10 تصرفات ممكن تدمر العلاقة..وازاي تتجنبيهم

ريهام محمود
ريهام محمود
3141

اي علاقة في بدايتها اكيد بتكون حلوة ومافيش فيها اي مشاكل ومع الوقت بنلاقي في مشاكل بدأت تظهر والعلاقة مش زي الاول او بتتغير, واحيانا مش بنبقى عارفين السبب او المشكلة فين بالظبط, عشان كده النهاردة هنقولكم على اكتر تصرفات ممكن تدمر العلاقة وازاي تتجنبيهم.

تصرفات ممكن تدمر العلاقة وازاي تتجنبيهم:

1- التصرف كانك سينجل:

العلاقة هي ارتباط بين شخصين واشتراكهم في كل تفاصيل حياتهم, لكن لما طرف يتصرف كانه سينجل من غير اعتبار للشريك او للطرف التاني اكيد ده هيسبب مشكلة, وتبقى كل التصرفات كان مافيش حد في حياتك ومش ملتزمة بوجود الشخص ده في حياتك, انك مثلا متاخديش رايه في اي تفاصيل في حياتك وتتصرفي كانه مش موجود, في الحالة دي هيبدأ الطرف التاني يفكر انك متصلحيش لعلاقة او لحياة زوجية لانك مش هتقدري تلتزمي بوجود حد يشاركك حياتك, عشان كده لازم تكون في مشاركة في كل حاجة وتكوني صادقة مع نفسك ومعاه لو عايزة العلاقة دي تنجح.

2- المسئولية المالية:

من الحاجات اللي ممكن تسبب مشاكل ان الشريك يتعامل كانه لسه لوحده ومافيش حد مسئول منه من الناحية المالية ومش بيشوف احتياجاتها, عشان كده لازم يكون في اهتمام بالطرف التاني ويعرف انه بقى مسئول منه ماديا.

تصرفات ممكن تدمر العلاقة وازاي تتجنبيهم 1
تصرفات ممكن تدمر العلاقة وازاي تتجنبيهم 1

3- مافيش اهتمامات تانية:

من الحاجات اللي ممكن تدمر العلاقة هو الارتباط الزيادة او التبعية للشريك, يعني بتنسي هواياتك واصحابك واهتماماتك وتبقي مربوطة بيه هو بشكل كامل ومافيش مساحة خاصة لكل واحد فيكم يمارس اهتمامات مختلفة عن التاني, عشان كده المفروض ان كل طرف يدي مساحة خاصة للطرف التاني يعمل فيها اهتمامات بعيد عنه يعني تمارسي هواية, تروحي الجيم, تقابلي اصحابك, وتفتكري كده لما كنتي لوحدك قبل الارتباط كنتي بتقضي وقت فراغك ازاي واعملي نفس الحاجات وانتي في العلاقة, ولازم تعرفي ان الاختلاف وشخصية كل واحد هي اللي شدت كل طرف للتاني عشان كده لازم تحافظي على شخصيتك وكيانك.

4- الحساسية الزيادة وعدم الشعور بالامان:

عدم الشعور بالامان وعدم الثقة في الطرف التاني من الحاجات اللي ممكن تدمر العلاقة لانك هتسبب مشاكل باستمرار وهتبقي دايما عايشة في حالة شك وغيرة من غير سبب, ولو مريتي بتجربة صعبة قبل العلاقة دي ومأثره عليكي ومخلياكي مش قادرة تثقي فيه يبقى هنا المشكلة فيكي ولازم انك تحاولي تتخطي المرحلة دي لو عايزة تحافظي على العلاقة.

تصرفات ممكن تدمر العلاقة وازاي تتجنبيهم 2
تصرفات ممكن تدمر العلاقة وازاي تتجنبيهم 2

5- عدم احترام الطرف التاني:

اكيد الفكاهة والهزار مطلوبين في العلاقة ولكن لما الهزار يتحول لعدم احترام للطرف التاني هنا هتظهر المشكلة, عشان كده لازم كل طرف يبقى عارف ايه اللي ممكن يتقبله الطرف التاني وايه اللي ممكن ميتقبلوش وكل طرف يراعي شعور التاني وميحاولش ياذيه معنويا بكلمة او تصرف مش كويس.

6- الروتين والملل:

العلاقات ممكن بعد فترة تقع في فخ الروتين والملل, وهنا لازم اننا نحافظ على بريق وسحر العلاقة, وتتعاملوا مع بعض زي البداية يعني اللمس والحضن والقبلات والتفاصيل الصغيرة اللي بتفرق جدا في العلاقة, ممكن وانتوا بعيد عن بعض كل طرف يبعت للتاني رسالة حب, وكلها طرق بسيطة لكن بتجدد الحب وبتحافظ على العلاقة ناجحة.

تصرفات ممكن تدمر العلاقة وازاي تتجنبيهم 3
تصرفات ممكن تدمر العلاقة وازاي تتجنبيهم 3

7- التواصل على التليفون بدل التواصل مع الشريك:

يمكن تكون المشكلة دي من اكتر المشاكل الشائعة دلوقتي هي التكنولوجيا ومواقع التواصل الاجتماعي للاسف بقينا نتواصل على النت وسايبين حياتنا الواقعية مافيش فيها اي تواصل, وده اللي بيحصل دلوقتي في كتير من البيوت يبقى كل واحد ماسك تليفونه وسايب شريكه ومافيش تواصل مباشر بينهم ونادرا لما يتكلموا مع بعض, عشان كده لازم اننا ننسى التليفون والنت شوية ويبقى في تواصل اكتر وتقعدوا تتكلموا مع بعض كل واحد يتبادل تفاصيل يومه مع التاني, لان النت ممكن يتسنى عادي يتفتح في اي وقت لكن الشريك لو مش هيلاقي او هي مش هتلاقي اهتمام هو اللي اكيد مش هيستنى.

8- التكرار المزعج:

بيحصل كتير ان طرف يطلب من التاني طلب مرة واتنين وتلاتة والطرف التاني يتجاهل الطلب في كل مره من غير اي رد فعل, وده اكيد بيسبب مشاكل وازعاج للطرفين لان في طرف بيلح باستمرار والتاني بيتجاهل باستمرار, ولحل المشكلة لازم توصل لشريكك انك سمعت طلبه وهتنفذه او هتحله في اقرب وقت ممكن وبالطريقة دي هيقف الازعاج للطرفين.

9- السلوكيات:

لما طرف مش بيكون راضي عن سلوك مستمر للطرف التاني اكيد ده هيسبب مشاكل ويدمر العلاقة, انه مثلا يعمل سلوك معين بشكل يومي وهنا بيبقى وصل لمرحلة تجاهل لشريك حياته وتجاهل لمشاعره, عشان كده لازم يكون في محاولة لتجنب التصرفات والسلوكيات اللي ممكن تكون بتضايق الطرف التاني.

10- عدم الامانة:

خيانة الامانة دي اكيد نهاية لاي علاقة, لو مش قادرة تثقي في الشخص اللي معاكي دي من اكتر الحاجات اللي ممكن تدمر اي علاقة, وهنا لازم تقفي مع نفسك وتسأليها هتقدري تكملي مع شخص مش امين معاكي او مش بتثقي فيه.

تصرفات ممكن تدمر العلاقة وازاي تتجنبيهم 4
تصرفات ممكن تدمر العلاقة وازاي تتجنبيهم 4

تصرفات بيعملها الراجل تقولك انه بيحبك حب حقيقي

تصرفات الراجل بيعملها مع حبه الحقيقي
تصرفات الراجل بيعملها مع حبه الحقيقي

مقالات متعلقه

5 حاجات بتعملها النساء معظم الرجالة بيشوفوها مش جذابة

5 حاجات بتعملها النساء معظم الرجالة بيشوفوها مش جذابة

6 غلطات ممكن تدمر العلاقة الزوجية

6 غلطات ممكن تدمر العلاقة الزوجية

ايه اللي بتقوله عادات النوم بتاعتك عن علاقتك بشريكك؟

ايه اللي بتقوله عادات النوم بتاعتك عن علاقتك بشريكك؟