8 مكونات طبيعية موجودة في مطبخك هتغنيكي عن مستحضرات التجميل

ريهام محمود
ريهام محمود
في
بشرة
7715

المنتجات اللي في مطبخنا وممكن نكون بناكلها بشكل يومي, ممكن تبقى كمان حلول طبيعية تستخدميها لجمالك, والنهاردة من خلال موضوعنا هنقولك على مكونات طبيعية لجمال البشرة من مطبخك.

مكونات طبيعية لجمال البشرة:

1- ماسك بياض البيض Peel -off mask:

الماسك ده بيساعد على تنقية وتقليل حجم المسام.

اول حاجة افصلي الصفار عن البياض, هاتي منديل ورق اغمسيه في بياض البيض وافرديه على وشك, سيبيه لحد ما ينشف تماما, وبعدين قشريه من على البشرة وشيليه من تحت لفوق عكس اتجاه نمو الشعر, بعدها اغسلي بشرتك بمية دافية وادهنيها بكريم مرطب.

وممكن بدل ما تغمسي المنديل في بياض البيض تفردي المنديل على وشك وتدهني فوقيه بياض البيض بفرشة, ممكن تستخدمي اي طريقة من الاتنين هيدوكي نفس النتيجة.

مكونات طبيعية لجمال البشرة 1
مكونات طبيعية لجمال البشرة 1

2- ماسك الافوكادو والعسل:

لو حاسه ان شكل بشرتك مرهقة وتعبانة الماسك ده هيفيدك جدا انه يرجع لها نضارتها بشكل سريع.

المكونات:

– ½ ثمرة افوكادو.

– ¼ كوب شوفان مطحون.

– 1 معلقة كبيرة خل تفاح.

– 2 معلقة كبيرة عسل نحل.

– 1 معلقة صغيرة عصير ليمون.

الطريقة:

اهرسي ثمرة الافوكادو لحد ما تبقى ناعمة, ضيفي عليها الشوفان المطحون وقلبيهم مع بعض كويس, وبعدين ضيفي باقي المكونات للخليط وقلبيهم مع بعض تاني, افردي الخليط على بشرتك وسيبيه لمدة 20 دقيقة وبعدين اغسليه بالمية.

مكونات طبيعية لجمال البشرة 2
مكونات طبيعية لجمال البشرة 2

3- ماسك صفار البيض وزيت الزيتون:

الماسك ده كمان مفيد جدا في تغذية البشرة وعلاج الارهاق والتعب.

– افصلي الصفار عن البياض, خدي الصفار اخلطي عليه معلقة كبيرة زيت زيتون, وممكن عشان الريحة تحطي نقطة من اي زيت عطري زي زيت اللافندر او اي زيت تفضليه, وقلبي المكونات وادهني بشرتك بالخليط, سيبيه لمدة 20 دقيقة, وبعدها اغسليه بمية دافية.

– وممكن تستخدمي صفار البيض بطريقة تانية لعلاج ندبات حب الشباب, اخلطي صفار بيضه, مع معلقة صغيرة عصير ليمون, وكام نقطة من زيت شجرة الشاي, قلبي المكونات مع بعض كويس, ادهني بشرتك بالخليط لحد ما يقرب ينشف ادهني طبقة تانية منه وسيبيه لمدة من 15 – 20 دقيقة وبعدين اغسليه بمية دافية, ممكن تكرري الماسك من 2 – 3 مرات في الاسبوع.

– وممكن ماسك تاني للندبات, اخلطي صفار بيضة, مع معلقة او اتنين كبار زبادي من غير سكر, اخلطيهم مع بعض كويس ولو بشرتك جافة ممكن تزودي للمكونات كام نقطة زيت زيتون, ادهني بشرتك بالخليط وسيبيه 5 دقايق وبعدين ادهني طبقة تانية, سيبيه لحد ما ينشف خالص واغسليه بمية دافية, والماسك ده ممكن تستخدميه بشكل يومي لانه لطيف جدا على البشرة.

مكونات طبيعية لجمال البشرة 3
مكونات طبيعية لجمال البشرة 3

4- ماسك البطاطس المهروسة واللبن وزيت اللوز:

الماسك ده ممتاز جدا لعلاج حب الشباب وتفتيح البشرة بشكل فعال.

هاتي ثمرة بطاطس اسلقيها كويس واهرسيها, ضيفي لها 2 معلقة صغيرة لبن سايل او لبن بودرة, و1 معلقة صغيرة زيت لوز حلو, امزجي المكونات مع بعض كويس, حطي الخليط على البشرة وسيبيه لمدة 20 دقيقة, واغسليه بمية دافية.

كرري الماسك من 2 – 3 مرات في الاسبوع لافضل النتايج.

مكونات طبيعية لجمال البشرة 4
مكونات طبيعية لجمال البشرة 4

5- ماسك الطماطم Peel-off mask:

الماسك ده ليه اكتر من فايدة اولا بيزيل شعر الوش, بينضف المسام, وليه تأثير سريع جدا في تحسين لون البشرة.

هاتي ثمرة طماطم قشريها, واضغطي عليها في مصفى عشان تطلعي منها العصير من غير البذر ولا اللحم بتاعها.

خدي معلقة كبيرة من عصير الطماطم اللي طلع عندك, ضيفي عليه 1 معلقة كبيرة جيلاتين, و1 معلقة كبيرة لبن, اخلطيهم مع بعض كويس وحطيهم على حمام مية سخنة لحد ما الخليط يبقى قوامه مش جامد ولا سايل مناسب للفرد على الوش, بعدها ضيفي له كام نقطة عسل نحل, وقلبي الخليط كله, سيبي الخليط يهدى شوية بس عشان ميبقاش سخن اوي على البشرة, بعدين افرديه على بشرتك, سيبيه لحد ما ينشف تماما, وبعدين قشريه من على البشرة من تحت لفوق عكس اتجاه الشعر.

مكونات طبيعية لجمال البشرة 5
مكونات طبيعية لجمال البشرة 5

6- ماسك الشوفان واللبن:

لترطيب وتنعيم الجلد اكيد انتي محاجة للماسك ده.

اخلطي 2 معلقة كبيرة من دقيق الشوفان, مع 2 معلقة كبيرة لبن دافي, قلبيهم مع بعض لحد ما يمتزجوا كويس, وبعدين ضيفي للخليط 1 معلقة صغيرة زيت الزيتون وقلبي الخليط مرة تانية, افردي الخليط على البشرة وسيبيه من 10 – 15 دقيقة, وبعدين اغسليه بمية دافية.

مكونات طبيعية لجمال البشرة 6
مكونات طبيعية لجمال البشرة 6

7- ماسك الخيار والليمون Peel-off mask:

الماسك ده هايل جدا لتفتيح لون البشرة, وازالة العيوب, وتنضيف المسام.

اخلطي شريحتين خيار متقشرين مع 2 معلقة كبيرة عصير ليمون, سخنيهم مع بعض على النار على درجة حرارة منخفضة, بعد ما يسخنوا صفي الخليط وضيفي عليه 2 معلقة كبيرة مسحوق جيلاتين وقلبيهم مع بعض لمدة دقيقة, سيبيه يبرد شوية, وبعدين افرديه على بشرتك وسيبيه لحد ما ينشف خالص, وبعدين قشريه من على البشرة من تحت لفوق.

مكونات طبيعية لجمال البشرة 7
مكونات طبيعية لجمال البشرة 7

8- ماسك العسل:

الماسك ده يعتبر من الماسكات المغذية 100% لاستخدامه بشكل يومي لتغذية البشرة.

اخلطي 3 معالق صغيرة عسل نحل, مع 1/3 معلقة صغيرة قرفة مطحونة, امزجيهم مع بعض كويس, ادهني الخليط على البشرة وسيبيه 10 دقايق, وبعدين اغسليه بالمية.

مكونات طبيعية لجمال البشرة 8
مكونات طبيعية لجمال البشرة 8

اغسلي وشك بالاكل لبشرة صحية خالية من العيوب

بدائل طبيعية لمنظفات البشرة
بدائل طبيعية لمنظفات البشرة

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر