10 طرق توقفي بيهم ال Overthinking التفكير زيادة عن اللزوم

ريهام محمود

في

10054

مافيش حد فينا مش بيتعرض لل Overthinking او التفكير زيادة عن اللزوم وبتمر في دماغنا كلنا افكار واحداث مرينا بيها, لكن في اشخاص بيبقى عندهم افراط في التفكير ومبيقدروش يخرجوا الافكار من راسهم, سواء الشخص ده عمل حاجة غلط, مر بيوم سيء, او بيفكر في بكره ومستقبله او شغله او دراسته ايا كان بس دايما عايشين في حالة قلق وبتكون عندهم زحمة افكار مش بسهولة بيقدورا يتخلصوا منها, والنهاردة من خلال موضوعنا هنقولك ازاي توقفي ال Overthinking.

– مخاطر ال Overthinking:

– دايما الافكار بتكون مؤلمة او سلبية مش ايجابية, والاشخاص مفرطين التفكير مش بس بيستخدموا الكلمات للتفكير في حياتهم, لا كمان بيستحضروا صور الاحداث في مخهم كانهم شايفنها قدامهم, او يسترجعوا حدث مؤلم حصلهم كانه فيلم, وفي كل الاحوال التفكير في كل حاجة بيمنعهم انهم يتقدموا في حياتهم.

– التفكير زيادة عن اللزوم مش بس مجرد ازعاج وزحمة افكار, لكن كمان ممكن يسبب مشاكل صحية, والابحاث اثبتت انه ممكن يزود خطر الاصابة بمشاكل الصحة العقلية وهيحصل تراجع في صحتك النفسية, وهيفضل الشخص في حلقة مفرغة مش هيقدر يكسرها.

– اظهرت الدراسات كمان ان الافراط في التفكير بيخلي الشخص يتجه لاستراتيجية غير صحية للتكيف مع الوضع او للهروب من التفكير بوسيلة تانية زي زيادة التدخين مثلا, او الافراط في الاكل, يعني الشخص هيختار اي وسيلة ممكن تلهيه عن التفكير الزيادة.

– التفكير المفرط من اكتر سلبياته هو انه هيخلي الشخص مش هيعرف ينام لان في الغالب الافكار بتيجي وقت النوم, وبالتالي عقلك هيفضل صاحي ومش هيرتاح, والشخص في الحالة دي هينام ساعات اقل وده هينعكس بشكل سلبي على الصحة كلها بشكل عام.

– ازاي توقفي ال Overthinking:

1- لاحظي نفسك لما تفكري زيادة عن اللزوم:

التوعية هي الخطوة الاولى عشان نحط حد للتفكير المفرط, والاهتمام بالطريقة اللي بتفكري بيها, واول ما تلاحظي انك بدأتي تعيدي الاحداث في ذهنك وتكرريها او تقلقي من حاجات مش قادرة تتحكمي فيها, في اللحظة دي وقفي نفسك وتصارحي نفسك ان الافكار دي منتجة ومش ايجابية ومش هتستفادي منها حاجة.

2- اتحدي افكارك:

اتحدي افكارك واعترفي ان افكارك ممكن يكون مبالغ فيها اوي او انتي مدياها اكبر من حجمها, وحاولي تبعدي الافكار السلبية بقدر الامكان, واتعلمي انك تستبدلي الاخطاء او الافكار السلبية بافكار ايجابية, وده اكيد هيجي مع الوقت والتكرار.

3- ركزي على حل المشكلة:

التركيز على المشاكل غير مفيد بالمره, لكن حاولي تركزي اكتر على التفكير في حل للمشكلة, وابدأي فكري في خطوات حلها, وخدي الجانب الايجابي من المشكلة وشوفي ممكن تتعلمي ايه من مشكلتك عشان تتجنبيه في المستقبل ومتقعيش فيه تاني, او عشان تتجنبي مشكلة تانية مستقبلية.

4- حطي جدول زمني للتفكير:

التفكير في المشكلة لفترة طويلة اكيد مش مفيد وغير مثمر, لكن التفكير لفترة صغيرة فيها ممكن يكون مفيد, لان ده ممكن يساعدك انك توصلي لحل مناسب ليها, او يخليكي تحققي اداء افضل في المستقبل ومتقعيش في نفس الخطأ مرة تانية.

ادي لنفسك وقت زمني للتفكير في المشكلة وممكن تستخدمي قلم وورقة عشان تكتبي كل الحاجات اللي قلقاكي عشان تطلعي كل الافكار السلبية اللي جواكي وبعدها قطعي الورقة واتخلصي منها, واتنقلي لحاجة تانية والافضل يكون نشاط فيه متعة.

5- التمرين على تركيز الذهن:

اكيد التفكير في اللي حصل امبارح مش هيغيره, اوالقلق على المستقبل او بكره اللي لسه مش عارفينه هيفيدنا واحنا عايشين في الوقت الحاضر, عشان كده حاولي تمرني ذهنك على انك تكوني اكتر وعي, وده زي اي ممارسة محتاج تمرين ومع مرور الوقت, هتلاقي ان ال Overthinking بيقل.

6- غيري المسار:

في بعض الاحيان لو قولتي لنفسك انك لازم توقفي التفكير الزيادة بيحصل العكس وكل ما تحاولي تتجنبي الافكار انها تدخل لمخك هتلاقيها بتظهر في عقلك اكتر, عشان كده يعتبر احسن الطرق عشان تغيري المسار من التفكير الزيادة انك تشغلي نفسك بنشاط زي ممارسة الرياضة, الرقص, او تدخلي في محادثة مع شخص في موضوع مختلف تماما عن اللي بتفكري فيه, او تشغلي نفسك في مشروع او اي نشاط زي الرسم, الخياطة, تعلم مهارة او هواية جديدة ده هيكون كافي انه يبعد عقلك من التفكير في الافكار السلبية ويشغلك في حاجة تانية مفيدة.

7- التوقف عن انتظار الكمال:

كلنا بنبقى عايزين كل حاجة تبقى مظبوطة وصح اوي, وممكن نفكر في حاجات وطموحات كبيرة لكن المهم متكونش غير واقعية او غير عملية, او منهكة لتفكيرنا, مجرد ما تلاقي نفسك بتفكري “ان الحاجة دي محتاجة تكون مثالية او كاملة” في اللحظة دي محتاجة تفكري نفسك ان انتظار الكمال او المثالية مش طريقة تفكير ذكية, لكن الصح اننا نحقق تقدم في حياتنا حتى لو كان بخطوات بسيطة.

8- تغيير وجهة نظرك من الخوف:

سواء كنتي خايفة لانك فشلتي في الماضي, او خايفة انك تفشلي تاني, افتكري انه مش معنى انك فشلتي قبل كده او منجحتيش في حاجة معينة يبقى مش هتنجحي في كل مرة, وافتكري دايما ان كل فرصة هي بداية جديدة عشان تحاولي وتبدأي تاني من جديد.

9- اتقبلي نفسك:

التفكير المفرط غالبا بيكون بسبب عدم تقبل نفسنا, تفكري انك مش كويسة بشكل كافي, او مش ذكية بشكل كافي, او مش مجتهدة بما فيه الكفاية, لكن مادام انتي عملتي اللي عليكي وبذلتي اقصى جهد عندك يبقى في الحالة دي متلوميش نفسك انك وصلتي للنتيجة المطلوبة او اللي انتي عايزاها, واعرفي ان النجاح ساعات بيكون معتمد بشكل جزئي على حاجات احنا منقدرش نسيطر عليها او نتحكم فيها, المهم بس تعملي اللي عليكي.

10- خليكي شاكرة وممتنة:

خليكي ممتنة وشاكرة لكل اللي عندك, واستغلي وقتك بشكل ايجابي, ممكن كل يوم الصبح وبالليل تعملي قايمة للحاجات الكويسة اللي عندك او اللي حصلت لك خلال اليوم, وممكن تتبادلي القايمة دي مع اصحابك عشان يكون في حد شاهد على الحاجات الكويسة اللي حواليكي او في حياتك.

في النهاية ال Overthinking ممكن يحصل لاي شخص, لكن على الاقل تقدري تتجنبي الافكار السلبية والقلق, والتفكير المجهد وتحويله لحاجة مفيدة ومنتجة وفعالة وايجابية.