افكار رومانسية لكل زوجين تجددوا بيهم حياتكم الزوجية
مع الوقت وضغوط الحياة اي حياة زوجية معرضة انها توصل لحالة ملل بين الزوجين, وعشان تكسروا حالة الملل دي وتجددوا الحياة الزوجية محتاجين تعملوا شوية تغيير في حياتكم ولو بحاجات بسيطة, والنهاردة هنساعدك في المهمة دي وهنقولك على افكار رومانسية لكل زوجين هتجدد حياتكم الزوجية.
افكار رومانسية لكل زوجين هتجدد حياتكم الزوجية:
1- اتفرجوا على فيلم رومانسي:
لو قعدين مع بعض في البيت ومش بتتكلموا او مافيش رغبة للكلام بينكم, ممكن بدل ما الوقت يبقى ممل تفكروا تتفرجوا على اي فيلم رومانسي مع بعض, هتقضوا وقت حلو وهادي وفي نفس الوقت هتكسروا الملل.
2- قطع ورق بحاجات رومانسية:
ممكن تلعبوا بسيطة اوي, قطعي ورق قطع صغيرة وتكتبي على كل ورقة حاجة معينة هو يعملها, يعني مثلا قبلات في اماكن مختلفة, او حضن, وهكذا اي حاجة انتي حابه تكتبيها, وحطي الورق في شنطة حمرا صغيرة, وخليه يسحب ورقة, واللي يطلع في الورقة يعمله وهكذا.
3- خصصوا وقت تسمعوا فيه بعض:
ممكن تحددوا تاريخ او وقت معين تقعدوا مع بعض قعدة هادية تشربوا حاجة وتتكلموا وتسمعوا بعض وكل واحد فيكم يسمع افكار ومشاعر التاني, وممكن تقعدوا في البيت او في مكان بره يعني حسب ظروفكم وامكانياتكم.
4- فاجئيه لما يرجع من الشغل:
ممكن تكتبي ورقة او كارت صغير عليه كلمات حب او اي كلام حلو رومانسي انتي حابه تكتبيه مع قبلة اخر الكلام, وتحطيه في اي مكان هو هيشوفه او ما يدخل البيت, او تحطيه في اوضة النوم.
5- برطمان الحب:
هاتي اي برطمان عندك وجيبي شوكولاتة مثلا, وهاتي ورق اكتبي على كل واحدة منهم حاجة رومانسية, او انك سعيدة انك معاه, او تكتبي مميزاته اللي بتحبيها فيه, وتلفي كل ورقة بشريط صغير وتحطيهم في البرطمان مع الشوكولاتة او ممكن تحطي الورق جوه الشوكولاتة نفسها ولما يجي يفتحها ياكلها هيتفاجأ باللي جواها.
6- عشا على ضوء الشموع:
ممكن تعملي عشا على ضوء الشموع في البيت, دي من اكتر الافكار الرومانسية اللي ممكن تعمليها عشان تعبري عن حبك لشريك حياتك.
7- فاجئها في عيد ميلادها:
ممكن في عيد ميلادها تفاجئها ببوكس مليان ببالونات الهيليوم مع شوكولاتة وشموع وورد احمر, ومعاهم هدية هي كان نفسها فيها.
8- اعملي كتاب قوليله/قولها سبب حبكم:
الفكرة دي ليكم انتوا الاتنين ممكن تنفذوها, ممكن تجيبوا نوت بوك كل واحد يكتب فيها سبب حبوا للتاني وليه هو سعيد معاه في حياته ويقدمها لشريكه, دي تعتبر هدية مثالية جدا وكمان هتركز على الحاجات الحلوة اللي كل واحد بيحبها في التاني مش عيوبه.
9- شاور رومانسي:
ممكن تاخدوا مع بعض شاور رومانسي, زيني الحمام بالورد والشموع عشان تعملي جو حلو وتقضوا وقت رومانسي مع بعض.
10- ابعتي له مسج وهو في الشغل:
ممكن وهو في الشغل تحسسيه انك بتفكري فيه ومستنياه يرجع البيت, وتبعتي له مسج فيه كلمات حلوة او تقولي له انك مستنياه يرجع لانه وحشك, او تبعتي كلمة بحبك بس, يعني كل واحدة تكتب اللي هي تحبه وعايزة تقوله في الوقت ده.
11- روحوا في مكان مقابلتكم الاولى:
ممكن تسترجعوا ذكريات حبكم مع بعض وتروحوا المكان اللي قابلتوا فيه بعض اول مرة, وتفتكروا ازاي اتعرفتوا على بعض وحبيتوا بعض.
12- اعملها مفاجأة:
ممكن تعملها فكرة رومانسية تفاجأها بيها وتبسطها تاخدها تتمشوا, وتكون انت مجهز في اي مكان هادي بالاتفاق مع حد قريب منكم يساعدم في تجهيز المفاجأة, قعدة رومانسية مع عشا في جو رومانسي هادي على ضوء الشموع.
13- اعملوا شوبنج لبعض:
اكيد الشوبنج متعة كل البنات والستات, لكن جربوا بدلوا الادوار واعملوا شوبنج لبعض, يعني انتي اعملي له شوبنج واشتري له الحاجات اللي نقصاه وفاجئيه بيها, وانت كمان اعملها شوبنج واشتري لها حاجات انت عارف انها عايزاها او محتاجاها دي هتعتبر اكبر واحلى مفاجأة ليها وهتسعدها وتبسطها جدا.
14- ارقصوا سوا:
لو عايزة فكرة رومانسية وجو مرح في نفس الوقت, ممكن تشغلوا في البيت اي موسيقى وترقصوا مع بعض, هتقضوا وقت حلو وممتع في نفس الوقت, وهتعلموا جو Fun مختلف هيكسر الروتين.
15- اعملي له/لها مساج:
ممكن بالليل بعد يوم طويل ومتعب تعملي له مساج عشان تريحيه من ارهاق اليوم, وتأكدي ان هيحب ده وهيقدره منك جدا, وممكن تعملي ده كمان في اجازة نهاية الاسبوع بشكل مختلف وبجو رومانسي اكتر, والفكرة دي اكيد ليكي وليه.
16- قدمي له/لها الفطار في السرير:
من الافكار الرومانسية اللي هتبسط اي طرف لو التاني عملها انه ممكن في يوم من باب التغيير وكسر الروتين, قدم لها او قدمي له الفطار السرير مع ورد وممكن كارت عليه كلمات حب, والفكرة هتبقى حلوة في الويك اند في يوم اجازة عشان تبقى احلى اكيد.
10 حاجات لازم كل اتنين متجوزين يعملوها هتزود الحب بينهم
