اغرب الصفات الموجودة في شخصيتك حسب برجك
زي ما كلنا عارفين ان كل برج بتبقى ليه صفات بتميزه ومختلفة عن اي برج تاني, والنهاردة من خلال موضوعنا هنقولك على اغرب صفة في شخصيتك حسب برجك.
اغرب صفة في شخصيتك حسب برجك:
1- برج الحمل (21 مارس – 19 ابريل):
اغرب صفة في البرج ده بتكون في طريقة رقصهم, رقصهم ممكن تبقى غريبة وكوميدية جدا وبحركات غير متوقعة, وكمان مش بيهتموا باللي حواليهم او شكلهم هيبقى عامل ازاي قدام الناس وهما بيرقصوا.
2- برج الثور (20 ابريل – 20 مايو).
اغرب صفة هي حب الاكل, اصحاب برج الثور ممكن يقعدوا ياكلوا وجبة لساعات وساعات, ويستمتعوا جدا بكل قطمة في الاكل, وده ممكن يسبب ازعاج للي حواليهم لانهم ممكن يقعدوا على وجبة 3 ساعات.
بس الصفة دي ممكن يكون ليها جانب ايجابي لان هما مش بس بيستمتعوا بالاكل هما بيحبوا يستمتعوا بالحياة بشكل عام, يعني حتى لو هيشموا وردة ياخدوا وقتهم اوي ويستنشقوا ريحتها اوي.
3- برج الجوزاء (21 مايو – 20 يونيو).
الاثارة والاهتمام بالتفاصيل التافهة, برج الجوزاء من الناس اللي ممكن تهتم بتفاصيل مالهاش لازمة او تافهة, يعني ممكن يثير اهتمامه جدا اخبار المشاهير بتفاصيلها, او حدث على الفيس بوك بتلاقيه مديه اهتمامه جدا ومتابعه, وهما نفس الاشخاص اللي لو سألتي سؤال وهما عارفين اجابته هتلاقيهم نطوا من مكانهم عشان يجابوا, يعني عندهم اثارة وحماسة زايدة في شخصيتهم.
4- برج السرطان (21 يونيو – 22 يوليو):
السرطان اكتر صفة بتميز شخصيتهم الحنية الزيادة, بيبقوا عايزين يساعدوا اي حد في طريقهم حيوان في الشارع, طفل, ست كبيرة, لكن مشكلتهم ان مزاجهم متقلب جدا وبيتنقلوا من حالة لحالة بسرعة, لكن طيبتهم وانهم اشخاص لطاف جدا هتخلي اللي حواليهم يسامحوهم على بعض التصرفات.
5- برج الاسد (23 يوليو – 22 اغسطس):
برج الاسد مجانين صور, مش هتلاقي اي حد بيشارك صور على السوشيال ميديا اكتر من اصحاب برج الاسد, وبيهتموا جدا بتفاصيل الصورة بالاضاءة, الوقفة, زاوية التصوير, المكان يعني لازم الصورة تطلع مثالية جدا, لان الصور تعتبر بالنسبة لهم توثيق لذكرى ولحظات خاصة.
6- برج العذراء (23 اغسطس – 22 سبتمبر):
برج العذراء عنده هوس بالتخطيط, كل حاجة بيعملها بيكون عامل بيها قايمة ولو حاجة مش مكتوبة في القايمة يبقى متتوقعوش ان صاحب برج العذراء ممكن يعملها وهو مش مخطط ليها, يعني يعتبر شخص مش عفوي ابدا, ومستحيل يظهر في اي مكان وهو مش مستعد بنسبة 100%.
7- برج الميزان (23 سبتمبر – 22 اكتوبر):
اكتر صفة بيتميز بيها اصحاب برج الميزان هي الدبلوماسية, وبيتعاطف مع الناس اللي بيستحقوا ده, ومن الاشخاص اللي ممكن يخزنوا جواهم حاجة مضيقاهم من حد لمدة سنين ولكن فجأة وبشكل غير متوقع تماما هتلاقيهم انفجروا وطلعوا غضبهم كله لدرجة ان اللي حواليهم هيستغربوا انهم ازاي مخبيين الغضب ده جواهم سنين.
8- برج العقرب (23 اكتوبر – 21 نوفمبر):
اصحاب برج العقرب عندهم قدرة العقب او التنقيب عن حاجة بشكل عالي جدا, يعني بيحبوا يجمعوا تفاصيل ومعلومات اي حاجة حابين يعرفوها, ممكن اللي حواليهم يتخوفوا من طريقتهم شوية لكن في نفس الوقت بيكونوا معجبين بيهم وممكن يستعينوا بيهم انهم يجيبوا لهم معلومات لاي حاجة هما عايزينها, يعني بيقوموا كده بدور المحقق او البوليس السري.
9- برج القوس (22 نوفمبر – 21 ديسمبر):
اصحاب برج القوس حديثهم صاخب جدا بشكل مبالغ فيه ودايما متحمسين كده زيادة عن اللزوم, ويمكن اصحابهم مش بيتفقوا مع طريقتهم دي لكن في نفس الوقت بيشوفوهم مسليين.
10- برج الجدي (22 ديسمبر – 19 يناير):
برج الجدي عندهم قدرة على تقدير ادق امور الحياة بشكل صح جدا, يعني لو رجعتي لهم تستشيرهم في اي حاجة هتلاقيهم بيفيدوكي جدا برأيهم, لو رايحة تشتري حاجة وعايزة تاخدي راي حد ثقة اكيد هتكون صاحبة برج الجدي هي الاختيار المثالي ليكي, وكمان اصحاب البرج ده بيساعدوا اللي حواليهم انهم يستمتعوا بأدق التفاصيل في الحياة عموما.
11- برج الدلو (20 يناير – 18 فبراير):
برج الدلو عندهم عدم توازن او غرابة شوية من الناحية ال Sexual, ومش بيخجلوا انهم يتكلموا عن الجانب ده في شخصيتهم وممكن يتكلموا عليه كانهم بيتكلموا عن حالة الجو مثلا او اي موضوع عادي جدا.
12- برج الحوت (19 فبراير – 20 مارس):
اصحاب برج الحوت حالمين جدا, يعني تكوني بتكلميهم في حاجات واقعية او حصلت في الحياة الحقيقية بعدها بدقايق هتلاقيهم سرحوا منك في عالم الاحلام والخيال, وبيدمجوا الحياة الواقعية بالاحلام تماما, والموضوع ده في شخصيتهم ممكن يخليهم مفسرين احلام كويسين جدا.
دلوقتي بعد ما اتعرفنا على الصفة المميزة لكل برج, قولي لنا هل فعلا الصفة دي بتميزك ولا لا؟