طرق طبيعية لعمل اللوشن في البيت بنفسك
كتير من البنات بيعانوا من الجلد الجاف, ومن الحاجات المفيدة جدا اللي بتساعد في التخلص من المشكلة دي هي اللوشن يعتبر مرطب ومغذي جدا للجلد, والنهاردة هنعرف مع بعض طرق طبيعية لعمل اللوشن في البيت.
طرق طبيعية لعمل اللوشن:
1- الطريقة الاولى:
المكونات:
– ¾ كوباية زيت لوز حلو.
– 1 معلقة صغيرة زيت فيتامين E .
– 3 معالق كبيرة زبدة شيا.
– 2 معلقة كبيرة زبدة كاكاو.
– 1 معلقة كبيرة شمع عسل.
– 1 كوب مية مقطرة او مية ورد.
– 43 نقطة من زيت اللافندر او زيت البرتقان وممكن تقللي الكمية ل 20 نقطة لو اللوشن للاطفال.
الطريقة:
– اخلطي زبدة الشيا مع زبدة الكاكاو وزيت اللوز وشمع العسل ودوبيهم مع بعض في حمام مية سخنة.
– سيبي الخليط يبرد لمدة دقايق, صبيه في البلندر واضربيه لحد ما يبقى سمكه كريمي.
– ضيفي له زيت فيتامين E والزيت العطري, اضربيه ثواني بالبلندر مرة تانية عشان تمزجي كل المكونات كويس.
– وانتي بتضربي الخليط ابدأي ضيفي المية المقطرة او مية الورد بالتدريج وخلي البلندر على سرعة من بطيئة لمتوسطة لمدة 30 ثانية.
– صبي الخليط في علبة او برطمان او ازازة بمضخة اي حاجة متوفرة عندك, خزنيه في مكان بعيد عن الضوء والحرارة, وسيبيه 24 ساعة قبل الاستخدام وبعد كده استخدمي عادي على البشرة والجسم.
2- الطريقة التانية:
المكونات:
– 1 كوب زبدة شيا.
– 1 كوب زيت جوز هند.
– من 1 – 2 معلقة صغيرة شمع عسل.
– من 75 – 100 نقطة زيت لافندر او اي نوع زيت عطري.
الطريقة:
– اخلطي زيدة الشيا مع زيت جوز الهند وشمع العسل ودوبيهم مع بعض في حمام مية سخنة.
– ضيفي للخليط الزيت العطري, اضربيهم مع بعض في الخلاط لحد ما يبقى الخليط كريمي, وبعدين صبيه في برطمان او علبة للتخزين.
3- الطريقة التالتة:
المكونات:
– ½ كوب زبدة شيا.
– 2 معلقة كبيرة زيت مغذي زي زيت الجوجوبا, او زيت الافوكادو, او زيت المشمش, او زيت اللوز الحلو, او زيت جوز هند, او زيت زيتون.
– 10 نقط من اي نوع زيت عطري “اختياري”.
الطريقة:
– دوبي زبدة الشيا على حمام مية سخنة, وبعدين ضيفي لها الزيت المغذي اللي انتي اختارتيه, قلبيهم مع بعض كويس.
– صبي الخليط في علبة التخزين وحطيها في التلاجة لمدة من 15 – 20 دقيقة عشان يتجمد.
– طلعيه من التلاجة وضيفي له الزيت العطري واخلطيه معاه بالشوكة, وخزنيه في درجة حرارة الغرفة.
4- الطريقة الرابعة:
المكونات:
– 1/3 كوب زيت جوز الهند.
– 1/3 كوب زبدة الشيا.
– 10 نقط اي نوع زيت عطري.
الطريقة:
– دوبي زبدة الشيا في الميكروويف او على حمام مية سخنة, ضيفي لها زيت جوز الهند وامزجي الخليط بالمعلقة او بالميكسر لحد ما يبقى سمكه كريمي.
– ضيفي الزيت العطري وقلبي المكونات كلها مع بعض, صبي الخليط في برطمان التخزين.
5- الطريقة الخامسة:
المكونات:
– 1 معلقة صغيرة زيت اللوز الحلو.
– 1 كوب زيت جوز الهند.
– شاي الكركدية.
– اي نوع زيت عطري.
– 3 معلقة كبيرة سكر ابيض “اختياري”.
– 2 معلقة كبيرة مية “اختياري”.
– بتلات ورد “اختياري”.
الطريقة:
– في بولة او طبق حطي زيت اللوز وضيفي له زيت جوز الهند, وكام نقطة من شاي الكركدية, و 8 نقط من الزيت العطري.
– بالمعلقة او بالميكسر اخلطي المكونات كلها مع بعض كويس لحد ما يبقى قوامها كريمي, وحطيه في برطمان التخزين.
– كخطوة اختيارية اخلطي معلقتين المية مع السكر الابيض وحطيهم على النار وقلبيهم لحد ما السكر يدوب, سيبي المية تبرد وبعدين حطي فيها بتلات الورد, طلعيها ورشي عليها سكر ابيض وسيبيها تنشف ليلة كاملة, وحطيها على وش البرطمان اللي خزنتي فيه اللوشن.
6- الطريقة السادسة:
المكونات:
– ½ كوب شمع العسل.
– ½ كوب زيت جوز الهند.
– ½ كوب زبدة الشيا.
– 20 نقطة زيت اللافندر.
الطريقة:
– اخلطي شمع العسل وزبدة الشيا وزيت جوز الهند ودوبيهم مع بعض على حمام مية سخنة.
– بعد ما يدوبوا كويس, ضيفي زيت اللافندر للخليط وقلبيهم مع بعض.
– صبي الخليط في قوالب سيليكون, وسيبيه لحد ما يتجمد خالص, وبعدين طلعيه من القوالب هيبقى عندك لوشن بار جاهز للاستخدام.
7- الطريقة السابعة:
المكونات:
– ½ كوب زبدة الشيا.
– 2 معلقة كبيرة زيت اللوز الحلو, او اخلطي 1 معلقة من زيت اللوز مع معلقة من زيت الجوجوبا.
– من 10 – 15 نقطة اي نوع زيت عطري.
الطريقة:
– اخلطي زبدة الشيا مع زيت اللوز ودوبيهم على حمام مية سخنة, بعد ما يدوب حطيه في التلاجة من 10 – 15 دقيقة يبرد.
– طلعيه من التلاجة وضيفي له الزيت العطري وقلبي الخليط بالمعلقة او بالميكسر لمدة دقيقة او دقيقتين لحد ما يبقى قوامة كريمي, وحطيه في برطمان التخزين.
8- الطريقة التامنة:
المكونات:
– 1 كوب زبدة كاكاو.
– ¼ كوب زيت جوز الهند.
– ½ معلقة صغيرة فانيليا.
– ½ كوب زيت لوز حلو.
الطريقة:
– اخلطي زبدة الكاكاو مع زيت جوز الهند دوبيهم مع بعض على حمام مية سخنة.
– بعد ما يدوب ضيفي للخليط زيت اللوز والفانيليا قلبيهم مع بعض.
– حطي الخليط في التلاجة لمدة من 20 – 30 دقيقة, طلعيه من التلاجة اضربيه بالهاند ميكسر لحد ما يبقى قوامه كريمي, صبي الخليط في برطمان التخزين.
أعملي بنفسك لوشن بعد ازالة الشعر الزائد لبشرة ناعمة جدا
