10 طرق سهلة تزودي بيهم طاقتك من غير كافيين

بقلمريهام محمود فيصحة visibility1910

كتير مننا مش بيعرفوا يبدأوا يومهم من غير فنجان القهوة لان الكافيين اللي فيه بيساعد اننا نفوق وبيدينا طاقة ونشاط وبيخلينا مستعدين لليوم, لكن الحقيقة ان الكافيين مش افضل حاجة نبدأ بيه يومنا, ولحسن الحظ ان في طرق تانية ممكن تساعدنا على زيادة مستوى الطاقة وليها تأثير ايجابي جدا علينا خلال اليوم, وده اللي هنتعرف عليه النهاردة مع بعض من خلال موضوعنا هنقول لكل بنات حوا طرق تزودي بيهم طاقتك من غير كافيين.

طرق تزودي بيهم طاقتك من غير كافيين:

1- خدي شاور بارد:

الشاور البارد الصبح ليه فوايد كتير جدا, يمكن يكون صعب على كتير من الاشخاص انهم ياخدوا شاور بارد اول ما يصحوا, لكن الشاور البارد بيساعد على زيادة طاقة الجسم جدا خلال اليوم كله, ابدأي خدي نفس عميق عشان تزودي كمية الاكسجين وده كمان بيأدي لتحسين حالة القلب, وبيساعد على تدفق الدم في الجسم كله وده بالتالي بيزود طاقة الجسم, ومش لازم تاخدي شاور بارد اوي لكن ممكن تخلي المية ابرد شوية من اللي انتي متعودة عليها, والمية الباردة ليها كمان فوايد جمالية لانها بتساعد على شد الجلد, وبتخلي الشعر قوي وبيلمع وصحي اكتر, بتقلل من التوتر والاجهاد.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

2- استمتعي بالشمس:

الشمس مش مجرد مصدر كويس لفيتامين D, كمان بتساعد على زيادة الطاقة, وبتحسن المزاج وبالتالي ده هيبعدك عم الاكتئاب او الاضطرابات العاطفية اللي بتحصل مع تغيير المواسم اللي بيكون فيها الشمس اقل من الايام التانية, الشمس بتزود من مستوى السيروتونين في الجسم وده بيأدي لتعديل المزاج, وكمان بيساعدك تنامي بشكل افضل, عشان كده حاولي تستفادي من الشمس كل يوم الصبح, وقضي وقت في الشمس ميقلش عن 10 دقايق.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

3- اتجنبي الجانك فود والافراط في الاكل:

الجانك فود او الاكلات السريعة الغير صحية والافراط في الاكل بكميات كبيرة ده ليه اضرار كتير صحية اولها طبعا زيادة الوزن, ارتفاع مستوى السكر والكوليسترول في الدم, تقلب المزاج, انخفاض تقدير الذات, وبطبيعة الحال انخفاض طاقة الجسم, وعشان تتجنبي كل المشاكل دي اعتمدي على الاكل الصحي, وبما اننا بنتكلم عن الصبح وبداية اليوم فوجبة الفطار تعتبر هي المفتاح  لبداية يوم كله طاقة ونشاط, حاولي كل يوم الصبح تفطري باكل صحي يزود طاقتك ونشاطك خلال اليوم ومش بس كده كمان هيساعدك على تحسين صحتك بشكل عام.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

4- خدي قيلولة:

الكافيين ممكن يقلل من اداء الذاكرة بعكس القيلولة اللي بتعزز الذاكرة, والمهارات المعرفية والطاقة, كمان القيلولة ممكن تساعد على رفع المزاج وتخليكي اكتر انتاجية خلال اليوم, كل اللي هتعمليه انك تاخدي قيلولة بعد الغدا, ولكن اتجنبي قيلولة بعد الضهر بسبب الطريقة اللي بيشتغل بيها الجسم لان الفترة دي من اليوم ممكن تدخلي في نوم عميق, ومهم جدا انك تحافظي على القيلولة تكون قصيرة يعني متزدش عن 20 دقيقة.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

5- اتمشي:

تمشية صغيرة بره البيت الصبح ممكن تحولك بسرعة من النوم للصحيان والنشاط, خصوصا لو بتتمشي كمان في الشمس ده هيزود التأثير, عشان كده اول ما تصحي من النوم وتحسي انك لسه نعسانة وعايزة فنجان قهوة, بدل كده البسي وروحي اتمشي ممكن تنزلي تشتري حاجة من مكان قريب منك, او مجرد بس الخروج والتمشية في اي مكان او الدردشة مع شخص ما, وتمشية 10 دقايق بس هتكون كافية جدا عشان تفوقك وتديكي نشاط.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

6- مارسي الرياضة بدري:

لو المشي بالنسبة لك كرياضة مش كافية عشان تغنيكي عن الكافيين ممكن تجربي تمارسي تمارين تانية, لان الدراسات اثبتت ان ممارسة التمارين الرياضية بتساعد جدا على زيادة النشاط وبتدي طاقة للجسم ليوم كامل, كمان بتساعد على تحسين النوم, وبتقلل من الاجهاد, وممكن كمان تساعد الاشخاص اللي بيعانوا من تعب مزمن, والرياضة مش بس بتزود او بترفع الطاقة كمان هتخلي شكلك افضل وهتساعد على تحسين واحترام الذات بشكل اكبر, وتحسين المزاج, عشان كده المرة الجايه وانتي بتفكري في فنجان القهوة استبدليه على طول بممارسة الجري, او تمارين الكارديو هيكون اختيار افضل ليكي ولصحتك.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

7- اسمعي موسيقى:

سماع الموسيقى من الحاجات المفيدة جدا اللي ممكن تعمليها الصبح لانها بتساعد على زيادة الطاقة, بتقلل الشعور بالارهاق اللي ممكن يحصل بسبب الروتين اليومي, وسماع الموسيقى ممكن يساعدك تبقي منتجة اكتر خلال اليوم سواء في الشغل او الدراسة, ولو كمان جمعتي ما بين التمارين الرياضية والموسيقى هيكون افضل, والدراسات كشفت ان ممارسة رياضة ركوب العجل ان الاشخاص بيمشوا اسرع وهما بيسمعوا موسيقى اكتر من غير الموسيقى, عشان كده المرة الجاية وانتي بتتمشي او بتمارسي اي رياضة شغلي موسيقى حماسية حلوة تزود من طاقتك ونشاطك.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

8- ارقصي:

الرقص ليه تأثير على الجسم زي ممارسة الرياضة بالظبط, لانه بيساعد على تحسين الدورة الدموية خلال اليوم كله, وبيحسن المود, فلو انتي مش هتقدري تمارسي رياضة او تعملي تمارين كارديو ابسط حاجة شغلي موسيقى وارقصي, مش بس هيديكي طاقة, كمان هيساعدك على تخسيس الوزن, يعني اول ما تصحي شغلي موسيقى حلوة وارقصي.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

9- اضحكي:

تصدقوا او لا ان الضحك ممكن يأدي لتغيرات جسدية صحية في جسمنا, وممكن تكونوا سمعتوا ان الضحك يعتبر وسيلة هايلة جدا لتقليل الاجهاد وتحسين المزاج, لكن هو كمان بيساعد على زيادة الطاقة, ممكن الصبح تحاولي تقري اي حاجة مضحكة او تتفرجي على فيديو او اي مقطع كوميدي اي حاجة تخليكي تضحكي لمدة دقايق كل يوم الصبح.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

10- جربي المشروبات العشبية المنشطة:

الاعشاب تعتبر وسيلة ممتازة جدا لزيادة الطاقة, ومحاربة الاجهاد, ومن الاعشاب اللي ممكن تشربيها الصبح وتزود طاقتك, الجينسنج, الشاي الاخضر, عشبة القراص, عشبة الماكا, العرقسوس, عشبة اناشد, الجنكة الصينية, الريحان المقدس, عشبة قتاد, عشبة اشواغاندا, عشبة ششيزاندرا “وهنلاقي بعض الانواع دي موجودة عن العطار”, اشربي كوباية من اي نوع اعشاب كبديل للقهوة كل يوم الصبح هتساعد على زيادة طاقة ونشاط جسمك.

طرق تزودي بيهم طاقتك من غير كافيين
طرق تزودي بيهم طاقتك من غير كافيين

20 حيلة هتساعدك تصحي بدري نشيطة

20 حيلة سهلة هتساعدك تصحي بدري نشيطة
20 حيلة سهلة هتساعدك تصحي بدري نشيطة