5 علامات بتقول انك اكيد محتاجة Mental Break

مع  وجود الضغوطات علينا فى كل حتة سواء فى البيت او الشغل او ضغوطات الكلية و المذاكرة بيزيد الضغط العصبى علينا و كتر التفكير بيخلينا نبقى مجهدين و مش قادرين نعمل حاجة خلاص، ولما توصلى للمرحلة دى لازم تعرفى انك محتاجة تاخدى راحة و تفصلى شوية .. عايزة تعرفى ايه هى الحاجات اللى لما حصل لازم تاخدى Mental break ؟ اقرى معانا المقال ده ..

5 علامات بتقول انك اكيد محتاجة Mental Break

1- لو حسيتى انك عيانة باستمرار: 

لو الشهر اللى فات كان شهر تقيل و صعب عليكى و كمان تعبانه من تغيير الجو و بدأتى تكحى و جالك برد و الدنيا كلها متدربكة فوق دماغك يبقى دى علامة اساسية و مهمة جدا، الحاجات دى كلها ماحصلتش مع بعضها صدفة! ده معناه انه الاحداث اللى بتحصل كل يوم فى حياتك و كل المشاغل اللى وراكى خلاص ارهقت جسمك جدا و تعب جسمك ده معناه انه بيقولك ” خلاص انا تعبت و محتاج ارتاح” ، ليه ؟ لانه كل الضعوطات و كتر التفكير بيولد كمية كبيرة جدا  من الضغط اللى بيبدأ فى ارهاقك نفسيا ، و بعدين جسمك بيحول الضغط ده لضغط جسدى فى صورة تعب و ارهاق.  انك تلتزمى بجدول معين للنوم و تدى لعقلك و جسمك راحة ده أساسي جدا علشان تقدرى تكملى. 

2- لو متوترة جدا بسبب حاجة فى الماضى مخلياكى مش عارفة تركزى على الحاضر : 

طول ما احنا بنحاول ننجز مهام يومنا، بنفضل نفكر فى اى غلطة حصلت فى الشغل او حاجة اتسببت فى كل الضغط اللى موجود علينا دلوقتى، التفكير فى الغلطات او فى الماضى عموما بيخلينا نبقى محبطين و بيقلل من النشاط و العزيمة فبالتالى بنحس بالارهاق و اننا مش عارفين و لا قادرين ننجز الحاجات المطلوبة مننا، و الافكار دى بتفضل تهاجم عقلك كل شوية للأسف و تخطر على بالك. لما تاخدى Mental Break ده هيدى الفرصة لعقلك انه يرتاح وانك تنظمى افكارك و ترتبيها. 

3- لو حسيتى انك بتهملى فى نفسك : 

لو جدول يومك كله ضغوط و مافيهوش اى وقت لنفسك خالص فبداتى تفوتى الفطار علشان ماتتأخريش وانتى نازلة الصبح، وبعدين بقيتى تفوتى الغداء علشان عندك ميتنج  وماعندكيش وقت تروحى للكوافير او تقعدى تشربى قهوتك وانتى بتقرأى كتابك المفضل يبقى انتى كده بتهملى فى نفسك بشكل كبير، وده معناه انك لازم ترتاحى و تاخدى وقت بعيد عن الشغل تدلعى فيه نفسك و تهتمى بيها و بس.

• 4- لو تعبانة بس برده مش عارفة تنامى:

• مفيش طريقة ترتاحى بيها أحسن من انك تنامى، لكن بيبقى احساس وحش ومحبط جدا لما تبقى تعبانة ومرهقة بس مش عارفة تنامى برده، والأرق ده بيخليكى تقعدى تفكرى فى افكار مالهاش نهاية و بالتالى بتقعدى تفتكرى كل الحاجات اللى بتضايقك ، علشان كده لما تاخدى mental break  ده هيخليكى ترتاحى و تفصلى و تقدرى تنامى افضل. 

•  

• 5- لو على طول زعلانة : 

اوقات كتير بتبقى عواطفنا مسيطرة علينا و مابنقدرش نتجنبها او نتجاهلها، وده مش غلط لكن المهم انك تقدرى تحددى و تتعرفى على الحاجات اللى بتحسيها، ولازم تبدأى تحسي بالخطر لما تفضلى حاسة انك متضايقة او حزينة باستمرار و محبطة، فى الفترة دى لازم تفصلى خالص و تبدأى تتكملى عن مشاعرك دى و تتخلصى منها بانك تغيرى جو و تتبسطى علشان تتجنبى خطر انها تتحول لاكتئاب. 

اعرفى معانا كمان 11 علامة تحذر جسمك انك بتعاني من اجهاد شديد.. وازاي تعالجيه بطرق طبيعية