حاجات بتعمليها ممكن تدمر زوجك وعلاقتك الزوجية تماما

ريهام محمود
ريهام محمود
4650

التعامل مع الزوج ممكن يكون صعب عن البعض وسهل عند بعض الزوجات, وفي زوجات كتير بيقعدوا سنين يحاولوا يعرفوا الطريقة الصح اللي يقدروا يتعاملوا بيها مع الزوج او يقربوا منه ويفهموه اكتر, وده لان كل واحد بيكون ليه شخصيتة المختلفة عن التاني وطريقة مختلفة في التعامل وردود الفعل, عشان كده صعب يكون في نصيحة واحدة ممكن تناسب كل الازواج لان كل حالة بتختلف عن التانية.

ولكن مع ملاحظة المشاكل في العلاقات الزوجية, اتضح ان فيه مشاكل مشتركة بين كتير من العلاقات بيكون سببها بعد العادات السيئة اللي بتعملها الزوجة, اللي ممكن تدمر الزوج والعلاقة الزوجية ببطء من غير ما تحسي, والنهاردة هنقول لكل بنات حوا اكتر عادات ممكن تدمر علاقتك الزوجية, وفي حالة لو كنتي بتعمليها يبقى لازم تبطليها فورا عشان تحافظي على زوجك وعلاقتك الزوجية ناجحة وتستمر.

عادات ممكن تدمر علاقتك الزوجية:

1- مش بتبقي سعيدة مهما قدملك اي حاجة:

كتير من الستات بيلاقوا صعوبة انهم يقبلوا اي حاجة يقدمها الزوج اذا موفرش احتياجاتها المختلفة اللي هي عايزاها, ومش بيقدروا اي حاجة يقدمها الزوج مهما كانت, ودايما بيكونوا متضايقين وفي حالة خناق مع الزوج عشان مجبش الحاجات اللي هي عايزاها, وتفضل تشتكي انه مقصر في حقها.

لو انتي واحدة من الستات دي يبقى انتي كده بتدمري زوجك وعلاقتك الزوجية ببطء, لانك بالطريقة دي بتدمري احساس زوجك بذاته وهيحس انه مالوش قيمة ومش مهم, وده مع الوقت هيأدي لانخفاض ثقته في نفسه وبالتالي ده هيأثر عليه في حياته العملية, لانك عمالة تغذي عقله انه بيفشل دايما في ارضاءك او انه يجيبلك الحاجة اللي انتي عايزاها, وده هيخليه يتغير لشخص منعدم الثقة واحترام الذات.

وعلى الرغم انه حاجة كويسة من وقت للتاني انك تبيني له انتي قلقانة من ايه واحتياجاتك ايه, لكن في نفس الوقت متجبيش اللوم عليه هو لوحده في حاجات انتوا الاتنين مش هتقدروا تتحملوها.

وبدل ما تلوميه او تحسسيه بالعجز, حاولوا انتوا الاتنين مع بعض تعملوا جهد اكبر عشان تقدروا تجيبوا كل الحاجات اللي نفسكم فيها, يعني يبقى جهد جماعي مشترك, ولو انتي دايما بتفكري في فشله ان هو مش قادر يعمل اكتر, فكري انتي كمان في فشلك انك مش قادرة توفري على قد ما تقدري.

عادات ممكن تدمر علاقتك الزوجية 1
عادات ممكن تدمر علاقتك الزوجية 1

2- التركيز باستمرار على السلبيات:

عادة الستات بيحبوا ان الزوج يهتم بالحاجات البسيطة والتفاصيل, ولما يفشل انه يفهم الحاجات دي بتبدأي انتي تحسي بالاحباط, وممكن يكون الاحساس ده طبيعي لكن كمان التركيز المستمر على السلبيات عادة سيئة جدا وممكن تدمر العلاقة الزوجية, يعني مثلا نسي يصلح حاجة في البيت, نسي يدفع فاتورة الكهربا وغيرها من الحاجات البسيطة, في الحالة دي انتي قولي لنفسك مين مش بينسى؟ يعني خدي الموضوع ببساطة اكتر مش نهاية العالم انه نسي يعمل حاجة, وحاولي تفتكري الايجابيات اكتر في اللحظة دي والحاجات اللي هو بيعملها وافتكري اخر حاجة كويسة هو عملها ومش شرط تكون حاجة كبيرة ممكن تكون حاجة بسيطة اوي لكن هتخليكي تحسي انه هو فيه حاجات كويسة بردو حتى لو فيه سلبيات.

كبري عقلك دايما عن الحاجات الصغيرة, ومتعمليش مشاكل على اتفه الاسباب, لان دي بتكون بداية تدمير العلاقة بينكم, وحاولي تركزي على نقط القوة في علاقتكم والحاجات اللي بتجمع بينكم, وافتكري دايما ان الرجالة بيرجعوا دايما للست اللي على طول بتضحك وبشوشة وبيهربوا من الست النكدية.

عادات ممكن تدمر علاقتك الزوجية 2
عادات ممكن تدمر علاقتك الزوجية 2

3- بتخليه في اخر اولوياتك:

واحدة من اكتر الحاجات اللي ممكن تدمر اي علاقة زوجية هو انك تكوني حطاه في اخر اولويات حياتك, وممكن تكوني بتعملي ده متعمدة او لا, ولكن في النهاية لو مش مدياه وقت في حياتك اكيد العلاقة هتفشل.

الست دايما بيكون عندها مهام كتير تعملها من البيت, الاطفال, الشغل, وحتى العيلة والاصدقاء, اكيد الاهتمام بكل ده مهم جدا لكن ده مش معناه انك تخلي الزوج بالنسبة لك هو اخر اولوياتك وانك متهتميش بيه.

لان الشريك سواء الزوج او الزوجة الاتنين محتاجين اهتمام مينفعش يبقى في حد اخر اهتمامات الطرف التاني, ولو اي طرف حط التاني اخر اولوياته وهمشه في حياته ده اكيد مع الوقت هيدمر العلاقة الزوجية.

عادات ممكن تدمر علاقتك الزوجية 3
عادات ممكن تدمر علاقتك الزوجية 3

4- منع العلاقة الحميمية:

من اسهل واسرع الطرق اللي ممكن تخلي العلاقة تفشل وتدمرها هي منع العلاقة الحميمية, لو حصل بين الزوجين خلاف ابسط حاجة بتعملها الزوجة انها تمنع العلاقة الحميمية عن الزوج كعقاب مثلا, لكن على العكس انتي لو ما منعتيهاش وعملتيها ده هيخليه هو يرجع يصالحك ويخليكي مبسوطة وسعيدة بعد الخناق.

والعلاقة الحميمية هي مش اداة لكن وسيلة رائعة جدا للربط بين الزوجين من الناحية العاطفية والروحية, ولازم العلاقة دي تفضل بره اي خلاف دايما.

يعني بعد اي خناقة او سوء تفاهم بينكم متحاوليش تتعاملي ببرود, لانك لما هتتعاملي معاه عادي هو هيحاول يصلح الموقف بسرعة ويخليكي مبسوطة وهيقدرك اكتر ويحبك اكتر وهتعيشي افضل واسعد حياة زوجية.

عادات ممكن تدمر علاقتك الزوجية 4
عادات ممكن تدمر علاقتك الزوجية 4

5- بتلمحي بشكل مش واضح وبتتوقعي يفهمك:

اكيد كل ست بتحب الراجل اللي يفهمها على طول ويفهم تلميحاتها, لكن نحب نقولك ان الرجالة مش بيفهموا الاشارات والتلميحات, لكن بكل بساطة انتي عايزة حاجة تقوليها من غير تلميح وبشكل واضح وصريح, ولو انتي متوقعة انه هيفهم اشاراتك وتلميحاتك وهيعمل اللي انتي عايزاه بالظبط من غير ما تقولي يبقى انتي كده على بداية الطريق لتدمير علاقتك الزوجية, لانك في كل مره هتحسي باحباط وخيبة امل انه مقدرش يفهم تلميحاتك, لكن المفروض انك متحطيش اللوم عليه انه مقدرش يفهم رسالة مش واضحة منك, وبغض النظر على انك كل مره بتحاولي تعلميه او تفهميه انك كنتي بتلمحي وهو مفهمش لانه في الاخر بردو هينسى كل ده ومش هيفهم تلميحاتك بردو, عشان كده لو عايزة تحافظي على العلاقة ابعدي عن طريق التلميحات والاشارات وقولي اللي انتي عايزاه بوضوح.

عادات ممكن تدمر علاقتك الزوجية 5
عادات ممكن تدمر علاقتك الزوجية 5

6- مش بتبذلي اي مجهود:

عدم بذل المجهود ممكن يجي السبب رقم واحد لتدمير العلاقة الزوجية, انك مش بتبذلي اي مجهود في حاجات كتير ممكن يدمر العلاقة الزوجية وده هيحصل ببطء ومع الوقت وهتسألي نفسك ده حصل ازاي والعلاقة ادمرت كده.

وده بيبدأ بحاجات بسيطة جدا من اول المظهر انك مثلا بتلبسي نفس البيجاما كل يوم, مش عايزة تاخدي شاور, والموضوع هيتطول مع الوقت انك هتبطلي تهتمي بشكل وجمالك, ومش بس في المظهر كمان في حاجات بسيطة تانية في حياتكم مثلا مش بتشاركي معاه التليفزيون ولو لمرة واحدة حتى وتشتكي انك مش عايزة تتابعي الحاجة اللي هو متابعها حتى لو هو متحمس ليها جدا, مش بتشاركي معاه يومك بره البيت كان عامل ازاي حتى لو كانت حاجات بسيطة انك مثلا روحتي للسوبر ماركت او زورتي حد من عيلتك او اصحابك.

كل الحاجات دي وغيرها من التفاصيل الصغيرة اللي ممكن تبان بسيطة لكن بتدمر العلاقة الزوجية ببطء ومن غير ما تحسي, عشان كده دايما ابذلي مجهود لشريك حياتك, خلي شكلك دايما حلو عشانه, حاولي دايما تفهمي اهتماماته, ولازم تعرفي ان العلاقة الزوجية زي الطريق باتجاهين رايح جاي كل ما انتي اديتي لشريك حياتك اكتر هيرجع لك اللي انتي بتعمليه اكتر منه.

عادات ممكن تدمر علاقتك الزوجية 6
عادات ممكن تدمر علاقتك الزوجية 6

وعلى قد ما هتفكري قد ايه العادات دي بسيطة وتبان صغيرة, لكن في الواقع هي بتأثر جدا على العلاقة الزوجية وممكن تدمرها ببطء, عشان كده لازم تتأكدي انك مش بتعملي اي عادة من العادات دي في حياتك لانها في النهاية هتدمر زوجك وحياتك الزوجية, ونتمنى في النهاية لكل بنات حوا حياة سعيدة مع شريك حياتك.

7 طرق عبقرية تنهي بيهم اي خلاف فورا

طرق لانهاء اي خلاف فورا
طرق لانهاء اي خلاف فورا

مقالات متعلقه

12 طريقة عملية للتعامل مع الزوج الغاضب

12 طريقة عملية للتعامل مع الزوج الغاضب

5 حاجات بتعملها النساء معظم الرجالة بيشوفوها مش جذابة

5 حاجات بتعملها النساء معظم الرجالة بيشوفوها مش جذابة

11 علامة واضحة تقولك ان زوجك بيتجاهلك

11 علامة واضحة تقولك ان زوجك بيتجاهلك