5 حاجات لازم تعرفها كل عروسة قبل ما تنزل تختار فستان الفرح

بقلمآية حسان فيموضة وأزياء visibility3009

مفيش شك انه مرحلة الجواز و التحضيرات للفرح هى اكتر مرحلة سحرية وفيها فرحة وأمل فى حياتك، ولكن ممكن تبقى كمان فترة تتسبب فى توتر و ضغط كبير عليكى بسبب كل التحضيرات و التجهيزات ،خصوصا البحث عن اهم و اكبر حاجة وهى فستان الفرح، وعلشان نسهل عليكى الامور و تبقى الفترة دى ممتعة اكتر من متعبة، فى المقال ده بنات حوا هتعرفك على 5 حاجات لازم تعرفها كل عروسة قبل ما تنزل تختار فستان الفرح .. 

5 حاجات لازم تعرفها كل عروسة قبل ما تنزل تختار فستان الفرح

1- افضل وقت تبدأى تنزلى تتفرجى فيه الفستان هو سنة قبل ميعاد الفرح : 

طبعا اول حاجة بتفكرى فيها بعد ما تتفقوا على كل حاجة و تحددوا ميعاد الفرح هى الفستان، مع اننا بننصحك لو كان لسه بدرى على الفرح انك تسيبيى التفكير فيه لبعدين و تستمتعى بفترة الخطوبة اكتر خصوصا لو كانت خطوبتك هتستمر أكتر من سنة ، لانه لو دورتى بدرى اوى هيبقى قدامك وقت طويل لسه و ده هيخليكى تترددى كتير و تشكى فى اختيارك، كمان موضة فساتين الافراح بتتغير كل 6 شهور علشان كده خليكى دايما متأكده انك اختارتى على احدث موضة، فاختيار الفستان قبل الفرح بسنة او 6 شهور هيديكى فكرة الموضة رايحة فين و ايه اللى ممكن يناسب ذوقك و جسمك. 

2- افضل وقت تبدأى تنزلى تشترى فيه الفستان هو سنة قبل ميعاد الفرح : 

فى حالة لو كنتى هتفصلى فستان الفرح او هيتعملك مخصوص ده معناه انك محتاجة تقررى شكل و موديل الفستان قبله بسنة بشكل نهائى! ايوة انتى قريتى صح، قبل الفرح بسنة  لانه تفصيل الفستان و  اختيار القماش و التطريز بيحتاج وقت طويل ممكن يوصل لـ 6 شهور او يعدى كمان ، ده فى حالة لو الفستان لسه هيتفصل او هيتشحن من بره البلد، لكن لو هتشتريه او تأجريه جاهز يبقى قبل الفرح بـ 3 شهور مثلا كويس أوى، لكن مهم انك تقيسى الفستان مرة كل شهر علشان وزنك وشكل جسمك ممكن يتغيروا قبل الفرح و يبقى فى وقت لو احتاجتى تعملى اى تعديلات .

3- احجزى بدرى : 

فساتين الافراح زى ما قلنا بتحتاج وقت و تجهيزات و ممكن الفستان اللى يعجبك و عايزة تشتريه او تأجريه يبقى محجوز و محتاج وقت ، علشان كده بنتكلم انه الفترة من 3 لـ 6 شهور قبل الفرح معقولة و مهمة ، حاولى تختارى فستان و تحجزيه بدرى علشان يبقى فى وقت تعملى اى تعديلات فيه زى ما تحبى. 

4- استغلى الوقت فى انك تعرفى المحلات الموجودة حواليكى علشان تقررى مين افضلهم : 

فساتين الافراح كتيرة و متنوعة و موديلاتها مابتخلصش، علشان كده مهم انك تدرسي جسمك و تعرفيه كويس قبل ما تقررى تنزلى تشترى الفستان  او تأجريه، خدى وقتك فى انك تظبطى جسمك لو شايفة انك محتاجة ده و ابدأى لفى على المحلات و الـ bridal shops  من حواليكى علشان تشوفى ايه هى الـ options المتاحة و تقدرى تحددى اذا كان ممكن تختارى من الموجود او هتضطرى تفصلى الفستان او تجيبيه من مدينة او مكان تانى. مهم انك تستغلى الوقت فى انك تعرفى المحلات الموجودة فى محيطك. 

5- الـ Bridal shops بيبقى عندها عينات من الفساتين، مش الفستان الحقيقي اللى هتشتريه : 

خدى بالك انه الفستان اللى هتروحي تقيسيه او تختاريه من الـ bridal shop  اللى استقريتى عليه مش هيبقى هو الفستان اللى هتستلميه، لانه المحلات بيبقى موجود فيها عينات لكن مش الفساتين الحقيقية، فلما تيجى تستلمى الفستان بتاعك لازم تقيسيه تانى اكتر من مرة فى اوقات مختلفة و تتأكدى من كل تفاصيله انها مطابقة للفستان اللى قيستيه فى اول مرة . 

نتمنى تكون نصايحنا فادتك .. والف مبروك يا عروسة :) ، اعرفى معانا كمان روتين العروسة قبل الفرح