ازاي تخلي مكياجك يدوم فترة طويلة في اي مناسبة خاصة

ريهام محمود
ريهام محمود
في
مكياج
3033

عدم ثبات المكياج مشكلة يمكن بتقابل كتير من البنات, وخصوصا في المناسبات الخاصة بنبقى محتاجين اكتر ان المكياج يثبت معانا فترة اطول ويفضل شكله حلو لحد اخر السهرة او المناسبة بتاعتنا, عشان كده النهاردة هنقول لكل بنات حوا ازاي تخلي المكياج يدوم فترة طويلة في مناسباتك الخاصة, واحنا داخلين كمان على سهرات راس السنة واكيد هتحتاجي النصايح بتاعتنا النهاردة.

ازاي تخلي المكياج يدوم فترة طويلة:

1- حضري بشرتك وشفايفك بالتقشير والترطيب:

اول خطوة هي تحضير البشرة والشفايف للمكياج عشان يكون شكلها صحي وناعم والمكياج يطلع احلى عليها, هنبدأ مع خطوة التقشير بمقشر خفيف بحركات دائرية على البشرة, وتقشير الشفايف, عشان نتخلص من الجلد الميت والجاف وقشور البشرة.

تاني حاجة بعد التقشير هي ترطيب البشرة استخدمي كريم مرطب مناسب لبشرتك, لان الجلد الرطب بيساعد على منع المكياج من التكتل, وبيمنع ان يكون فيها اجزاء جافة او مقشرة خصوصا في فصل الشتا.

ازاي تخلي المكياج يدوم فترة طويلة 1
ازاي تخلي المكياج يدوم فترة طويلة 1

شوفي من هنا وصفات طبيعية لتقشير الجلد.

2- استخدمي البرايمر قبل المكياج:

البرايمر هي من الخطوات الاساسية المهمة قبل المكياج لانه بيخلق طبقة ناعمة على البشرة بتسهل وضع باقي المكياج وبتخليه يطلع احلى, لان البرايمر بيقلل من المسام الواسعة, وبيمنع تكتل المكياج في خطوط البشرة, وبيداري اي عيوب في البشرة وبيعمل زي طبقة عازلة بين بشرتك والمكياج, وبيخلي المكياج يدوم معاكي اطول فترة.

 ومننساش مع برايمر البشرة نستخدم برايمر العين عشان نمنع تكتل الايشادو على الجفون.

ازاي تخلي المكياج يدوم فترة طويلة 2
ازاي تخلي المكياج يدوم فترة طويلة 2

شوفي من هنا ازاي تختاري البرايمر المناسب لنوع بشرتك, و طريقة عمل البرايمر في البيت بنفسك.

3- حطي طبقة مكياج كريمي تحت المكياج البودر:

عشان نظهر المكياج اكتر وفي نفس الوقت نديه ثبات اعلى, استخدمي مكياج كريمي او سائل على البشرة الاول وبعدين حطي فيها طبقة مكياج بودر من نفس النوع.

وقاعدة اساسية مهمة جدا ان المكياج السائل يتحط قبل البودر مش العكس, لان لو حطيتي السائل فوق البودر هيتكتل وهيدي لوك Cacky لبشرتك والمكياج هيتشقق, الصح انك بعد ما تستخدمي الكونتور الكريمي, والبلاشر, والهايلايتر سيبيهم لمدة دقايق ينشفوا وبعدين حطي فوقيهم طبقة تانية من المنتجات البودر وده هيساعد على منع تكتل المكياج.

ازاي تخلي المكياج يدوم فترة طويلة 3
ازاي تخلي المكياج يدوم فترة طويلة 3

4- املي شفايفك بقلم تحديد الشفايف:

قلم تحديد الشفايف اكيد مهم عشان يحافظ على الروج من انه يسيح ويطلع بره حدود الشفايف, لكن كمان ليه مهمة تانية انه ممكن تملي شفايفك كلها بقلم التحديد قبل الروج ده اولا هيساعد على انه يدي الروج لون اقوى ويظهره اكتر, وتاني حاجة هيخليه يثبت فترة اطول.

ازاي تخلي المكياج يدوم فترة طويلة 4
ازاي تخلي المكياج يدوم فترة طويلة 4

5- ثبتي المكياج بالبودر:

من الخطوات المهمة جدا كمان اللي بتساعد على تثبيت المكياج هي البودر, بعد ما تخلصي مكياجك كله بالفرشة خدي كمية بسيطة من البودرة الشفافة وركزي اكتر على منطقة التي زون وتحت العين.

ممكن كمان تستخدمي البودرة الشفافة لتثبيت الروج, بعد ما تحطي الروج هاتي منديل حطيه على شفايفك وحطي طبقة بودر بالفرشة.

ازاي تخلي المكياج يدوم فترة طويلة 5
ازاي تخلي المكياج يدوم فترة طويلة 5

6- استخدام تكنيك Jamsu جامسو:

تكنيك جامسو هو تكنيك مكياج كوري بيساعد على ثبات المكياج ومش بس كده كمان بيدي للبشرة لوك مخملي ناعم جدا, والطريقة بسيطة جدا ويمكن تكون غريبة شوية وهي انك بعد ما تحطي المكياج بتاعك كله بتغطي الوش بطبقة بيبي بودر او لوس بودر, وبعدين بتغطسي وشك في مية باردة لمدة من 15 – 20 ثانية, وبعدها بتنشفي البشرة بالفوطة بالراحة بطريقة الطبطبة من غير ما تمسحي عشان بس تمتص المية من البشرة.

ازاي تخلي المكياج يدوم فترة طويلة 6
ازاي تخلي المكياج يدوم فترة طويلة 6

وممكن نشوف تجربة الطريقة بالفيديو قدامنا, وهي في الفيديو حطت البرايمر وكريم الاساس والكونسيلر وبعدين استخدمت التكنيك وكملت باقي المكياج, ورأي صاحبة التجربة بعد ما عملتها انها فعالة جدا في تثبيت المكياج وبتدي البشرة لوك مات, وخصوصا للي بشرتك دهنية الطريقة دي هتكون مفيدة جدا ليهم لانها هتمنع لمعان البشرة.

تجربة الطريقة الفيديو:

7- مثبت المكياج:

لو عايزة تثبيت بطريقة بسيطة يبقى استخدام مثبت مكياج سبراي هو الخطوة المطلوبة, بعد ما تخلصي مكياجك ترشي من بعيد على الوش كله, هيحافظ على ثبات المكياج فترة طويلة.

ازاي تخلي المكياج يدوم فترة طويلة 7
ازاي تخلي المكياج يدوم فترة طويلة 7

شوفي من هنا طريقة عمل مثبت المكياج في البيت.

اتعلمي خطوة بخطوة بالصور والفيديو مكياج يومي للوك رائع

خطوات مكياج يومي
خطوات مكياج يومي

مقالات متعلقه

ازاي تستخدمي بودرة تثبيت المكياج بطريقة صح

ازاي تستخدمي بودرة تثبيت المكياج بطريقة صح

نصايح مكياج هتساعدك على منع الزيوت الزيادة في منطقة التي زون بشكل فعال

نصايح مكياج هتساعدك على منع الزيوت الزيادة في منطقة التي زون بشكل فعال

نصايح مفيدة لطريقة عمل Baking لتثبيت المكياج

نصايح مفيدة لطريقة عمل Baking لتثبيت المكياج