ازاي تلاقي الهواية المناسبة لشخصيتك
الهواية تعتبر من الحاجات المفيدة جدا ووسيلة لتخفيف التوتر وبتساعدنا اننا نخرج من جو الشغل او الدراسة وضغوط الحياة بشكل عام ونمارس حاجة بنحبها, لكن احيانا في ناس كتير مش بيكون عندهم هوايات بيمارسوها, وفي نفس الوقت بيكون صعب عليهم انهم يحددوا الهواية اللي ممكن تكون ممتعة بالنسبة لهم, والنهاردة احنا هنساعدكم تعرفوا هوايتكم, وهنقول لكل بنات حوا ازاي تلاقي الهواية المناسبة لشخصيتك.
– ايه هي الهواية؟
الهواية ببساطة اي حاجة بتعمليها لغرض المتعة والترفيه, مافيش منها مقابل مادي, ولكن هي حاجة بتحبي تمارسيها في وقت فراغك عشان تساعدك في التخلص من التوتر والضغط, وتساعدك في التواصل مع اللي حواليكي بشكل احسن.
وللاسف الايام دي بقت السوشيال ميديا زي الفيس بوك, التويتر, وغيرها من مواقع التواصل هي اللي بقت وسيلة الترفية لكتير من الناس واخدت مكان الهواية لكن هي للاسف بتسرق الوقت ومالهاش فايدة حقيقية.
– ليه الهواية مهمة؟
غالبا الهواية بتخلق لك منفذ تقدري تفرغي فيه الطاقة السلبية وتخرجي من ضغوط الشغل والدراسة, وتعملي حاجة لنفسك انتي وده هيساعدك تنسي مشاكلك اليومية, والاسترخاء بعد يوم متعب, وهتديكي كتير من المتعة.
– ازاي تلاقي الهواية المناسبة لشخصيتك:
1- ارجعي لطفولتك:
ارجعي بذاكرتك كده لايام الطفولة وشوفي لو كان في حاجات انتي كنتي بتستمتعي بيها وبتعمليها وانتي صغيرة, لان غالبا الحاجات دي هي اللي هتبقى الهواية المناسبة ليكي دلوقتي حتى بعد ما كبرتي, ممكن مثلا تكوني كنتي بتحبي تخيطي هدوم العرايس بتاعتك يبقى هنا تعرفي ان هوايتك الخياطة, او كنتي بتحبي تركبي عجل, او ممكن تكوني كنتي بتمارسي هواية بعد ما كبرتي شوية لكن اهملتيها مع الوقت, ممكن رسم, كروشية, عزف, تصوير, ابدأي انك ترجعي لها تاني.
2- طاردي الهواية:
لو في حاجة كنتي بتعمليها وانتي صغيرة لكن مش فاكراها, ممكن يكون مفيد ليكي عشان تفتكري انك تبدأي مثلا تروحي محلات الاشغال اليدوية, او محل الادوات الرياضية, او محل آلات موسيقية, او مكتية, وتبدأي تشوفي ايه اللي هيلفت نظرك من الحاجات دي او هتتشدي له اكتر, ممكن تلاقي نفسك مثلا مسكتي كتاب طبخ, او تعليم خياطة, او تعليم تصوير, ده ممكن يديكي فكرة انتي مهتمة بايه.
3- جربي كذا فكره:
لو مش عارفة تبدأي منين او ايه الهواية اللي ممكن تختاريها, ممكن تجربي انك تعملي اكتر من حاجة وشوفي نفسك هتستجيبي وتتشدي لاي واحدة فيهم اكتر.
4- اختاري حاجة تخليكي تنسي يومك:
لو مش عارفة تختاري الهواية, حاولي كده تفكري تعملي حاجة تنسيكي ضغوط وقلق اليوم, وتكون حاجة تساعدك على الاسترخاء وترجع لك التوازن النفسي والجسدي, ممكن مثلا هواية زي الجري تروحي مكان مفتوح وفي ودانك الهاند فري وتسمعي موسيقتك المفضلة وانتي بتجري, ده هينسيكي تعب اليوم وهيغيرلك المود وهيجدد نشاطك.
5- لاحظي ايه اكتر الحاجات اللي بتحبي تشتريها:
لاحظي نفسك كده هل في حاجة معينة بتشتريها في كل مره تنزلي تعملي شوبنج, ده ممكن يديكي فكرة عن هوايتك, مثلا دايما بتحبي تتابعي الموضة؟ يبقى ده ممكن يقولك انك ممكن تتجهي لهواية زي الخياطة او تصميم الازياء, بتحبي تشتري شموع معطرة؟ جربي انتي تعمليها بنفسك, بتحبي تشتري لوحات مرسومة تعلقيها في اوضتك؟ جربي انتي ترسمي.
هل بتحبي تقري القصص القصيرة. جربي انتي اكتبي قصة بنفسك, هل دايما بتحبي تشتري السكارفات التريكو التشانكي؟ ليه متجربيش تعملي واحد بنفسك, يعني الحاجات اللي بتشتريها ممكن توجهك للهواية الخاصة بيكي.
6- بصي ايه اللي محتاجة تغيريه في نفسك:
لو مثلا خارجة رايحة تتفرجي على فيلم او تعملي شوبنج لوقت طويل, وفكرتي كده ان انتي ممكن كنتي عملتي حاجة تانية معينة بدل السينما او الشوبنج الطويل وتضييع الوقت, لو دايما بتحاولي تحسني من نفسك وشايفة انك ممكن تعملي حاجة افيد يبقى خلي الهواية بتاعتك تحققلك ده, واختاري هواية تساعدك على تحسين شخصيتك وتغييرك للافضل.
وفي الحالة دي تسألي نفسك سؤال ايه الحاجة اللي كنتي بتعمليها قبل كده وبطلتي تعمليها لما كبرتي وبقى عندك مسئوليات منعتك عنها, وارجعي مارسيها تاني.
7- افتكري اخر حاجة خلتك تنسي تاكلي:
فكري في اخر حاجة عملتيها وخلت الوقت طار منك من غير ما تحسي ونساكي حتى الاكل وقضيتي وقت كبير وانتي بتعمليها , في الحالة دي تعتبر انسب هواية ليكي تقدري تمارسيها.
في النهاية اختاري الحاجة اللي تخرجك من ضغوط الحياة وجو الشغل او الدراسة وتعمليها وانتي مستمتعة, واللي بعد ما تعمليها تحسي انك جددتي نشاطك واتخلصتي من التوتر والقلق.
11 نصيحة تخليكي تستمتعي بالوقت اللي بتقضيه لوحدك
