7 عادات بتعمليهم بتخليكى ماتقدريش تنجزى المهام اللى بتبقى مطلوبة منك

بقلمآية حسان فيمنوعات visibility1493

اوقات كتير مهما كنتى بتشتغلى بجد ومركزة فى الى انتى بتعمليه وقعدة على اللاب توب او على الكتاب ليل مع نهار علشان تخلصى الشغل او المذاكرة اللى متأخرة عليكى بتلاقى نفسك برده مابتخلصيش الحاجات اللى المفروض تكونى أنجزتيها و بمجهود أقل من كده كمان!  و بتبقى مش عارفة ايه السبب او ايه اللى المفروض تعمليه علشان تبقى نشيطة أكتر .. الحقيقة الاسباب واضحة و بسيطة و ممكن تتغلبى عليها بسهولة ! فى المقال ده بنات حوا هتقولك على 7 عادات بتعمليهم بتخليكى ماتقدريش تنجزى المهام اللى بتبقى مطلوبة منك .. 

7 عادات بتعمليهم بتخليكى ماتقدريش تنجزى المهام اللى بتبقى مطلوبة منك

1- بتمسكى تليفونك كتير :

طبعا التليفون او الموبايل بقى حاجة مهمة و اساسية فى حياتنا، لانه ممكن من خلاله تنظمى وقتك و بتظبطيه يصحيكى و تكتبى عليه المهام اللى وراكى ،لكنه هو نفس الجهاز اللى برده عليه الـ facebook و الـ instagram وده معناه انك كل شوية تمسكيه و تبصى على الـ notifications  بتاعتك وده بيشتتك و بيضيع من وقتك و تركيزك . 

نصيحتنا ليكى : 

وانتى شغاله او بتذاكرى اقفلى التليفون .

حطى التليفون بعيد عن ايدك و حاولى ماتبقيش شايفاه قدامك علشان تنسيه . 

اقفلى الـ notofications  للـرسايل و الـ Apps . 

استخدمى تليفونك فى الوقت المخصص للبريك بس. 

2- بتحطى لنفسك شغل كتير زيادة عن قدرتك :

لو كنتى ضغطتى نفسك بسبب انه الوقت اتزنق فبقيتى مضطرة تذاكرى مادتين مع بعض او لازم تسلمى التقارير دى لمديرك فى أسرع وقت او لو حتى كنتى بتشتغلى من البيت و لقيتى نفسك ملتزمة بـ freelance projects كتيرة ولازم تسلميهم فى مواعيد قريبة من بعضها، يبقى هنا لازم يبقى فى واقفة! تنظيم الوقت حاجة مهمة جدا جدا ، لازم تعرفى انك مش superhero  و التاسكات الكتيرة مش هتخلص لوحدها، اشتغلى على قد الوقت المتاح للشغل و لازم توفرى وقت لنفسك ترتاحى .. 

نصيحتنا ليكى : 

قبل ما توافقى على اى شغل جديد اتأكدى انه الـ to do list  بتاعتك فيها وقت فاضى.

خليكى واقعية من ناحية كمية الشغل اللى تقدرى تعمليها.

ماتتكسفيش انك ترفضى شغل. 

خلى فى بالك دايما انه وقت الفراغ و الراحة اللى هتهتمى فيه بنفسك وقت مهم ومش ضايع أبدا. 

3- بتنامى لفترات طويلة فى النهار :

انك تنامى وقت كفاية ده مثالى طبعا و احيانا كتير بيبقى حلم صعب يتحقق ! لكن مهم تعرفى انه قيلولة صغيرة لمدة 20 دقيقة مثلا فى اليوم هتبقى مفيدة جدا وممكن تمتد لـ 3 ساعات، لكن مش اكتر من كده لانه النوم لفترات طويلة ده معناه انك تعبانة و مش هتنجزى المهام اللى وراكى .. 

نصيحتنا ليكى : 

اعملى جدول لمواعيد نومك والتزمى بيه.

تجنبى انك تمددى وانتى شغاله او انك تقعدى على كنبة مثلا، حاولى الشغل يبقى على المكتب.

لو حسيتى انك عايزة تنامى اعملى حاجة تصحصحك، اشربى مية او عصير  او اسمعى اغنية بتحبيها. 

لو قررتى انك تاخدى قيلولة ،يبقى اظبطى موبايلك على ميعاد تصحى فيه وحطيه بعيد عنك. 

4- المكان اللى انتى فيه مش مناسب للشغل :

سبب تانى من أسباب ليه ماتقدريش تنجزى المهام المطلوبة منك هو انه البيئة او المكان الى بتشتغلى فيه يبقى مش حلو و مش بيساعدك على الانجاز، يعنى مثلا الاضاءة مش كويسة او المكان مش منظم او انه الجو مشحون و ده مخليكى متوترة و مش عارفة تركزى، مهم انك تبقى قاعدة بتشتغلى فى مكان بيلهمك و بيساعدك على التركيز و الانجاز. 

نصيحتنا ليكى: 

خدى من 5 لـ 10 دقايق فى بداية كل يوم علشان ترتبى مكتبك و تنضفيه. 

اتجنبى انك تاكلى مكان ما بتشتغلى . 

5- بسبب اختيارك للأكل :

اى مشروع ناجح وراه شخص ناجح قدر يرتب وقته ويبقى نشيط، والنشاط له علاقة مباشرة بانتى بتأكلى ايه وبتشربى ايه ، علشان كده الاكل الى بتاكليه اثناء اليوم بيأثر تأثير مباشر على نشاطك و قدرتك على الانجاز، اتجنبى انك تأكلى fast food  فى وقت الشغل و حاولى تأكلى أكل صحى زى سلطة خضار او فاكهة مع كوباية عصير مثلا .. 

نصيحتنا ليكى : 

هاتى الغدا بتاعك معاكى من البيت.

كلى healthy snacks  من وقت للتانى و انتى بتشتغلى . 

اشربى مية كتير.

6- بتشتغلى من غير جدول محدد :

علشان تقدرى تنجزى كل الللى وراكى لازم يبقى فى جدول شغل محدد تمشي عليه ، فى الجدول ده بترتبى المهام اللى مطلوبة منك حسب أولوليتها و بتكتبى الوقت المتوقع لانجاز كل مهمة من المهمات دى، و لازم تحاولى تمشي عليه و تنجزى كل حاجة فى وقتها علشان تحسي انه وقتك منظم وانك بتنجزى. 

نصيحتنا ليكى : 

اعملى الجدول فى مكان واضح بحيث يكون موجود قدام عينيكى طول الوقت ، وممكن تعمليه على الموبايل. 

رتبى المهام بحسب أهميتها. 

كافئى نفسك بأى حاجة بتحبيها لما تنجزى المهام فى قتها المحدد. 

حاولى طول الوقت انك تلتزمى بالجدول. 

7- بتقارنى نفسك بغيرك :

آخر سبب معانا من اسباب ليه ماتقدريش تنجزى المهام هو انك بتقارنى نفسك بغيرك، ودى غلطة كبيرة جدا لانه مفيش حاجة قادرة انها تحبطك و تقلل من ناشطك قد ما تفضلى تحسسى نفسك انك اقل من زميلاتك او انهم احسن منك لانه ببساطة كلنا مختلفين وقدراتنا مختلفة و مش كل الناس بتشتغل بنفس الطريقة، علشان كده اعرفى دايما انك مميزة بطريقتك الخاصة وانه مفيش حد فينا شبه التانى . 

نصيحتنا ليكى : 

فى جدولك اليومى حطى وقت تقفلى فيه تليفونك علشان ترتاحى شوية. 

ركزى على اهدافك القادمة و خططى انك توصليلهم . 

اكتشفى فى نفسك موهبة جديدة و حاولى تتعلميها. 

خليكى دايما قريبة من اصحابك واللى بيحبوكى لاننا بنستمد ثقتنا فى نفسنا منهم. 

أعرفى معانا كمان ازاى تخلى يومك حلو و تقللى من التوتر و الضغط بخطوات بسيطة ؟!