7 علامات بتثبت انك ناجحة لو كنتى فاكرة عكس كده

كتير من الناس بيقيسوا مدى نجاحهم بكمية الفلوس اللى معاهم، لكن النجاح الحقيقي بيتقاس بقدرتك على انك تبقى على طبيعتك وانك تقدرى تعبرى عن نفسك بحرية لأنه النجاح بيتقاس بطرق كتيرة و مختلفة و معنى النجاح بيختلف من حد للتانى ، و علشان كل واحدة فينا ناجحة بطريقة مختلفة و لأسباب مختلفة فى المقال ده بنات حوا هتقولك 7 علامات بتثبت انك ناجحة لو كنتى فاكرة عكس كده ، اعرفيهم معانا .. 

7 علامات بتثبت انك ناجحة لو كنتى فاكرة عكس كده 

1- ماتخليتيش عن أحلامك : 

لو كنتى ما بتتخليش عن أحلامك وحتى لو  شايفة انه تحقيقها حاجة بعيدة و صعبة، لكن عندك أمل و بتحاولى تتطورى و تحطى خطط و تاخدى خطوات لقدام فى سبيل تحقيقها يبقى انتى انسانة ناجحة و طموحة من جواكى، طول مانتى عندك حلم و بتحاولى توصليله يبقى عندك الدافع اللى يخليكى ناجحة.

2- عايشة بصحتك : 

و دى اهم حاجة فى الدنيا واهم حاجة تقيسي بيها مدى نجاحك و تقدريها لأنها نعمة كبيرة جدا، لانه الحياة مليانة بخيبات الامل و المطبات و المرض ، فلو كنتى عانيتى لفترة من حياتك او تخطيتى فترة صعبة كانت صحتك فيها تعبانة او فترات اكتئاب و قدرتى تعديها ، و  لو كنتى لسه بصحتك  اعرفى انه دى علامات بتثبت انك ناجحة .

3- بتتخطى المشاكل و بتطورى من نفسك : 

أوقات بنحس اننا جبنا آخرنا خلاص من كتر المشاكل وانه الاوضاع مش ممكن تسوء اكتر من كده، 

وانه خلاص مابقاش فى سبب او دافع يخليكى تتعلمى من غلطاتك و تحاولى تبقى شخص افضل، و الواقع انه ده مش صح و مش حقيقي. لانه كل مشكلة بنقع فيها و كل عقبة بتقف قدامنا بتعلمنا حاجة جديدة و بتقوينا أكتر حتى لو احنا مش مدركين ده، فافتكرى معايا كده ، لو نجيتى من مشكلة مالية او من علاقة فاشلة او من أزمة مرض و بتقرى الكلام ده دلوقتى، اعرفى انك قوية و ناجحة. 

4- فى حواليكي ناس بتحبك : 

قوتنا ونجاحنا بنستمدهم دايما من الناس اللى حوالينا و اللى احنا عايشين بيهم، فلو عيلتك واصحابك و معارفك و زمايلك فى الشغل حواليكى و متأكده انه  على الاقل فى حد منهم بيحبك اعرفى انه ده من أهم علامات بتثبت انك ناجحة.

5- بتعرفى تسامحى : 

لو اتعلمتى بعد محاولات انك تسامحى اللى حواليكى و تغفرى للى بيأذوكى، اعرفى انك شخص قوى و اخلاقة رفيعه و عالية، و اتعلمى انه تسامحى بسرعه على قد ما تقدرى و بشكل كامل علشان الغضب و الحقد مايحبسوكيش فى مكان واحد ماتقدريش تخرجى منه، التسامح هو اهم خطوة لتخطى المشاكل و نسيانها و بالتالى هيبقى هو الدافع للنجاح. و كمان عقلك و جسمك بيبقوا فى سلام اكتر لما تسامحى و تنسي. 

6- عندك بيت و هدوم : 

جه الوقت انك تاخدى دقيقة من وقتك و تبصى حواليكى، لو قاعدة في مكان آمن و حاسه انه بيتك موجود حواليكى و عندك هدوم تدفيكى و بتخرجى شكلك حلو و تخليكى واثقة من نفسك و من جمالك قدام الناس يبقى انتى على الاقل ناجحة انك توفرى ده لو نفسك، ولو انتى لسه عايشة مع اهلك و هما اللى بيوفرولك البيت و الهدوم يبقى على الاقل برده انتى نجحتى فى انك تحافظى عليهم. 

7- بتقدرى تكونى على طبيعتك : 

وده أهم من أى حاجة تانية، لانه فى العادى الناس اللى معاهم فلوس او مشهورين ، الشهرة و المستوى ده بيفرض عليهم يظهروا قدام الناس بشكل و نمط معين و ده بيخليهم مايقدروش يبقوا على طبيعتهم، فلو انتى بتقدرى تبقى على طبيعتك فى اى وقت و قدام اى حد ، يبقى اعرفى انك ناجحة فى ده وانك فى نعمة كبيرة. 

شوفى معانا كمان 7 عادات في لغة الجسد بيعملهم الاشخاص الناجحين ..