11 عادة صباحية لو عملتيهم كل يوم هيغيروا حياتك

ريهام محمود

في

7551

روتينا الصباحي او الحاجات اللي متعودين نعملها كل يوم الصبح ليها تأثير على باقي يومنا بشكل سلبي او ايجابي حسب احنا الروتين بتاعنا عامل ازاي, وممكن تحدد اذا كان هيبقى يومنا حلو ولا لا, والنهاردة هنقولك عادات صباحية هتخلي يومك احلى لو خلتيها من روتينك اليومي.

عادات صباحية هتخلي يومك احلى:

1- اصحي بدري:

يعتبر وقت الشفق اللي بيكون قبل الشروق يعني وقت الفجر هو افضل وقت للصحيان, لانه بيكون الوقت ده هادي جدا ولسه شروق الشمس بيبتدي يطلع, وهيبقى عقلك في حالة هدوء وتهيئة لاستقبال اليوم الجديد, كمان الصحيان بدري هيخلي عندك اليوم كله قدامك تقدري تنجزي فيه كل المهام اللي وراكي, وده هيخلي جسمك منتظم وبيتخلص من السموم اول بأول, والصحيان بدري كمان بيساعد على تطهير الامعاء من السموم.

2- مضمضة الزيت:

الطريقة دي تعتبر من الطرق القديمة جدا اللي كانت بتستخدم لطرد السموم من الجسم, خدي معلقة زيت كبيرة ويفضل زيت جوز هند, او زيت السمسم, اعملي مضمضة بالزيت في الفم كله لمدة 15 دقيقة, وبعدين اتخلصي من الزيت واتأكدي انك متبلعيش منه حاجة, والطريقة دي تتعمل يوميا قبل غسل الاسنان بالمعجون او اي غسول اسنان.

3- سكراب اللسان:

بعد المضمضة بالزيت, اعملي سكراب للسان ممكن باستخدام فرشة الاسنان, او بالكاشط البلاستيك او الستيل المخصوص للسان وده هنلاقيه في الصيدلية, وتنضيف اللسان بيساعد على التخلص من ريحة الفم الكريهة, بعد تنضيف اللسان اغسلي اسنانك بالمعجون بالطريقة العادية.

4- اشربي كوباية مية دافية مع الليمون:

شرب كوباية مية دافية مع عصير الليمون او شرايح الليمون كل يوم الصبح على الريق بتساعد على تليين الاجزاء الداخلية للجسم, وده هيخلي الجهاز الهضمي مستعد لاستقبال الاكل, وممكن تزودي للمشروب معلقة عسل ابيض لو عايزة تخسسي وزنك.

5- اعملي استرتشينج للجسم:

كل يوم الصبح اعملي استرتشينج او تمدد للجسم لمدة 5 دقايق بس, ده هيساعد على تنشيط العضلات ويخليها مستعدة لليوم, وممكن تمارسي يوجا, او تمشي على مجموعة تمارين روتينيه يومية لو انتي عايزة تخسسي وزنك.

6- مساج الجسم:

مساج الجسم يعتبر علاج لتحفيز الدورة الدموية والتخلص من الخلايا الميتة, باستخدام فرشة على جلد جاف اعملي مساج للجسم بحركات دائرية صغيرة وبطيئة, ابدأي من القدمين, واطلعي على الساقين ومنطقة الوسط, وبعدين على منطقة الذراعين وتنتهي بالكتفين, وفي الاخر منطقة الضهر, والمساج يكون في اتجاه القلب ضروري جدا, وبعدين تاخدي شاور هتلاحظي التغيير والفرق بعد المساج, والطريقة دي كمان بتخلص الجسم من السيلوليت.

7- فطار صحي:

الفطار الافضل انه يكون بسيط وصحي, ممكن تشربي مشروب ديتوكس سموزي, او تاكلي طبق شوفان, لان الفطار هو اللي بينشط وظايف المخ وبيهيئه ويخليه مستعد لليوم, عشان كده ضروري جدا اننا منفوتش او نهمل وجبة الفطار, لان ده هيخلي الجسم ناقصة الفيتامينات والمعادن الاساسية اللي محتاجها خلال اليوم عشان يأدي مهامه.

8- اسمعي موسيقى خفيفة:

ابدأي يومك مع موسيقى خفيفة لانها هتخلي يومك احلى وهتساعد على تحسين المود, وتخليكي مستعدة لليوم بشكل افضل بكتير.

9- مارسي التأمل:

انك تخلي عقلك صافي وتخلي مستويات الاجهاد تحت السيطرة دي طريقة كويسة جدا لبداية اليوم, واللي هيساعدك في ده انك تشغلي موسيقى هادية وتمارسي التأمل, او تسترخي من غير موسيقى يعني اختاري اللي تفضليه اكتر, حاولي تاخدي وضعية مريحة في مكان هادي وتغمضي عينك مع التنفس ببطء وتدوري على السلام الداخلي جواكي, وده ممكن تعمليه قي 10 دقايق كل يوم الصبح.

10- ابتسمي لنفسك:

بصي في المرايا وابتسمي لنفسك ابتسامة كلها ثقة العادة دي كل يوم من الطرق الفعالة جدا اللي بتزود الثقة في النفس, ولو بدأتي العادة دي بشكل يومي اتأكدي انك مش هتبطليها وهتفضلي مستمرة عليها على طول, وهتحسي بتغيير كبير في يومك لانها هتنقل للعقل مشاعر وطاقة ايجابية.

11- اعملي قايمة باهم 3 حاجات:

لو انتي يومك مشحون ووراكي حاجات كتير وحاسه ان ممكن حاجة منهم تقع منك, اعملي قايمة صغيرة بأهم 3 حاجات اللي ليهم الاولوية عندك وعايزة فعلا تعمليهم في اليوم ده, بمجرد ما تمشي على العادة او الروتين ده بشكل يومي هتلاقي نفسك بتنجزي حاجات اكبر من اللي انتي كتباها في القايمة.