تسافري فين في راس السنة 2018 في مصر..اعرفي معانا احلى اماكن السفر

ريهام محمود
ريهام محمود
2660

زي ما بيقولوا في السفر 7 فوايد, لكن الحقيقة ان السفر ليه فوايد كتير جدا غير تغيير الجو والفسحة والاستمتاع احنا بنتعرف على اماكن جديدة وعادات مختلفة وحتى لكنات مختلفة لان كل مدينة او مكان جوه مصر ليها لكنتها وطريقة كلامها المختلفة, والنهاردة من خلال موضوعنا هنقولك على احلى اماكن السفر في مصر اللي ممكن تقضي فيها راس السنة, او تسافري لها في اي وقت خلال السنة للفسحة والاستمتاع او الاستجمام.

احلى اماكن السفر في مصر:

1- القاهرة:

اول حاجة لو انتي من اي مدينة تانية جوه مصر غير القاهرة وفي نفس الوقت مش عايزة تبعدي اوي او معنديش امكانية تسافري مكان بعيد, هيكون انسب مكان ليكي هو القاهرة, هتقدري تقضي يوم حلو وتنبسطي جدا لان القاهرة فيها اماكن ومعالم منوعة كتير ما بين الاثار الفرعونية والاسلامية والقبطية.

ممكن تروحي تزوري الاهرامات, وتطلعي على احياء القاهرة الاسلامية زي شارع المعز والحسين, ممكن تروحي مسجد ابن طولون, قلعة صلاح الدين, مسجد محمد علي, واكيد متنسيش من ضمن الجولة تروحي خان الخليلي.

ومن الاثار القبطية اللي ممكن تحطيها في البرنامج بتاعك, زيارة الكنيسة المعلقة, ودير القديس سمعان او المعروف بكنيسة الكهف.

اخر اليوم ممكن تقضي سهرة راس السنة في فندق من فنادق القاهرة زي السميراميس, الهيلتون, الفورسيزونز, كونراد, نايل ريتز كارلتون, او ممكن تقضي السهرة على مركب نيلية بيكونوا عاملين بروجرام حلو ومخصوص لراس السنة.

احلى اماكن السفر في مصر 1
احلى اماكن السفر في مصر 1

شوفي من هنا احلى اماكن الفسح والخروج في القاهرة.

2- الاسكندرية:

تاني مكان معانا هو الاسكندرية عروسة البحر المتوسط, كمان تقدري تعملي برنامج من اول اليوم تزوري فيه الاماكن السياحية في اسكندرية زي قلعة قايتباي, قصر المنتزة, المسرح الروماني, ممكن تروحي تتمشي في منطقة بحري وتعملي رحلة ممتعة بالمركب او رحلة اليخت من منطقة الانفوشي وهي من الرحلات المعروفة في الاسكندرية, واكيد مننساش اكلة السمك الاسكندراني المعتبرة.

اخر اليوم تقدري تقضي سهرة راس السنة في فندق الفورسيزونز, هيلتون جرين بلازا, فندق فلسطين, فندق توليب.

احلى اماكن السفر في مصر 2
احلى اماكن السفر في مصر 2

شوفي من هنا احلى اماكن الفسح في اسكندرية بالنهار.

3- شرم الشيخ:

شرم الشيخ من الاماكن المعروفة بجمال الطبيعية فيها, واللي تقدري تعملي فيها نشاطات كتير جدا, اولها طبعا الاستمتاع بالبحر ولان جوها دافي فهي مناسبة جدا للفترة دي من السنة, تقدري تستمتعي بالغطس في محمية راس محمد اللي تعتبر من اجمل المناطق الطبيعية اللي ممكن تستكشفي فيها الشعب المرجانية والحياة البحرية المختلفة تحت المية.

كمان من اجمل الاماكن هناك خليج القرش اللي بيضم مجموعة من افخم المنتجعات والفنادق الشاطئية اللي ممكن تسهروا فيها سهرة راس السنة.

ولمحبين حياة الصحرا والتشويق والاثارة اكيد لازم تنطلقوا في رحلة سفاري في صحراء سينا, وتقضوا وقت ممتع في وسط الصحرا مع سهرة بدوية.

احلى اماكن السفر في مصر 3
احلى اماكن السفر في مصر 3

4- الغردقة:

من اكتر الاماكن السياحية المشهورة في الغردقة هي منطقة المارينا, وهي تعتبر رصيف ومرسى لليخوت وبتضم مجموعة من المطاعم المشهورة والمحلات التجارية.

كمان الغردقة فيها واحد من اجمل شواطيء العالم وهي جزر الجفتون اللي بتتميز بلون المية الفيروزي والرملة البيضا, والمميز في الغردقة انك تقدري تروحي منها لاماكن تانية لانها بتبعد تقريبا نص ساعة عن الجونة, وساعة عن سفاجا, و3 ساعات من الاقصر.

احلى اماكن السفر في مصر 4
احلى اماكن السفر في مصر 4

5- الجونة:

زي ما قولنا الجونة بتبعد عن الغردقة تقريبا نص ساعة بس, وتعتبر الجونة المكان المناسب لمحبين الهدوء والاستجمام, وتقدري كمان تمارسي فيها نشاطات كتير زي الغطس, السيرفينج او ركوب الامواج, ركوب الزوارق الشراعية, التزلج على المية.

ومن اشهر شواطيء الجونة هو شاطيء زيتونة, بالاضافة لمرسى اليخوت مارينا ابو تيج اللي بيضم مجموعة من المطاعم والكافيهات والبوتكيات الصغيرة اللي ممكن تشتري منها هدايا تذكارية.

احلى اماكن السفر في مصر 5
احلى اماكن السفر في مصر 5

6- سهل حشيش:

منطقة سهل حشيش من الاماكن اللي نالت شهرة كبيرة في الفترة الاخيرة وهي تبعد تقريبا نص ساعة جنوب مطار الغردقة, بتضم مجموعة من اشهر الفنادق والمطاعم والكافيهات والمحلات التجارية والحدائق, ومراكز الغوص, ومرسى اليخوت, وملاعب جولف, ونادي لركوب الخيل, ومن اهم واشهر المنتجعات في منطقة سهل حشيش هو بالم بيتش بيازا, واوبري سهل حشيش, والفنادق دي بشكل خاص بتقدم رحلات خاصة بتكلفة عالية لمحبين الرفاهية.

احلى اماكن السفر في مصر 6
احلى اماكن السفر في مصر 6

7- سفاجا:

سفاجا بتبعد تقريبا مسافة 53 كم جنوب الغردقة, وتعتبر من الاماكن الهادية اللي مافيهاش زحمة كتير زي الغردقة او شرم الشيخ, وسفاجا بتتميز انها بتضم مجموعة من الاكواخ والقرى السياحية الصغيرة على الشاطيء الرملي, ومن اهم الانشطة اللي ممكن تمارسيها هناك هي الغطس وركوب الامواج في منطقة شرم النجا اللي موجود فيها مجموعة رائعة جدا من الشعب المرجانية بمختلف الوانها, والحياة البحرية المنوعة, وسفاجا مشهورة جدا بالمطاعم اللي بتقدم اشهى المأكولات البحرية والاسماك.

كمان من سفاجا تقدري تطلعي على الاقصر لان هناك متوفر مكاتب سياحية بتنظم رحلات للاقصر لانها بتبعد عنها تقريبا مسافة 231 كم.

احلى اماكن السفر في مصر 7
احلى اماكن السفر في مصر 7

8- مكادي باي:

مكادي باي او خليج مكادي يعتبر من اجمل الاماكن على ساحل البحر الاحمر, وموجود ما بين الغردقة وسفاجا, وتقدري في خليج مكادي تستمتعي برحلة اليخت اللي هتاخدك في نص البحر لرحلة غطس تستكشفي فيها اجمل الشعب المرجانية والكائنات البحرية المختلفة, كمان متوفر في مكادي باي اسطبلات خيول بتضم افضل سلالات الخيول وتقدري تعملي رحلة بالخيل على الشاطيء وتاخدي اجمل صور تذكارية في المكان.

ومن اشهر منتجعات مكادي باي جاز اكوافيفا ريزورت, شتايجنبيرجر مكادي هوتل.

احلى اماكن السفر في مصر 8
احلى اماكن السفر في مصر 8

9- القصير:

بتبعد ساعتين تقريبا جنوب الغردقة وبتضم مجموعة كبيرة جدا من الاثار الفرعونية والرومانية والقبطية والاسلامية اهمها قلعة القصير, كمان هي تعتبر من المناطق اللي تقدري تمارسي فيها رياضة الغطس وتستمتعي بجمال الشعب المرجانية والاسماك, ومن اهم المنتجعات في القصير موفينبك ريزورت, وراديسون بلو ريزورت.

احلى اماكن السفر في مصر 9
احلى اماكن السفر في مصر 9

10- مرسى علم:

مرسى علم بتبعد عن القصير حوالي ساعة ونص, ومن اكتر الاماكن اللي زاد عليها الاقبال من المصريين والاجانب في الفترة الاخيرة لانها مناسبة لزيارتها طول السنة, كمان من الاماكن اللي ممكن تعملي فيها غطس, واهم حاجة بتميز مرسى علم هو محمية صمداي او محمية الدلافين اللي تقدري فيها تغطسي وتستمتعي باللعب مع الدلافين.

لو بتحلمي تروحي جزر المالديف وتستمتعي بالطبيعية الخلابة والمية الفيروزية والاشجار والرملة البيضا الناعمة مش محتاجة انك تسافري للمالديف لان المكان ده موجود عندنا في مصر في مرسى علم على شاطيء شرم اللولي اللي يعتبر من اجمل الشواطيء على مستوى العالم.

كمان من اشهر الاماكن في مرسى علم بورت غالب اللي بيضم مجموعة كبيرة من الفنادق والمنتجعات والمحلات التجارية والمطاعم, وممشى على طول الشاطيء.

من الاماكن المميزة جدا في مرسى علم هو محمية وادي الجمال وبتتميز المنطقة دي بالمية النقية جدا والشعب المرجانية والاسماك الملونة اللي بتستهوي جدا محبين الغطس لمشاهدتها واكتشافها, وبتتميز المنطقة كمان بجبال حماطة اللي تقدروا تشوفوا منها مجموعات الجمال وهي ماشية مع بعض, كمان المنطقة غنية بالصخور اللي بتحتوي على المعادن والاحجار الكريمة زي الزمرد والكوارتز والفلسبار والدهب والمنجنيز.

احلى اماكن السفر في مصر 10
احلى اماكن السفر في مصر 10

11- العلمين:

العلمين بتقع شرق مرسى مطروح وبتبعد عن الاسكندرية تقريبا ساعة ونص, وممكن تروحي بالطيارة لان فيها مطار دولي, او بري بالعربية, والمنطقة دي مشهورة بالمواقع العكسرية والنصب التذكارية والمقابر لضحايا الحرب المعروفة بمقبرة الكومنولث, لان تم فيها معركة خلال الحرب العالمية التانية اللي انتهت بهزيمة الالمان.

لكن العلمين كمان اكيد بتضم اجمل الشواطيء الساحرة, ومجموعة من الاثار الرومانية واليونانية, ومن اشهر شواطيء العلمين شاطيء سيدي عبد الرحمن اللي بيبعد عنها تقريبا مسافة 30 كم والمنطقة بتضم مجموعة من الفنادق والمنتجعات الضخمة زي بيتش بار, ومنتجع مراسي.

احلى اماكن السفر في مصر 11
احلى اماكن السفر في مصر 11

12- العين السخنة:

العين السخنة بتبعد عن القاهرة تقريبا ساعة ونص وبتطل على خليج السويس, والعين السخنة بتجذب السياح من كل مكان لان فيها مياة كبريتية اللي ليها فوايد صحية كتير جدا, وتعتبر العين السخنة مكان مناسب للزيارة طول السنة, وتقدري تمارسي فيها رياضة الغطس وركوب الامواج, وبتضم مجموعة من الفنادق والمنتجعات والمحلات التجارية والمطاعم والسينمات, والمدن الترفيهية, وملاهي للاطفال, عشان كده تعتبر مناسبة جدا للعيلة كلها لان فيها كل حاجة, ومن اشهر منتجعات العين السخنة منتجع جاز ليتل فينيس.

احلى اماكن السفر في مصر 12
احلى اماكن السفر في مصر 12

13- طابا:

طابا بتقع على خليج العقبة وتبعد عن شرم الشيخ تقريبا 3 ساعات, وطابا تعتبر من الاماكن الهادية اللي تعتبر وجهه مناسبة لمحبين الخصوصية, والمميز في طابا انها بتجمع ما بين حدود 3 دول وهي الاردن والسعودية وفلسطين.

ومن الاماكن المميزة جدا في طابا هو قلعة زمان اللي بيقدم احلى الاكلات المطبوخة بالفخار مع منظر طبيعي ساحر على خليج العقبة, ومن النشاطات المميزة جدا في طابا هي رحلة القارب لجزيرة فرعون اللي موجود عليها قلعة صلاح الدين اللي يعتبر من اشهر المعالم الاسلامية في طابا, وزيارة فيورد باي او خليج فيورد جنوب طابا اللي كمان تقدري تمارسي فيها الغطس وتستمتعي بجمال الشعب المرجانية والاسماك الملونة.

لعشاق المغامرة والسفاري تقدروا تستمتعوا برحلة السفاري على البيتش باجي وتزوروا الكانيون او الوادي الملون او الاخدود الكبير اللي يعتبر من الظواهر الطبيعية النادرة في طابا وهو عبارة عن صخور ملتوية باشكال والوان مبهرة جدا.

احلى اماكن السفر في مصر 13
احلى اماكن السفر في مصر 13

14- دهب:

دهب كمان بتطل على خليج العقبة وبتبعد عن شرم الشيخ ساعة ونص, وبتتميز دهب بالمحميات الطبيعية والشواطيء الساحرة جدا, ومن اشهر الاماكن اللي بتجذب السياح في دهب هي البلو هول اللي بيتعمل فيها مسابقات الغطس للمحترفين, وهي منطقة غنية جدا بالشعب المرجانية بالوانها المبهرة والاسماك اللي مش موجودة في اي مكان تاني, والثري بولز اللي تعتبر من اهم المحميات الطبيعية اللي تقدري تمارسي فيها الغطس او السنوركلينج.

وركوب الخيل كمان يعتبر من النشاطات المميزة جدا في دهب اللي ممكن تعملي بيه رحلة على الشاطيء, ودهب بتنتشر فيها البازارات والاسواق الشعبية اللي بتعرض المنتجات المصرية المختلفة والهدايا التذكارية, وبتضم مجموعة من المطاعم والكافيهات اللي بتطل على البحر والفنادق والمنتجعات زي دهب بارادايس ومنتجعات شيخ علي دهب.

ولمحبين المغامرة والاثارة تقدروا تستمتعوا برحلة سفاري وتتسلقوا جبل موسى والاستمتاع بمشاهدة الشروق او الغروب من فوق الجبل, وزيارة دير سانت كاترين.

كمان من الحاجات المميزة جدا في دهب هي الرحلة لجبل الطويلات اللي تقدري تستمتعي عليه بالسهرات البدوية على انغام الموسيقى والفلكلور البدوي, والاستمتاع بالاكل البدوي.

احلى اماكن السفر في مصر 14
احلى اماكن السفر في مصر 14

15- نويبع:

نوبيع موجودة ما بين طابا ودهب, وتبعد عن دهب تقريبا ساعة, وهي تعتبر من الاماكن الهادية جدا واغلبية سكانها من البدو, عشان كده تعتبر هي الاختيار المثالي لكل اللي بيدورو على الهدوء والاستجمام والخصوصية, وتقدري تستمتعي فيها بالرحلات البحرية والبرية.

وتعتبر من اشهر الاماكن فيها مدينة نواميس الاثرية اللي بترجع لعصور ما قبل التاريخ, وبتنتشر فيها كمان الواحات الخضرا زي واحة عين خضرة اللي بتحتوي على عين طبيعية للمية العذبة, ومن اهم النشاطات اللي ممكن تتعمل في نويبع هي رحلات التخييم في الصحرا, وركوب الخيل والجمال او البيتش باجي في جولة لاستكتشاف الاودية والهضاب والواحات اللي موجودة في وسط الصحرا, ومن اشهر واجمل الاماكن للتخيم في نويبع هي راس شيطان.

احلى اماكن السفر في مصر 15
احلى اماكن السفر في مصر 15

16- الاقصر:

من المدن الجميلة في وسط مصر على دلتا نهر النيل, اللي بتضم مجموعة كبيرة جدا من الاثار الفرعونية زي معبد الكرنك, معبد الاقصر, منطقة وادي الملوك اللي بتضم كتير من المقابر الفرعونية للملوك اللي حكموا مصر, معبد حتشبسوت.

من النشاطات المميزة جدا في الاقصر هو جولة المنطاد اللي تقدري من خلالها تتفرجي على المدينة من فوق, وطبعا بعد الجولة الارضية والجوية تقدري تروحي الاسواق والبازارات اللي بتشتهر بيها الاقصر اللي بتضم الهدايا التذكارية المميزة, والمصنوعات المصرية والتوابل.

ومن الرحلات المميزة جدا هي الرحلات بالمراكب النيلية اللي ممكن تاخديها لحد اسوان وتستمتعي بمنظر النيل على انغام الموسيقى والعروض الفلكلورية المصرية.

احلى اماكن السفر في مصر 16
احلى اماكن السفر في مصر 16

17- اسوان:

اسوان بتقع جنوب مدينة الاقصر, واهم ما يميز اسوان هي احتفاظها بثقافتها وعاداتها وتقاليدها النوبية, ومن اهم المعالم اللي ممكن تزوريها في اسوان معبد فيلة على جزيرة فيلة في وسط النيل, زيارة القرى النوبية بالمركب اللي تعتبر متحف حي بيعرض نمط البيوت النوبية الملونة المميزة جدا والثقافة النوبية, متحف النوبة, جزيرة النباتات او الجزيرة الاستوائية اللي بتضم مجموعة من الاشجار والازهار والنباتات المختلفة, سد اسوان او السد العالي.

وممكن تاخدي جولة في الاسواق الشعبية وتشتري منتجات النوبة والمشغولات اليدوية المميزة والتوابل, بتتميز اسوان ان وسيلة التنقل ما بين كل اماكنها السياحية بمركب في النيل والتمتع بالمنظر الرائع على الضفتين على طول النيل.

احلى اماكن السفر في مصر 17
احلى اماكن السفر في مصر 17

18- سيوة:

لمحبين الهدوء والاستجمام والبعد عن الزحمة والحياة الحضرية والتلوث والاستمتاع بالحياة البدائية النقية والانعزال اكيد هيكون الاختيار المثالي ليهم هي سيوة, بتقع في الصحرا الغربية وبتبعد عن مرسى مطروح تقريبا 3 ساعات ونص.

من اهم معالم سيوة قلعة شالي واللي تعتبر من اقدم المدن التاريخية في مصر, جبل الموتى بشكله المخروطي الغريب اللي بيضم مجموعة من المقابر الفرعونية.

ولمحبي المغامرة اكيد هتستمتعي برحلة السفاري لبحر الرمال العظيم والتزحلق على جبال الرملة الناعمة, وفي وسط بحر الرمال هيقابلكم عين المية الطبيعية الكبريتية السخنة, وعين المية السقعة, كمان من الاماكن المميزة جدا هي عين كليوباترا السخنة والتمتع بالسباحة فيها, البحيرات المالحة اللي تعتبر من اكبر مناجم الملح على مستوى العالم وبيتم تصدير الملح بتاعها لكل دول العالم تقريبا, وللاستمتاع بمشهد الغروب المميز اكيد ميفوتكوش بحيرة فطناس اللي بيتجمع فيها كل السياح وزوار سيوة للتمتع بمشهد الغروب الرائع.

واكيد مينفعش نسيب سيوة من غير جولة في اسواقها الشعبية وشرا منتجات سيوة المميزة من زيت زيتون ومربى وتمر ومشغولات يدوية وغيرها من المنتجات السيوية المميزة.

ومن اشهر الفنادق السيوية شالي ريزورت, وفندق البابنشال او ادرير اميلال ويعتبر الفندق ده من اكتر الاماكن المختلفة والمميزة جدا في سيوة لانه مصنوع بالكامل من الملح وهنلاقي ان الفندق من غير كهربا وبيستخدموا الشموع بس للاضاءة وممنوع فيه استخدام الموبايل, والاكل فيه كله طبيعي من الخضروات المقطوفة من جنينة الفندق وبيتعمل بالطرق التقليدية يعني المكان يعتبر بعد كامل عن الحضارة والاستمتاع بس بالمكان والاستجمام فيه, ولكن الفندق تكلفته عالية.

احلى اماكن السفر في مصر 18
احلى اماكن السفر في مصر 18

اماكن الخروج والفسح في اسكندرية

حدائق المنتزة
حدائق المنتزة

مقالات متعلقه

احلى اماكن الخروج في رأس السنة

احلى اماكن الخروج في رأس السنة

احلى اماكن الخروج في الاسكندرية

احلى اماكن الخروج في الاسكندرية

احلى اماكن الخروج في القاهرة

احلى اماكن الخروج في القاهرة