افضل 11 حيلة تعمليهم بالروج لشفايف جذابة

ريهام محمود
ريهام محمود
في
مكياج
8507

سواء كنتي عايزة تظهري شكلك شفايفك اكتر, او تديهم حجم اكبر, او تخلي شفايفك شكلها حلو وجذاب, ده كله هنعرفه النهاردة من خلال موضوعنا هنقولك على حيل بالروج لشفايف جذابة, وازاي تعملي كل حيلة خطوة بخطوة.

حيل بالروج لشفايف جذابة:

1- حافظي على الروج انه يخرج بره حدود الشفايف:

بيحصل لكتير مننا ان  الروج ممكن يسيح ويخرج بره حدود الشفايف وطبعا بيخلي شكل الشفايف سيء جدا, وعشان نتفادى المشكلة دي بحيلة بسيطة اوي, هنلاقي دلوقتي في محلات المكياج ماركات كتير منزلة قلم لتحديد الشفايف عشان يحافظ على الروج منه انه يسيح او يطلع بره الشفايف هنلاقيه باسم Barrier Pencil, او Lip Lock Pencil.

كل اللي هتعمليه هترسمي حدود الشفايف اللي تحت واللي فوق بالقلم وبعدين تحطي الروج بالطريقة العادية.

حيل بالروج لشفايف جذابة 1
حيل بالروج لشفايف جذابة 1

2- سكراب السكر للشفايف:

السكراب مهم جدا للشفايف لانه بيساعد على ازالة الجلد الميت, وترطيب الشفايف, وده هيخلي شفايفك دايما وردي وشكلها صحي والروج هيطلع عليها شكله احلى.

اخلطي كميات متساوية من عسل النحل, وزيت جوز هند سايح, وسكر بني او سكر ابيض عادي, قلبي المكونات مع بعض كويس, حطيه في التلاجة شوية عشان المكونات تتجمد مع بعضها, طلعيه قلبيه بالشوكة, وحطيه في اي علبة او برطمان عندك واحتفظي بيه في التلاجة, واستخدميه اعملي سكراب للشفايف مرة او مرتين في الاسبوع.

حيل بالروج لشفايف جذابة 2
حيل بالروج لشفايف جذابة 2

3- عشان تخلي الشفايف شكلها ممتليء:

عشان تتحكمي في حجم الشفايف هتلعبي بالالوان, لو عايزة تكبري الشفايف يبقى هتستخدمي هايلايت او كونسيلر بلون فاتح, لو عايزة تصغريها هتستخدمي لون غامق على حدود الشفايف.

وهنا هنكبرها يبقى هنستخدم لون فاتح نرسم بيه حدود الشفايف من بره, نبدأ الرسمة بتحديد قوس كيوبيد, وبعدين نمشي على باقي الشفايف, وندمج اللون على الشفايف بالصوابع, وبعدين نحط الروج.

حيل بالروج لشفايف جذابة 3
حيل بالروج لشفايف جذابة 3

4- سر شفايف كايلي جينر – كونتور الشفايف:

طبعا كل البنات بيحبوا شكل شفايف كايلي جينر وبيبقوا عايزين شفايفهم نفس الشكل, واحنا النهاردة بنقولك ان الموضوع بسيط جدا وجايبين لك السر وهو كونتور الشفايف.

هتستخدمي قلم تحديد شفايف اغمق درجة واحدة من لون الروج بتاعك, حددي بيه شفايفك كلها من بره, وبعدين تبدأي تعملي كونتور جوه الشفايف بالقلم ترسمي خطوط على الشفا اللي تحت واللي فوق زي ما هو باين في الصورة كده خطين عكس بعض في نص الشفايف اللي فوق, وبعدين خط على اليمين وخد على الشمال, وعلى الشفة اللي تحت خط في النص وجنبه خط على اليمين وخط على الشمال.

حيل بالروج لشفايف جذابة 4
حيل بالروج لشفايف جذابة 4

5- لون الروج المناسب ليكي حسب لون بشرتك:

كل يون بشرة ليها الالوان اللي تناسبها وتظهرها بشكل احلى, وزي ما احنا شايفين في الصورة كده كل لون بشرة قدامه افضل الوان الروج المناسبة ليه, شوفي لون بشرتك اي واحدة فيهم واعرفي اكتر الالوان اللي بتليق عليكي.

حيل بالروج لشفايف جذابة 5
حيل بالروج لشفايف جذابة 5

شوفي من هنا ازاي تختاري الوان الروج اللي تليق على لون بشرتك

6- رسم قوس كيوبيد:

عشان تظهري رسمة الشفايف وتحددي قوس كيوبيد, هترسمي بقلم التحديد على نص الشفايف عند قوس كيوبيد حرف “X”, وبعدين حددي الشفايف بالطريقة العادية, واملي الشفايف بالروج من اول نص الشفايف لحد الزاوية الخارجية.

حيل بالروج لشفايف جذابة 6
حيل بالروج لشفايف جذابة 6

7- ازاي تحطي الروج الاحمر بشكل مثالي:

اول حاجة اعملي تقشير للشفايف ممكن نستخدم طريقة السكراب اللي قولناها في البداية, عشان تتخلصي من اي جلد ميت وتخلي الشفايف ناعمة, بعدها حطي طبقة زبدة كاكاو خفيفة وسيبيها من 15 – 20 دقيقة وبعدين امسحيها بمنديل, بعدين حطي طبقة كريم اساس او كونسيلر على الشفايف وافرديها بصوابعك او بفرشة شفايف.

دلوقتي ابدأي حددي الشفايف بقلم التحديد بنفس الطريقة اللي في الصورة, ارسمي خطين عكس بعض على نص الشفايف على شكل حرف “X” وبعدين ارسمي حدود الشفايف من بره بالقلم, وبعدين املي الشفايف كلها من جوه بقلم التحديد, وبعدين حطي الروج, هاتي منديل واضغطي بشفايفك عليه.

لو انتي شفايفك رقيقة وعايزة تكبريها ممكن تضيفي خطوة كمان, حطي ملمع شفايف على المنطقة اللي في النص بس من الشفايف, وفي الاخر ممكن بالكونسيلر تظبطي حدود الشفايف لو خرج اي روج بره الشفايف وانتي بترسمي.

حيل بالروج لشفايف جذابة 7
حيل بالروج لشفايف جذابة 7

8- ازاي تحطي الروج بطريقة صح:

اول حاجة هنعمل سكراب للشفايف زي ما قولنا, هنحط زبدة كاكاو ونسيبها شوية وبعدين نمسحها بمنديل او بقطنة, حطي برايمر على الشفايف عشان تثبتي الروج لقترة طويلة, وممكن بديل للبرايمر تستخدمي كونسيلر او كريم اساس.

ارسمي بقلم التحديد على نص الشفايف اللي فوق حرف “X”, وبعدين حددي الشفايف كلها اللي فوق واللي تحت, وابدأي دايما التحديد من نص الشفايف لحد الزوايا الخارجية, بعدها املي الشفايف بالروج, وهاتي منديل واضغطي بشفايفك عليه, وفي الاخر بالفرشة نضفي حوالين الشفايف بالكونسيلر.

حيل بالروج لشفايف جذابة 8
حيل بالروج لشفايف جذابة 8

شوفي من هنا ازاي تحطي الروج السايل زي المحترفين بخطوات بسيطة

9- اعملي ليب جلوس في البيت:

ممكن تعملي ليب جلوس او ملمع شفايف في البيت بمكونات طبيعية, كل اللي هتحتاجيه زبدة شيا, زيت جوز هند, شمع عسل, واي نوع زيت عطري تختاريه عشان الريحة.

في بوله صغيرة او طبق, اخلطي 2 معلقة كبيرة شمع عسل مبشورة, مع 3 معالق كبيرة زبدة شيا, 2 معلقة كبيرة زيت جوز هند, نقطتين زيت عطري.

اخلطي شمع العسل مع زيت جوز الهند وزيدة الشيا وسيحيهم مع بعض في حمام مية سخنة, بعد ما يسيحوا ضيفي لهم الزيت العطري وقلبي المكونات مع بعض كويس, صبي الخليط في اي برطمان او علبة فاضية عندك وكده يبقى الليب جلوس جاهز عندك استخدميه على الشفايف.

حيل بالروج لشفايف جذابة 9
حيل بالروج لشفايف جذابة 9

10- تحديد الشفايف صح حسب شكل شفايفك:

– الشفايف الرقيقة:

استخدمي الوان الروج الفاتحة لانها بتبين شكل الشفايف اكبر وتخليها ممتلئة اكتر, وبالنسبة للتحديد ممكن ترسمي التحديد بره حدود الشفايف بشكل بسيط وناعم عشان تديها حجم اكبر.

– الشفايف الممتلئة:

لو انتي شفايفك ممتلئة طبيعي او كبيرة وعايزة تصغريها, يبقى هتعملي عكس الخطوات اللي فاتت, ارسمي التحديد جوه حدود الشفايف عشان تصغريها, واختاري الوان روج غامقة.

– الشفايف اللي تحت ممتلئة:

لو عندك الشفة اللي تحت بس هي اللي ممتلئة واللي فوق رقيقة, ممكن تستخدمي درجتين روج من نفس اللون, حطي على الشفة اللي تحت الدرجة الغامقة وعلى اللي فوق الدرجة الافتح, ارسمي التحديد على الشفة اللي تحت جوه حدود الشفايف عشان تصغريها, واللي فوق ممكن تسيبيها من غير تحديد او تحدديها بره حدود الشفايف شوية عشان تديها حجم اكبر وتتناسب مع الشفة اللي تحت.

– الفم الصغير:

لو الفم نفسه صغير, ممكن تخلي التحديد بره الزوايا الخارجية للشفايف عشان تكبريه, لكن خلي بالك ان الرسمة تطون بره الحدود بشكل بسيط وناعم مش مبالغ فيه عشان يبان طبيعي, وخلي التحديد بره حدود الشفايف كلها بشكل بسيط جدا.

– الشفايف المتحددة بشكل حاد:

لو شفايفك متحددة بشكل حاد اوي وقوس كيوبيد متحدد عندك بشكل طبيعي, ممكن تقللي منه بانك ترسمي بقلم التحديد بتدويرة شوية في نص الشفايف اللي فوق عشان تديها شكل انعم, وبعدين توسعي التحديد على باقي الشفايف.

– الشفايف اللي رسمتها مش متساوية:

احيانا بتكون الشفايف شكلها مش متساوي او في جزء اصغر من جزء, في الحالة دي بقلم التحديد ارسمي بره حدود الاماكن الاصغر عشان تديها حجم اكبر او تحدديها اكتر وتتناسب مع باقي الشفايف.

حيل بالروج لشفايف جذابة 10
حيل بالروج لشفايف جذابة 10

11- ازاي تخلي الروج يثبت طول اليوم:

اول حاجة اعملي سكراب للشفايف, حددي الشفايف بقلم التحديد, املي الشفايف بالروج, هاتي منديل اضغطي بشفايفك عليه, بالفرشة حطي لوس بودر على الشفايف, او ممكن تستخدمي بودرة عادية تاخدي منها صوابعك وطبطبي على الشفايف بالراحة, وبعدين حطي طبقة روج تانية.

حيل بالروج لشفايف جذابة 11
حيل بالروج لشفايف جذابة 11

اكتر الغلطات اللي بنقع فيها واحنا بنحط المكياج

غلطات المكياج
غلطات المكياج

مقالات متعلقه

ازاي تحطي الروج الغامق زي المحترفين للوك مكياج مثالي

ازاي تحطي الروج الغامق زي المحترفين للوك مكياج مثالي

7 حيل مكياج محتاجة تعرفيهم هتحسن مكياجك

7 حيل مكياج محتاجة تعرفيهم هتحسن مكياجك

خدعة فعالة بالآيلاينر ترفعي بيها الجفون المترهلة في 3 ثواني

خدعة فعالة بالآيلاينر ترفعي بيها الجفون المترهلة في 3 ثواني