نصايح ازاى تفضلى ايجابية لو عندك مشاكل مع زميل فى الشغل
بعد ما تتخرجى من الكلية وتبدأى تدورى على وظيفة مش فورا بتلاقى وظيفة احلامك او حتى وظيفة فى تخصصك تبقى مبسوطة منها تحققى فيها اللى انتى عايزاه، بالعكس بتضطرى تتحملى اكتر من وظيفة مابتحبيهومش او مش مناسبين ليكى و ممكن كمان تتنقلى من وظيفة للتانية و ماتقعيش كتير فى نفس الشغل، وبالتالى ممكن تتعاملى مع ناس و تختلفى معاهم خصوصا لو كان زميل او زميلة ليكى و كان فى بينكم منافسة او خلافات فى الشغل من اى نوع، وممكن حتى الخلافات دى تبقى فى الشغل و تقلب لخلافات شخصية و هنا الموضوع بيبقى أصعب، وعلشان احنا فى بنات حوا بنحاول نساعدك دايما فى كل مجالات حياتك، فى المقال ده هنقولك نصايح ازاى تفضلى ايجابية لو عندك مشاكل مع زميل فى الشغل ..
نصايح ازاى تفضلى ايجابية لو عندك مشاكل مع زميل فى الشغل
1- أتأكدى انه مديرك فى صفك :
اتجنبى انه اول حاجة تعمليها لما يبقى فى مشاكل مع زميل فى الشغل هى انك تجرى على مديرك و تشتكيله وتخلقى جو من الدراما و تزودى من حدة المشاكل، لكن لو باين انه فى حد مش مبسوط من شغلك او عنده مشكله شخصية معاكى يبقى لازم تاخدى احتياطاتك، حاولى تتحكمى انتى فى الامور بطريقتك وبأحسن طريقة تقدرى بيها تعملى ده، لكن لو لقيتى الموضوع زايد اوى عن الحد و بدأ يبقى صعب و مش قادرة تتحمليه ، يبقى مهم ان تطلبى مساعدة مديرك وانك تحاولى انه يكون فى صفك.
2- ماتفكريش كتير فى المشكلة :
سهل انه دماغنا تبدأ تفكر كتير فى المشكلة و نبدأ نكبرها جوانا و نصعبها من غير ما نحس، و نسمع الناس فى الشغل يتكلموا عن المشكلة و من هنا يبدأ التضخيم و الـ over thinking ، حاولى دايما تسيطرى على تفكيرك و على مشاعرك وانك ماتبقيش انفعالية ، ادى لكل حاجة حجمها و بس.
3- ماتخليش عواطفك تسيطر عليكى :
لما بتقى فى موقف انه فى مشاكل مع زميل فى الشغل ، بيبقى صعب انه تتحكمى فى نفسك وانه مايبقاش فى رد فعل و عصبية، لكن لازم تعملى كل اللى تقدرى عليه علشان تتحكمى فى رد فعلك علشان يطلع صح و مايغلطكيش او يضيع حقك. وكمان مهم انك ماتعيطيش طبعا ! علشان يبقى عندك فرصة احسن انك تدافعى عن نفسك و تشرحى موقفك، ولما تروحى البيت تقدرى تنفسي عن غضبك زى ما انتى عايزة.
4- ماتتكلميش عن الموضوع كتير مع زمايلك :
بيبقى الموضوع مغرى جدا انك تتكملى فيه مع زمايلك فى الشغل بحكم انهم اقدم منك و عارفين الاشخاص افضل و بتبقى معتقده انهم يقدروا ينصحوكى او يرشدوكى للتصرف الصحيح او الـ attitude اللى ممكن تاخديه، وقد ما ده ممكن يكون صحيح بنسبة معينة ، لكن مهم انك ماتتكلميش كتير عن الموضوع مع زمايلك وانه مايبقاش فى gossip حواليه. ولو مهم اوى بالنسبة لك انك تتكلمى عن الموضوع يبقى الافضل انك تتكلمى فيه مع اصحابك من بره الشغل .
5- اجتهدى فى شغلك أكتر :
احسن حاجة ممكن تعمليها لما يبقى فى مشاكل مع زميل فى الشغل هى انك تتجنبى الكلام الكتير والتصرفات الانفعالية و تدافعى عن نفسك بشغلك، بقصد انه تجتهدى فى شغلك و تخليه هو يتكلم عنك و يبقى الوسيلة اللى بتثبتى بيها نفسك فى المكان اللى انتى فيه .
اعرفى معانا كمانازاى تجهزى نفسك لـ job interview وايه هى الحاجات اللى تاخديها معاكى المقابلة