21 سبب يخلوكي تحبي الخريف والشتا

ريهام محمود

في

933

يمكن يكون في كتير مش بيحبوا موسم الشتا بشكل عام ومش بيحبوا جو البرد, لكن لما تشوفي معانا النهاردة من خلال موضوعنا مميزات الشتا والخريف اكيد هتحبيه واللي بيحبوه اكيد هيحبوه اكتر كمان, تعالوا نعرف اسباب تخليكي تحبي الخريف والشتا ويبقى هو الموسم المفضل بالنسبة لك.

اسباب تخليكي تحبي الخريف والشتا:

1- Vampy Lips:

هتقدري تستخدمي الوان الروج الغامقة لاي وقت في اليوم, بعكس الصيف اللي الالوان الغامقة ممكن تكون مناسبة اكتر لفترة بالليل, لكن في الخريف والشتا هتقدري تحطي الالوان دي اي وقت ومش هتتقيدي بوقت معين.

2- ستايل البوت:

مافيش احلى من ستايل الاحذية اللي بتليق على كل اي لبس ما بين الفساتين, البنطلونات, الشورتات, الجيبات, واللي ممكن تلبسيه على لبس كاجوال, او في المكتب في الشغل, ده غير ان البوت عشان مقفول بيحافظ على الرجل من الخشونة والتشقق وبيحافظ على الضوافر بعكس الصيف الحاجات المفتوحة اللي بتسبب لنا خشونة الرجل والكعوب.

شوفي من هنا ازاي تختاري البوت المناسب لشكل جسمك.

3- ستايل Loafers:

ميزة الستايل ده من الشوزات انه بيليق على كل الاعمار يعني ممكن اي حد يلبسه, وهتلاقي منه الوان مختلفة كتير تقدري تختاري منها اللي تحبيه اكتر.

4- الشيرلينج جاكيت:

الجاكيت الشيرلينج من القطع الاساسية في الشتا, لانه مريح جدا في اللبس وفي نفس الوقت بيدفي, وتقدري تعملي لوك انيق سريع بيه وتنسقيه مع جينز وسويتر وبوت.

شوفي من هنا ازاي تلبسي الشيرلينج جاكيت في الايام البرد اوي.

5- لوك شعر رائع يوميا:

اكيد مافيش حاجة بتزعجنا في الصيف اكتر من الرطوبة والحرارة اللي بتبوظ الشعر وبتخليه يتجعد ويبقى جاف وناشف, لكن ايام الخريف والشتا هتستمتعي كل يوم بلوك شعر رائع وهيدوم معاكي لاطول فترة من غير ما يبوظ.

6- السويت شيرت:

السويت شيرت كمان من القطع الاساسية في دولاب الخريف والشتا, لانه بيدفي وفي نفس الوقت بيليق على كل حاجة سواء جيبات, بنطلونات كلاسيك, جينز, او جلد.

7- القبعات:

اكيد الخريف والشتا هما المواسم المناسبة اللي تلبسي فيهم القبعات وتضيفي لمسة اناقة للوك بتاعك من غير اي مجهود, تقدري تختاري ما بين ال Fedora الكلاسيك, او ال Top Hat, Beret, او ال Rounded hat.

8- اسبوع الموضة:

اسبوع الموضة في نيويورك اللي بيكون كل سنة في الخريف وكتير بيستنوه مش بس عشان ناخد منه افكار الموضة او نعرف الحاجات التريندي في اللبس, لكن كمان بنستوحي منه موضة المكياج وتسريحات الشعر.

سوبر موديلز التسعينات متصدرين عرض ازياء فيرساتشي لربيع 2018.

9- Motorcycle Jacket:

اكيد مافيش احلى من طلة عصرية وشبابية مع الجاكيت الجلد وفي نفس الوقت لوك انيق ويدفيكي في الايام البرد, ممكن تلبسيه مع جينز وتيشيرت, او تنسقيه مع Flirty dresses.

10- وصفات القرع لجمالك:

القرع الموسم بتاعه في فصل الخريف, وهو من الحاجات المفيدة جدا لجمال البشرة والجسم لانه غني بالمواد المضادة للاكسدة اللي بتساعد على الحفاظ على شباب البشرة وتوحيد لونها وبيخليها خالية من اي عيوب.

– ممكن تعملي ماسك لشد البشرة من القرع, اخلطي ¼ كوباية قرع مسلوق مع بيضة وقلبيهم مع بعض كويس لحد ما يبقى ملمس الخليط كريمي, ضيفي للخليط معلقة كبيرة عسل ابيض لو بشرتك جافة, ولو بشرتك دهنية ضيفي كام نقطة من خل التفاح بدل العسل, قلبيهم مع بعض كويس, افردي الخليط على البشرة وسيبيه من 15 – 20 دقيقة وبعدها اغسليه بمية دافية, كرري الوصفة مرة في الاسبوع.

– ماسك القرع لتفتيح البشرة, اخلطي 2 معلقة كبيرة قرع مسلوق ومهروس مع ½ معلقة عسل ابيض, ½ معلقة لبن, قلبيهم مع بعض كويس, افردي الخليط على البشرة وسيبيه من 15 – 20 دقيقة وبعدها اغسليه بالمية.

شوفي من هنا 8 مكونات طبيعية موجودة في مطبخك هتغنيكي عن مستحضرات التجميل.

11- المكياج:

هتقدري تحطي المكياج بشكل يومي من غير ما تخافي انه يسيح من الحرارة والرطوبة, لان جو الخريف والشتا بيخليه يدوم فترة اطول معاكي.

12- الكاروه:

الكاروه كمان من القطع الانيقة جدا لموسم الخريف والشتا اللي ممكن تلبسيها على كل حاجة وفي اي وقت.

القميص الكاروه من القطع المميزة لدولابك في الخريف والشتا.

13- Suede jacket:

ال او جلد الغنم Suede من الخامات المميزة جدا لفصل الخريف والشتا وكمان لونه مرتبط جدا بالخريف وتساقط اوراق الشجر, بالاضافة لده بيدي لوك انيق جدا.

شوفي من هنا ستايلات انيقة للبس الجاكيت والبالطو ال Suede.

14- الوان المانيكير الغامقة:

كتير مننا بيحبوا الوان المانيكير الغامقة لكن هي مش مناسبة لفصل الصيف, دلوقتي جيه وقتكم تحطوا الالوان الغامقة اللي بتحبوها لانها مناسبة جدا لموسم الخريف والشتا.

شوفي من هنا 30 لون مانيكير تريندي للخريف والشتا من افضل الماركات اكيد هتجربيهم.

15- Black Friday Sales:

الخريف بيكون فيه ال Black Friday Sales او جمعة التخفيضات اللي تقدروا تشتروا منها كل حاجة من لبس, وميك اب, واحذية, وشنط وكل حاجة انتوا عايزينها باسعار مخفضة عن الايام العادية.

16- الشموع المعطرة:

اضاءة الشموع المعطرة مناسبة جدا لجو الخريف والشتا بتخلق دفء في المكان وبتعمل جو Cozy جدا في البيت وتستمعي بقعدة دافية في البيت قدام فيلمك المفضل.

17- اوراق الشجر كاكسسوار:

اوراق الشجر اللي بيتساقط في الخريف ممكن جدا نستغله بطريقة مبتكرة ونعمل منه اكسسوارات للشعر او على القبعة او تعملي حلق بورقة شجر, يعني كل واحدة تقدر تبتكر زي ما هي عايزة.

18- هترتاحي من ايام ازالة الشعر:

اكيد في الصيف كل البنات بيكونوا حريصين على ازالة الشعر الزيادة من الجسم بشكل منتظم لان اللبس ممكن يكون مفتوح او قصير, لكن في الخريف والشتا انتي بتبقى لابسة طويل وشراب وشوزات مقفولة وده ممكن يريحك شوية من ازالة الشعر لفترة, واكيد المفروض اننا نهتم بازالة الشعر طول السنة ولكن لو في ايام مكسلة فيها او مشغولة ومعندكيش وقت تشيليه هتقدري انك تعملي ده في الخريف او الشتا.

19- الوان شعر غنية:

الالوان الغنية والغامقة تقدري تعمليها في الخريف والشتا لانها مناسبة للمواسم دي اكتر من الصيف, ممكن تجربي تعملي لون Rose Gold من الالوان التريندي جدا للموسم ده.

شوفي من هنا 13 فكرة لون شعر للبشرة الفاتحة.

20- Double-breasted Coat :

اكيد اللبس اللي بيدي دفء هو اللي محتاجينه في الموسم ده اللي منها البالطو ال Double-breasted او المزدوج الصدر يعتبر من القطع الاساسية لموسم الخريف والشتا, ومن اكتر الالوان اللي بتدي لوك انيق جدا هو اللون الجملي.