اكتر الغلطات اللي بنقع فيها واحنا بنحط المكياج

ريهام محمود

في

6242

بيحصل في اوقات كتير بعد ما بنحط المكياج بنبص للوك النهائي بنلاقيه مش مظبوط او فيه حاجة غلط ومش بنعرف ايه الغلطة اللي ممكن نكون عملناها وطلعت المكياج في النهاية بشكل مش حلو, عشان كده النهاردة هنقول لكل بنات حوا اكتر غلطات المكياج اللي ممكن نكون بنقع فيها واحنا مش واخدين بالنا.

غلطات المكياج:

1- درجة كريم اساس غلط:

من اول الغلطات اللي ممكن نكون بنقع فيها, هو اختيار درجة كريم اساس غلط وده ممكن يدمر مكياجك كله لان كريم الاساس يعتبر هو اساس المكياج كله ولو اختارتيه غلط المكياج كله هيطلع مش مظبوط, عشان كده مهم جدا اختيار الدرجة المناسبة للون بشرتك واللي المفروض تكون نفس لون البشرة بالظبط, ولما تيجي تشتريه اعملي تيست للون على الرقبة او خط الفك مش على الايد عشان تجيبي الدرجة مظبوطة.

شوفي من هنا انواع كريم الاساس المناسبة لكل بشرة وازاي تحطيه صح.

2- تطبيق كريم الاساس على جلد مجهد:

لو بتستخدمي اغلى واحسن ماركات كريم الاساس لو على جلد مجهد وجاف هيطلع على البشرة بشكل سيء ومقشر واحمرار وبثور, عشان كده مهم ترطبي بشرتك وتهتمي بيها حتى لو بشرتك دهنية جدا بردو محتاجة ترطيب بس استخدمي لها كريم مرطب مناسب ليها, واستخدمي كمان نوع كريم الاساس المناسب لبشرتك, ده كمان بينطبق على الروج عشان يطلع بشكل حلو لازم تهتمي بتقشير الشفايف بشكل منتظم, ممكن تستخدمي خليط من السكر والعسل الابيض وتدلكي بيه الشفايف واغسليه وحطي بعدها زبدة كاكاو عشان تحافظي عليها رطبة وناعمة.

شوفي من هنا انواع الكريمات المرطبة المناسبة لكل نوع بشرة.

3- نتف الحواجب زيادة عن اللزوم:

نتف الحواجب او تنضيفها وشيل الشعر زيادة عن اللزوم وتبقى الحواجب رفيعة اوي دي من الغلطات اللي كتير مننا بيقعوا فيها, وده ممكن يأثر على الحواجب ويوقف نموها ويخليها متطلعش تاني, وفي الحالة دي هتبقي مضطرة انك ترسميهم على طول بالمكياج, عشان كده الافضل انك تنضفي الحواجب بشكل طبيعي مش مبالغ فيه وتختاري الشكل المناسب لشكل وشك.

شوفي من هنا رسمة الحواجب المناسبة لشكل كل وش.

4- تطبيق الماسكارا بشكل مش دقيق:

مافيش اسوأ من اللي بتتسمى في عالم المكياج برموش العنكبوت وبتبان الرموش ملزقة في بعض وشكلها مش منظم, عشان كده لازم نهتم بخطوة الماسكارا ونحطها بعناية جدا, ومننساش كمان ان الماسكارا زي اي منتج مكياج ليها فترة صلاحية بتنتهي فيها يعني منفضلش نستخدم الماسكارا لحد ما تنشف ممكن تكون شغالة وكويسة بس فترة صلاحيتها منتهية في الحالة دي لازم توقفي استخدامها وتتخلصي منها لانها ممكن تضر رموشك, يعني تقريبا متستخدميهاش لو مر عليها عندك اكتر من 6 شهور, او لو شكل فرشتها اتغير وباظت في الحالة دي ممكن تغيري الفرشة لو لسه صلاحيتها شغالة.

5- قلم تحديد الشفايف اغمق من الروج:

استخدام قلم تحديد شفايف اغمق من لون الروج من الغلطات اللي بنات كتير بيقعوا فيها, الصح ان لون قلم التحديد يكون نفس درجة الروج, او استخدمي قلم بألوان باستيل اللي هي بتكون بألوان فاتحة زي الخوخي والوردي الشاحب, وممكن تستخدمي بدل التحديد Pencil Corrector عشان تحافظي على الروج او الملمع من انه يسيح او يطلع بره حدود الشفايف.