موضوعات ماينفعش تتكلمى فيهم فى الشغل

بقلمآية حسان فيمنوعات visibility593

الشغل اوقات كتير بيعتبر بيتنا التانى لاننا بنقضى فيه وقت قد اللى بنقضيه فى بيتنا وسط أهلنا وأخواتنا ويمكن أكتر فى بعض الاحيان،  و مع الوقت الناس فى الشغل  و زمايل العمل ممكن   بيقوا اصحابنا و قريبين لينا، بس لازم تخلى بالك دايما انه الشغل مكان له قواعده الى ماينفعش تعديها، وانه الكلام مع زمايل الشغل مهما كانوا قريبين له حدود،علشان كده اعرفى معانا  5 موضوعات ماينفعش تتكلمى فيهم فى الشغل.

5 موضوعات ماينفعش تتكلمى فيهم فى الشغل

1- الدين :

رغم انه الكلام فى الدين بيبقى قى اى وقت واى مكان، ومهما بيكون فى تسامح و تفهم الا انه الدين بيعتبر من الموضوعات الشائكة جدا اللى ماينفعش تتفتح فى الشغل، لانه مش كل الناس قناعتها زى بعضها ولا كلهم من نفس الدين حواليكى، وردود أفعال الناس دايما بتختلف. علشان كده الدين بيعتبر من الموضوعات اللى ممنوع تتكلمى فيها فى الشغل او تدخلى فيها فى مناقشات لانها فى الغالب بتتقلب بخناقات و جدالات انتى فى غنا عنها .

2- السياسة :

زيها زى الدين، مجال للكلام بيشغل بالنا طول الوقت لكنه من اكتر المواضيع الحساسة اللى ممكن تتكلمى فيها و بيسبب الكتير جدا من الخلافات و المشاكل اللى مالهاش لازمة، ورغم انه ممكن تعتبرى الكلام فى السياسة حاجة طبيعية و من حقك تتكلمى بمنتهى الحرية عن آرائك و قناعاتك، الا انها ممكن تأثر عليكى فى شغلك بطريقة سلبية و بشكل غير مباشر، علشان كده بتعتبر السياسة من اهم موضوعات ماينفعش تتكلمى فيهم فى الشغل .

3- مشاكلك فى البيت :

حياتك الشخصية وان كنتى بتتكلمى عنها كتير، لازم يفضل كلامك عنها عام و من غير تفاصيل، خصوصا لو كنتى بتتكلمى عن مشاكلك فى البيت، ماينفعش ابدا تتكلمى عنها مع زمايلك فى الشغل لانها هتأثر عليكى و يخلوا مديرينك يفكروا انها ممكن تأثر على تركيزك فى الشغل، وغير كده هتخليكى تبقى مجال للكلام و الـ goosip ، وكمان ممكن تتسبب فى انك تبقى مادة للاشاعات و النميمة !

4- طموحك فى حياتك العملية :

طموحك للكارير بتاعك و لحياتك العملية منطقى جدا انه يبقى من موضوعات ماينفعش تتكلمى فيهم فى الشغل ، لانه وان كنتى بتعتبرى وظيفتك الحالية مؤقتة او خطوة لوظيفة تانية أفضل بالنسبة لك ، ماينفعش تقولى ده فى الشغل لانه هيخلى زمايلك و المديرين يشكوا فى ولائك للشغل و مدى اخلاصك ليه. فلو كنتى حابة تتقدمى فى شركتك الحالية و عايزة تترقى مثلا الافضل انك تأدى شغلك على أكمل وجه و تخلى عملك هو اللى يتكلم عن مدى كفائتك و يعبر عن طموحك.

5- صحتك :

رغم انه الكلام عن مشاكلك الصحية سواء كانت جسدية او نفسية مش حاجة المفروض تتكسفى او تخجلى منها ابدا، الا انه مشاركتك لتفاصيل عن صحتك بتعتبر من الحاجات الغلط انك تعمليها فى الشغل، فكرى فى الموضوع زيه زى الكلام عن مشاكلك فى البيت او مشاكلك الشخصية، هتخليكى مجال للكلام و كمان هتخلى زمايلك يفكروا ازاى مشاكلك دى ممكن تأثر عليهم و ده مش هيبقى حلو لبيئة الشغل بشكل عام .

اعرفى معانا كمان 5 دروس مهمة تتعلميها من أول وظيفة full time ليكى