ازاي تطفشي عريس مش عايزاه من غير ما تزعلي اهلك بطرق مضمونة ومتجربة !

ريهام محمود
ريهام محمود
32503

اكيد من ابسط حقوق اي بنت انها يكون ليها حق اختيار شريك حياتها والانسان اللي هتكمل معاه باقي عمرها, لكن بما اننا في مجتمع شرقي بقى وكل اللي حواليكي بيبقوا نفسهم يجوزوكي باي طريقة, وخالتك تجيبلك عريس وعمتك وجارتك, وماما تزن على ودانك كل شوية ويحاولوا يضغطوا عليكي في البيت بكل الطرق عشان توافقي على العريس اللي متقدم ولو رفضتي يزعلوا ويعملوا حملة ضدك في البيت, طيب ازاي بقى تطلعي من الورطة دي من غير مشاكل؟ هو ده اللي هنقوله لكل بنات حوا هنعرفك ازاي تطفشي عريس بطرق مضمونة ومتجربة ومن غير ما تزعلي اهلك.

ازاي تطفشي عريس:

طبعا احنا مش جايين النهاردة نقولك الطرق التقليدية اللي اتهرست في كل الافلام القديمة والجديدة زي مثلا تحطي شطة في القهوة ولا ملح بدل السكر ولا تعملي مكياج مش حلو او تنكشي شعرك ولا تحولي له عينك, كل ده بقى معروف دلوقتي وبقت حيل مفقوسة اوي, لكن هنقولك على طرق ذكية تعمليها عشان تطفشيه بكل بساطة.

1- ركزي مع ام العريس:

زي ما احنا عارفين في جواز الصالونات بيكون رأي الام قبل العريس واهم حاجة تكون هي راضية عنك قبله هو شخصيا لانها بتبقى عايزة عروسة تقدر تسيطر عليها وكلمتها هي اللي تمشي بعد جوازك من ابنها, عشان كده اول مفتاح للتطفيش هي ام العريس, لازم تحسسيها انك ليكي شخصية قوية ومستقلة ومستحيل تسمحي لحد يسيطر عليكي ولا يمشي كلمته عليكي باي شكل.

مثلا ممكن تطلبي من اهلك انهم يطلبوا منها انكم تقعدوا لوحدكوا بحجة انك عايزة تفهمي شخصيته طبعا وهنا في اللحظة دي هي هتحس انك بتخرجيها من حياتكم من اولها كده ودي لوحدها هتخليها ترفضك.

ازاي تطفشي عريس 1
ازاي تطفشي عريس 1

2- خلي تفكيرك عكس تفكيره:

لما تقعدي معاه اسمعي كل كلامة كويس جدا عشان تعرفي بيفكر ازاي وانتي بقى زي الشاطرة كده تعملي عكسها على طول عشان توصلي له انكم مش متفقين اصلا.

يعني مثلا لو عنده مشكلة في موضوع الشغل وعايزك بعد الجواز تقعدي في البيت حطي له العقدة في المنشار وقوليله انك مش هتسيبي شغلك بعد الجواز وشغلك ده حياتك ومتقدريش تستغني عنه, وهكذا بقى كل حاجة هو عايزها انتي تبقي عكسها على طول.

3- وصلي له انك انسانة تافهه:

متستغربيش لكن دي من الطرق الفعالة جدا في التطفيش لان دايما الراجل اللي بيتجوز بطريقة الصالونات بيبقى حاطط في دماغه شروط معينة ولازم تكوني انسانة تقدر تتحمل المسئولية وست بيت, انتي بقى حسسيه انك تافهه ومش بتاعة مسئولية اصلا وكل اللي همك انك تخرجي مع اصحابك وتقعدي على السوشيال ميديا وتاخدي سيلفهات طول الوقت, وانك مش بتحبي شغل البيت وعايزة خدامة لانك مدلعة ومش بتعملي حاجة في البيت ولا بتعرفي تطبخي اصلا, ده هيخليه يروح ميرجعش تاني.

ازاي تطفشي عريس 2
ازاي تطفشي عريس 2

4- استرجلي:

كل راجل بيدور على الانوثة في البنت اللي عايز يرتبط بيها وبيبقى عايزة رقيقة وناعمة وصوتها دايما واطي وبتتكسف ومش بتتكلم كتير, عشان كده من طرق التطفيش المضمونة انك تحسسيه انه قاعد مع واحد صاحبه استرجلي في تصرفاتك وفي اسلوب كلامك ومشيتك وكل حاجة, ووصلي له انك بتكرهي كل حاجة البنات بتحبها زي لبس الفساتين والمكياج وغيرها من اهتمامات البنات.

ازاي تطفشي عريس 3
ازاي تطفشي عريس 3

5- اعملي انك اوبن مايندد وفيمنيست:

انك تكوني اوبن مايندد او متحررة, او فيمنيست ومدافعة عن حقوق المرأة دول ممكن يكونوا اكتر حاجتين يطفشوا اي عريس, وصلي له دايما انك متحررة ورافضة كل عادات وتقاليد المجتمع, وتاني حاجة بترعب اي راجل انك تكوني مدافعة بتعصب عن حقوق المرأة لان دايما الراجل الشرقي بطبعه كده واخد فكرة عن البنت الفيمنيست ان صعب السيطرة عليها ودايما بيخاف يرتبط بالبنت اللي بيكون فكرها بالشكل ده, ده غير كمان الفكرة السلبية الموجودة في المجتمع عن البنت الفيمنيست.

ازاي تطفشي عريس 4
ازاي تطفشي عريس 4

6- خليكي نكدية:

مافيش حاجة بيكرهها الراجل اكتر من النكد, عشان كده بقى على طول اضربي بوز النكد, واتلككي وازعلي على اي حاجة واعملي مشكلة على اتفه الاسباب.

ازاي تطفشي عريس 5
ازاي تطفشي عريس 5

7- امسكي عليه سكرين شوت:

احنا طبعا في عصر السوشيال ميديا وده تقدري تستخدميه سلاح, ممكن تجربي تكلميه من ايميل تاني وتشوفي هيتعرف وهياخد ويدي في الكلام ولا لا, لو عمل كده يبقى وقع في شر اعماله خدي سكرين شوت وعرفيه انك متقبليش ترتبطي بواحد بيكلم بنات تانية وقوليله انك عملتي كده عشان تختبريه وسقط في الامتحان.

8- اغلطي في اسمه:

ممكن وانتوا قعدين مع بعض كده وبتتكلموا حاولي تغلطي في اسمه وكرريها اكتر من مره في كذا مقابلة, هنا هتوصلي له انه حتى اسمه بتغلطي فيه يعني مافيش اهتمام من ناحيتك نهائي, وفي نفس الوقت هيشك انك ممكن تكوني كنتي بتحبي شخص مثلا وده اسمه وده هيوصله انك لسه بتحبيه وهنا بقى هيطفش مش هيرجع.

9- خليكي تنكه ودمك تقيل:

ارسمي بقى دور التناكة على الاخر وتقل الدم, لما يتكلم معاكي جاوبي على قد السؤال, متفتحيش معاه مواضيع ولا حوارات, ده هيوصله انك مش بتحبي تتكلمي معاه اصلا ودمه تقيل على قلبك وهيطفش على طول.

10- طولي فترة الخطوبة:

معظم عرسان الصالونات بيبقى تقريبا جاهز وعايز يتجوز بسرعة يعني فترة الخطوبة تكون 6 شهور او بالكتير سنة, في الحالة دي بقى لازم تفهميه انك مش عايزة تتجوزي بسرعة مش قبل سنتين مثلا عشان تكوني قدرتي تعرفي شخصيته كويس وفهمتيه, لو طلع لازقه بقى وقالك هستنى في الحالة دي نفذي معاه كل الطرق اللي احنا قولناها فوق عشان يطفش بسرعة.

ازاي تطفشي عريس 6
ازاي تطفشي عريس 6

اسئلة مثيرة للاهتمام تسأليهم لحبيبك هتعرفك على شخصيتة اكتر

اسئلة تسأليها لحبيبك عشان تعرفيه اكتر
اسئلة تسأليها لحبيبك عشان تعرفيه اكتر

مقالات متعلقه

50 سؤال تسألهم لحبيبتك عشان تعرفها بشكل افضل

50 سؤال تسألهم لحبيبتك عشان تعرفها بشكل افضل

تفضلي سينجل افضل من المحاربة في علاقة غلط ، اعرفي السبب

تفضلي سينجل افضل من المحاربة في علاقة غلط ، اعرفي السبب

اهم اسرار الزواج الناجح ، وازاي تظهروا احترامكم لبعض

اهم اسرار الزواج الناجح ، وازاي تظهروا احترامكم لبعض