النوم الصحي, الاكل الصحي, ودي تقريبا كل الحاجات اللي محتاجاها عشان تحافظي على بشرتك صحية وجميلة.
شوفي من هنا ازاي اعرف نوع بشرتي وازاي اهتم بيها.
8 مكونات طبيعية موجودة في مطبخك هتغنيكي عن مستحضرات التجميل
