اسئلة مثيرة للاهتمام تسأليهم لحبيبك هتعرفك على شخصيته اكتر

ريهام محمود
ريهام محمود
في
حب
408005

بالرغم من الحب والتواصل اللي بيكون بين اي اتنين مرتبطين, لكن بنبقى طول الوقت عايزين نعرف اكتر عن الشخص اللي بنحبه ونقرب من شخصيته اكتر, والنهاردة هنقول لكل بنات حوا اسئلة تسأليها لحبيبك عشان تعرفيه اكتر, ما بين الاسئلة التقليدية او الرومانسية او حتى اسئلة مضحكة ومرحة, بس هتعرفك عليه وتقربك من شخصيته اكتر, تعالوا نعرفها مع بعض.

اسئلة تسأليها لحبيبك عشان تعرفيه اكتر:

1- هل بتحب التنضيف؟

هل بتنضف بيتك او اوضتك؟ السؤال ده هيخليكي تعرفي هل هو في المستقبل ممكن يكون شخص متعاون ولا لا, وشخص نضيف ومنظم ومرتب وبيحب النضافة ولا لا يعني هتعرفك عاداته اتجاه النضافة شكلها ايه.

2- هل بتشخر وانت نايم :D ؟

طبعا السؤال ده مهم جدا عشان تهيئي نفسك لكل عيوب الشخص اللي هتعيشي معاه ومتتفاجأيش بحاجة.

3- من ليه الاولوية عندك؟ عيلتك ولا اصحابك؟

ومتحطيش نفسك في السؤال ده او في مقارنة مع حد من القريبين منه, لان ممكن الاجاية متبسطكيش, والسؤال ده هيعرفك اذا كان هو بيميل اكتر لبيته وعيلته وبيهتم بيهم ولا بيهتم باصحابة اكتر وليهم الاولوية في حياته.

4- تحب تمتلك ايه اكتر؟ الفلوس ولا الاحترام؟

وهنا اكيد اتمني ان اجابته تكون الاحترام لان لو الفلوس اعرفي انه شخص مادي وممكن يتنازل عن كرامته واحترامه لنفسه قصاد الفلوس.

5- ازاي ممكن تقنع اهلي بجوازنا؟

واجابته على السؤال ده هتعرفك طريقته في حل المشاكل.

6- توصف كلمة الحب بايه؟

هتقدري تعرفي مفهومه عن الحب عامل ازاي هل بالافعال, ولا بالكلام الحلو وبس, هتقدري تعرفي ازاي بيعبر عن مشاعره.

7- ايه رايك في ذوق اللبس دلوقتي؟

هتقدري تعرفي اختياراته في اللبس وايه المفضل بالنسبة له.

8- ايه احلامك للمستقبل؟

من هنا هتقدري تعرفي هو انسان طموح ولا لا, وطموحه واصل لحد فين.

9- ايه اهم حاجة بالنسبة لك حققتها في حياتك؟

هتقدري تعرفي ايه الحاجة المهمة بالنسبة له او ايه اكتر حاجة ممكن تكون ليها قيمة في نظرة, ولازم انتي تحاولي تقدري الحاجات دي حتى لو بسيطة.

10- ايه نوع الكتب اللي بتحب تقراها؟ او الفيديو جيم اللي بتحبه؟

السؤال ده اكيد هيساعدك تعرفي شخصيته اكتر من انواع الكتب اللي بيقراها, او حتى الالعاب اللي بيحبها.

اسئلة تسأليها لحبيبك عشان تعرفيه اكتر 1
اسئلة تسأليها لحبيبك عشان تعرفيه اكتر 1

11- مين هو صديقك المفضل؟

هتقدري تعرفي بيختار اصحابه على اي اساس من خلال اجابته ليه هو اختار الشخص ده بالذات صديقة المفضل.

12- هل بتؤمن بالحب من اول نظرة؟

لو انتوا الاتنين حبيتوا بعض من اول نظرة يبقى في الحالة دي متسأليش السؤال ده, لان خلاص اجابته هتبقى معروفة بالنسبة لكم انتوا الاتنين.

13- هتعمل ايه لو لقيت نفسك من غير شغل فجأة؟

شوفي هل عنده خطط احتياطية للازمات المفاجئة ولا لا.

14- ايه رايك في سن الجواز؟ هل تحب الجواز يبقى في سن صغير؟

اعرفي هل بيحب الجواز في سن صغير او متأخر وليه, عشان تعرفي طريقة تفكيره.

15- ايه رايك في نظام الطبقات في مجتمعنا؟

هنا هتعرفي من خلال اجابته هل هو طبقي ولا بيكره الطبقية وشايف ان كل الناس لازم يبقوا متساويين في المعاملة بغض النظر عن طبقتهم الاجتماعية.

16- ايه اول فيلم شوفته في حياتك في السينما؟

هنا هتقدري ترجعي لذكريات طفولته او مراهقته وتعرفي عنها اكتر.

17- قولي لحظة اضطريت تكدب فيها على اهلك او اصحابك عشان تنقذ نفسك؟

اكيد هتعرفي من خلال اجابته على السؤال ده ايه الموقف اللي ممكن يخليه يكدب عليكي.

18- هل حبيت وانت في المدرسة؟

والسؤال ده بردو هيرجعك لذكريات طفولته ومراهقته, وبصي على وشه وابتسامته في الاجابة على السؤال ده هتعرفي منها كانت تجربة حلوة ولا لا.

19- ايه اول شغل اشتغلته, وازاي غيرته؟

ده اكيد هيعرفك على حياته اكتر وعمل فيها ايه بالتفصيل.

20- ايه اسوأ شغل او وظيفة اشتغلتها؟

هتقدري تعرفي اللي مر بيه في حياته, وهل هو مبسوط بالتجربة بردو بالرغم من صعوبتها ولا لا.

اسئلة تسأليها لحبيبك عشان تعرفيه اكتر 2
اسئلة تسأليها لحبيبك عشان تعرفيه اكتر 2

21- ايه اكتر لحظة حسيت فيها بالاحراج في حياتك؟

هتقدري تعرفي بردو اكتر عن شخصيته, وايه اللي ممكن يسبب له حرج.

22- بتتعامل ازاي مع الوضع لما تكون حزين؟

هتقدري تعرفي في لحظات حزنه ممكن يعمل ايه, وهل بيستسلم للحظات حزنه ولا بيقدر يتخلص منها بشكل ايجابي.

23- ايه اكتر شخصية من فيلم مفضلة عندك, وتتمنى تبقى شبهها في حياتك الواقعية؟

هتقدري تعرفي قدوته او حابب يكون شبه مين.

24- لو انت مش بتشتغل وظيفتك دي كنت حابب تكون ايه؟

لو هو مهندس او دكتور او محاسب او ايا كانت وظيفته اساليه لو هو مكنش بيشتغل في الوظيفة دي كان يحب يكون ايه.

25- ايه الهدف الاكبر في حياتك؟

اكيد هتتمني في اللحظة دي ان اكبر هدف في حياته هو “انتي” J وانكو تبقو مع بعض في بيت واحد.

26- لو فوزت بمبلغ كبير او باليانصيب, هتعمل ايه بالفلوس؟

هتعرفي من اجابته تفكيره الاقتصادي عامل ازاي, وممكن يستثمر فلوسه في ايه.

27- ايه اكتر مكان بتحب تروحه؟

ممكن انتي المره اللي بعدها تخططي لفسحه للمكان ده وتفاجئيه.

28- هل بتحب تطبخ؟ وايه اكتر اكله بتحب تعملها؟

هتعرفي في المستقبل ممكن يساعدك ولا لا, او ممكن يريحك يوم ويعملك هو الاكل ويفاجئك.

29- هل مرتاح في شغلك؟

هتقدري تعرفي هل هو مرتاح ومستقر في وضعه اللي هو فيه ومبسوط ولا لا.

30- ايه اسوأ حاجة عملتها مع حد بتحبه عشان يرجعلك؟

لو هو كان مرتبط قبل كده ومصارحك بده, اكيد هتعرفي من اجابة السؤال ده هو ممكن يعمل ايه لو حصل نفس الوقف معاكي.

اسئلة تسأليها لحبيبك عشان تعرفيه اكتر 3
اسئلة تسأليها لحبيبك عشان تعرفيه اكتر 3

31- متخيل حياتك ازاي من غيري؟

ولازم تأكدي عليه وانتي بتسأليه السؤال ده انه يقولك الحقيقة مش مجرد كلام مجاملة او كلام وخلاص.

32- ايه اكتر حاجة عجبتك فيه؟ وليه؟

وخليكي مستعدة لاي اجابة هيقولها وانك تعرفي الحقيقة مش مجرد كلام يرضيكي وخلاص.

33- متخيل مستقبلك مع مين؟

وطبعا هنا اكيد هتنتظري ان اسمك يتقال وانه يكون شايف مستقبله معاكي انتي, عشان تتأكدي من حبه ليكي.

34- ايه رأيك في البنت اللي بتشتغل بعد الجواز؟

من الاجابة دي هتقدري تعرفي حالتك بعد الجواز هل هو مؤيد للشغل ولا لا.

35- هل في اي وقت عرفت اتنين مع بعض؟

اعتقد اغلب الرجالة عملوا كده ولو مره في حياتهم :) , وطبعا هتعرفي هل هو ممكن يكون خاين ولا دي كانت مجرد غلطة مرة واحدة في حياته وخلاص.

36- هل ممكن تسامح اي شخص او تسامحني لو كدبت عليك؟

طبعا هنا لازم تأكدي له ان انتي مش في نيتك تكدبي عليه في اي حاجة, بس اجابته هتقولك هل هو شخص مبيحبش الكدب حتى لو في حاجة بسيطة او صغيرة وانه صعب يسامح الشخص اللي بيكدب.

37- مين اكتر نموذج او شخص ملهم ليك في حياتك؟

هنا اكيد هتعرفي اكتر عن طريقة تفكيره.

38- هل الفلوس بالنسبة لك كل حاجة؟ وليه؟

طبعا ده سؤال بردو هتقدري تعرفي منه هل هو شخص مادي ولا لا.

39- ايه اكتر حاجة ندمت عليها في حياتك؟

هتقدري تعرفي هل بيندم على ابسط الحاجات الغلط وبيأنب ضميره ولا لا, ولا مش كل حاجة غلط ممكن يندم عليها, لان الندم في حد ذاته شعور كويس ان الانسان يحس بيه لما يغلط.

40- لو عندك فرصة تصحح غلطة واحدة عملتها في حياتك هتختار ايه؟

هتقدري تعرفي هل غلطاته واخطائه كتير ولا لا, وهل في حاجات كتير محتاج يصححها.

اسئلة تسأليها لحبيبك عشان تعرفيه اكتر 4
اسئلة تسأليها لحبيبك عشان تعرفيه اكتر 4

نصايح ازاي تعبري لحد عن مشاعرك وتعرفيه انه مهم في حياتك

نصايح ازاى تعبرى لحد عن مشاعرك وتعرفيه انه مهم فى حياتك
نصايح ازاى تعبرى لحد عن مشاعرك وتعرفيه انه مهم فى حياتك

مقالات متعلقه

50 سؤال تسألهم لحبيبتك عشان تعرفها بشكل افضل

50 سؤال تسألهم لحبيبتك عشان تعرفها بشكل افضل

ازاي تخلي شريكك يفتقدك ويقدرك اكتر

ازاي تخلي شريكك يفتقدك ويقدرك اكتر

صفات المرأة المثالية اللي دايما بيقدرها الرجل ويحب وجودها في شريكة حياته

صفات المرأة المثالية اللي دايما بيقدرها الرجل ويحب وجودها في شريكة حياته