موضة الشتا للمحجبات وافكار للوك كاجوال وانيق
النهاردة من خلال موضوعنا جمعنالكم من الفاشونستس المختلفين موضة الشتا للمحجبات من خلال مجموعة افكار للوك خريفي وشتوي كاجوال ومريح وفي نفس الوقت انيق.
– هنلاحظ في المجموعة انها منوعة بشكل كبير جدا ما بين السويتر دريس اللي ممكن تنسقيه على جينز وشوز رياضي للوك كاجوال ومريح.
– كمان هنشوف ان موضة ال Bomber Jacket مستمرة معانا الشتا ده, ممكن تنسقيه مع سويتر وجينز وشوز رياضي لخروجاتك الصبح.
– في الايام البرد اوي تقدري تعتمدي على لوك الطبقات وتلبسي شيميز وفوقية سويتر وفوقيهم كارديجان طويل وتنسقيه مع الجينز وشوز رياضي لخروجات الصبح وممكن بالليل تلبسي عليه شوز كلاسيك بكعب.
– هنلاحظ كمان ان موضة الجاكيت الجينز موجودة معانا في الموسم ده, ممكن تلبسيه مع سويتر دريس, او تنسقي شيميز مع بلوفر وتلبسي فوقيهم الجاكيت الجينز.
– كمان موضة الفيست من الحاجات التريندي الموسم ده سواء الفيست العادي او الفيلفيت او ال Puffy Vest الطويل.
– وزي ما اتكلمنا قبل كده وقولنا ان موضة الفيلفيت او القطيفة تريندي جدا الموسم ده تقدري تنسقي جيبة فيلفيت مع بلوفر وتحتيه شيميز مع انكل بوت للوك انيق لخروجاتك بعد الضهر.
– هنلاقي كمان الالوان اتنوعت ما بين الوان الشتا الدافية التقليدية زي البني, الرمادي, الاسود, وما بين الالوان الزاهية زي التركواز, البينك, الاحمر, الاصفر.