5 دروس مهمة تتعلميها من أول وظيفة full time ليكى

آية حسان
آية حسان
1008

أى حاجة بتبقى فى أولها صعبة، زى اول مرة تركبى عجلة، اول مرة تعملى اكل و اول مرة تسافرى لوحدك، و طبعا أول مرة تشتغلى و تبدأى فى وظيفة. و رغم اننا ممكن نبقى متوقعين ايه اللى ممكن يحصل، لكن انك تدخلى الحياة العملية و تحاولى تبنى كارير لنفسك دى مش حاجة سهلة أبدا .. و علشان دايما الحياة مليانة تحديات و الشغل عمره ما كان  حاجة سهلة، فى المقال ده بنات حوا هتعرفك على 5 دروس مهمة تتعلميها من أول وظيفة full time ليكى، خلينا نعرفهم مع بعض .. 

5 دروس مهمة تتعلميها من أول وظيفة full time ليكى 

1- ماتقلقيش من انها ممكن تكون من وظيفة أحلامك :

الواقع بيقولك حاجة من اتنين، اما انتى مش عارفة ايه هى وظيفة أحلامك أصلا، او انك عارفاها بس مش عارفة توصليلها ازاى او ايه هى الخطوات اللى المفروض تمشيها ، و لما يبقى الموضوع له علاقة بالنجاح و تحقيق الاحلام احنا بنبقى ماعندناش صبر خالص، علشان كده مهم تقدرى الوظيفة اللى انتى فيها دلوقتى و تتخلى شوية عن التوقعات، ولازم تتعملى الصبر وانه ماينفعش تقلقى انه اول وظيفة ليكى مش هى الوظيفة اللى كنتى بتحلمى بيها، وانها مش موفرالك الحياة اللى كنتى بتتخيليها، كلها خطوات لازم نمشيها واى وظيفة بتقومى بيها بتزود من خبراتك و واحدة واحدة هتوصلى لوظيفة أحلامك . اول وظيفة ليكى هتساعدك تختبرى قدراتك و تقدرى تتحملى لحد امتى و هتخليكى تعرفى حاجات كتيرة عن نفسك و تكتشفيها. 

girl looking at phone at work

2- خليكى دايما مبادرة :

من الحاجات اللى لازم تعمليها فى اول وظيفة full time هى انك لازم تبقى دايما مبادرة و فعالة فى مكانك علشان  تبانى و يبان تميزك و اختلافك، حلو انك تعملى شغلك فى ميعاده مثلا، لكن انك تخلصيه قبل ميعاده و بجودة أعلى ده اللى يخليكى تبانى و تتميزى! حتى لو ماكنتيش شغوفة اوى بالوظيفة اللى بتعمليها، لكن لازم تبقى مجتهدة . الـ وظيفة full time لازم تستغليها فى انك تتعلمى مهارات و تكونى علاقات جديدة، علشان اما تطلبى  recommendation letter تبقى مليانة بالمدح و الانجازات اللى تخليكى تفتخرى بنفسك انك اتحملتى و عديتى الفترة دى علشان فى وظيفتك الجيدة تبقى مؤهلة أكتر و منافس قوى. 

workerawardwlm

3- لازم يبقى اهتمامك بنفسك أولوية : 

اكيد لما تبقى بتشتغلى غير لما كنتى طالبة، نمط حياتك بيتغير و هيوحشك انك حرة و كل وقتك ملكك تقدرى تعملى كل اللى انتى عايزاه، تخرجى و تذاكرى فى اى وقت ، ويمكن يوحشك القعدة مع اصحابك وتفوتك شوية خروجات او مناسبات. علشان كده مهم تفهمى التغيير اللى حصل فى حياتك و ماتخليش وظيفتك تبقى شاغلة كل وقتك، وبما انه الوقت المتاح ليكى بطبيعة الحال بقى أقل يبقى لازم تقضيه بذكاء و ترتبي أولوياتك بره الشغل بعناية، ادى الاولوية لعدد ساعات النوم اللى محتاجة تناميها علشان تبقى نشيطة و مرتاحة تانى يوم و بعد كده فكرى محتاجة تعملى ايه ترفهى بيه عن نفسك و تحسي انه ليكى حياة بره الشغل. المهم انه ماتهمليش نفسك أبدا . 

4- ماتخفيش لو ماقدرتيش تمشى على الخطة اللى رسمتيها لنفسك : 

أول وظيفة full time هتتعرضى فيها لحاجات كتيرة و مختلفة هتفرحى و تضايقى، لكن كمان هتخليكى تقدرى تحددى أكتر ايه المكان اللى تحبى تبقى فيه و ايه هى بيئة العمل اللى بتعتبريها مريحة ليكى ، فلو كنتى راسمة لنفسك كارير حابة تمشي فيه و فجأة لقيتى نفسك بتشتغلى فى حاجة تانية خالص مالهاش علاقة بالخطة اللى انتى رسماها لنفسك او ليها علاقة من بعيد ، ماتخفيش و ماتكتئبيش أبدا، لانه كل خطوة بتاخديها و كل وظيفة بتشتغليها بتخليكى تحتكى أكتر بالحياة العملية و بتخليكى تكتسبى خبرات أكتر و بالتالى بتقدرى تحددى بشكل مظبوط ايه اللى نفسك او تقدرى تعمليه و ايه لاء ، الحياة بطبيعتها غير متوقعة واحيانا افضل حاجة تعمليها هى انك تستغلى كل فرصة قدامك. 

8549480_m

5- مش كل اللى هتقابليهم فى الشغل ينفعوا يبقوا اصحابك : 

بما انك اول مرة تحتكى بالحياة العملية، فى حاجة مهمة جدا لازم تحطيها فى بالك و تتعاملى على اساسها ، و هى انه ” مش كل اللى هتقابليهم و هيجمعك بيهم شغل ينفعوا يبقوا أصحابك”. وانه مهما بانوا الناس لطاف و مريحين افتكرى دايما انك ماتعرفيهومش عن قرب ، ماقصدش انه تخوِِنى كل الناس و ماتتعامليش مع حد، بالعكس مهم تكونى اجتماعية و ودودة لكن كونى حذرة فى تعاملاتك و فى الكلام اللى بتقوليه للناس من حواليكى . وكمان افتكرى دايما انه مش بالضرورة كل الناس تتقبلك و تحبك. 

must read tips for a reliable essay writing service

اعرفى معانا كمان نصايح ازاى تفضلى ايجابية لو عندك مشاكل مع زميل فى الشغل

مقالات متعلقه

ضغط الشغل سببلك أرق وقلة النوم، هنقولك تعملي إيه

ضغط الشغل سببلك أرق وقلة النوم، هنقولك تعملي إيه

حاسه يومك كله بيضيع على الشغل؟ اعرفي إزاي تتكلمي مع رئيسك عن الحدود بين الشغل والحياة

حاسه يومك كله بيضيع على الشغل؟ اعرفي إزاي تتكلمي مع رئيسك عن الحدود بين الشغل والحياة

كلمات ما ينفعش تقوليها في الانترفيو.. اعرفيها واتجنبيها

كلمات ما ينفعش تقوليها في الانترفيو.. اعرفيها واتجنبيها