انواع اكل بتساعد على حرق دهون البطن وتخسيس الوزن
عشان تفقدي وزن بسهولة ومن غير ما تدخلي نفسك في حسابات السعرات الحرارية وازاي تقلليها عشان وزنك ميزدش, ومتبقيش تايهة ما بين حيل ونصايح التخسيس, كل اللي انتي محتاجاه انك تعرفي الاكلات الصح اللي تساعدك على فقدان الوزن, وتنظمي نومك عشان تقللي الرغبة الشديدة في الجوع, وتحرقي الدهون, وتقدري ترفعي مستويات الطاقة في جسمك, والنهاردة من خلال موضوعنا هنعرف مع بعض اكلات هتساعدك على حرق دهون البطن وتخسيس الوزن.
والدراسات والابحاث اثبتت ان الساعة الداخلية للاكل والنوم بتتلغبط من الاكل الغلط اللي بنعتمد عليه في نظامنا الغذائي بشكل يومي, وبتكون النتيجة انه بيحصل ارتفاع في هرمونات الجوع اللي بتخلي عندك رغبة شديدة في الاكل, وبالتالي ده بيأدي لتراكم الدهون في الجسم, لكن لو نظمتي نفسك وعملتي جدول لوجباتك ونومك, في الحالة دي هتقدري تحرقي دهون البطن وتتخلصي منها نهائيا ومش هترجع لك تاني.
اهم حاجة تنامي نوم منتظم, وتاكلي الاكلات المناسبة في مواعيدها الصح, عشان تخلي جسمك يحرق بشكل سليم وميبقاش في تراكم دهون وزيادة وزن.
تعالوا نعرف مع بعض اكلات هتساعدك على حرق دهون البطن وتخسيس الوزن بشكل عام, وكمان هتخليكي تنامي بشكل احسن.
حرق دهون البطن وتخسيس الوزن:
1- السمك:
لما يكون نظامك الغذائي اليومي فيه نقص في الاوميجا 3 اللي موجودة بكمية كبيرة في الاسماك, في الحالة دي الغدة الصنوبرية اللي موجودة في الدماغ اللي مهمتها انها تساعد على تنظيم الجهاز العصبي في الجسم, مش بتشتغل بشكل صحيح وده بيأدي لتغييرات في انتاج الميلاتونين اللي هو هرمون النوم, عشان كده هنلاقي ان الاشخاص اللي بيعانوا من نقص اوميجا 3 مش بيعرفوا يناموا كويس, وده بدوره ممكن يأدي لحاجات تانية زي الرغبة في الاكل الغير صحي في اوقات متأخرة بالليل وده اكيد في النهاية هيأدي لتراكم الدهون وزيادة في الوزن.
الاسماك كمان غنية جدا بالبروتين, اللي الابحاث اظهرت انها عندها قدرة انها تحسسك بالشبع لفترة طويلة, وكمان هضم البروتين بيحتاج حرق سعرات حرارية اكتر من هضم الدهون والكربوهيدرات, كمان الاوميجا 3 بتعزز من صحة القلب, وبتقلل خطر الاصابة بالخرف.
2- المكسرات:
المكسرات تعتبر مصدر غني جدا للمغنسيوم اللي ليه دور كبير في تعزيز المزاج, واكل المكسرات بشكل اكبر هيساعد الاشخاص اللي دايما بيعانوا من الارق او قلة النوم خلال فترة الليل, والابحاث اثبتت ان الاشخاص اللي بيدخلوا المغنسيوم بشكل يومي في نظامهم الغذائي بيناموا بشكل افضل, لان قلة النوم الدراسات اثبتت انها بتأدي للافراط في الاكل وزيادة الوزن.
كمان المكسرات بتساعد على تقوية الجهاز المناعي, وبالتالي ده بدوره بيقلل من خطر الاصابة بأمراض القلب والسكر والسرطان ومرض الزهايمر.
3- اللبن:
اثبتت الدراسات ان اللبن ليه تأثير كبير جدا على دهون البطن, وان الاشخاص اللي اللي نظامهم الغذائي فيه اكلات بتحتوي على الكالسيوم بشكل عام بتقل عندهم الدهون بشكل ملحوظ, وتقريبا الاشخاص اللي بيدخلوا في نظامهم الغذائي 100 ملليجرام من الكالسيوم يوميا “ما يعادل ½ كوباية زباي” بتقل عندهم دهون البطن شبر تقريبا.
الكالسيوم كمان بيساعد على النوم, ولو بتعاني كمان من وجع العضلات او التقلصات, ممكن تدخلي المعادن مع الكالسيوم في نظامك الغذائي هتساعدك على استرخاء الاعصاب والالياف العضلية.
4- الكريز:
الكريز يعتبر من المصادر النباتية للميلاتونين اللي زي ما قولنا هو هرمون النوم, كمان الموز من الاكلات اللي بتساعد على رفع هرمون الميلاتونين في الجسم وبالتالي هيساعدك على النوم, ومش بس كده الميلاتونين كمان يعتبر مصدر قوي لمضادات الاكسدة, واللي ممكن تساعد على فقدان الوزن.
5- الفواكة الحمضية:
البرتقان, الجريب فروت, اليوسفي وغيرها من الفواكة الحمضية بتساعد على كبح او منع هرمون هيدروجين هيدروكسيسيتيرويد “اللي هو هرمون التخزين” والهرمون ده هو عبارة عن انزيم جوه خلايا الدهون في البطن اللي بيعيد تنشيط هرمون الاجهاد الكورتيزول عشان يديه اشاره بالتخزين, والفواكه الحمضية بتساعد على ابطاء نمو هرمون التخزين, وبيتم حرق دهون البطن اثناء العملية دي.
6- الشاي الاخضر:
الشاي الاخضر هو من اكتر الحاجات الطبيعية الفعالة اللي بتساعد على حرق الدهون, وده لانه بيحتوي على الفلافونويد اللي بتشجع بشكل طبيعي الخلايا لحرق سعرات حرارية اكتر وبشكل خاص حرق سعرات حرارية اكتر من الدهون, وللوصول لافضل نتايج يتشرب منه كوباية يوميا على الاقل لحرق دهون البطن.
7- القرفة:
القرفة ليها قدرة على استقلاب الدهون وتقليل الشهية, كمان بتساعد على الحفاظ على مستويات السكر في الدم اللي ارتفاعها ممكن يسبب بطء في عملية حرق الدهون وده هيخليكي تحسي بالجوع, ممكن تشربي القرفة يوميا كمشروب, او ترشي منها رشة على فنجان القهوة, او تسلقي تفاح وترشي عليه قرفة دي تعتبر اكلة صحية جدا وهتساعدك على حرق الدهون وتخسيس الوزن.
5 انواع من البطن بتظهر مش بسبب زيادة الوزن
