المشاكل الصحية اللي ممكن تحصلك لو نمتي كتير زيادة عن اللزوم

ريهام محمود
ريهام محمود
في
صحة
1452

النوم اكيد مهم جدا للصحة, والنوم السليم بيساعدك انك تكوني مركزة ومنتبهه كويس خلال فترة النهار, والنوم يعتبر اعادة شحن للجسم في فترة الليل عشان يقدر يمارس نشاطه بالنهار, والنوم السليم كمان بيساعد على محاربة السمنة, ومرض السكر, وامراض القلب, والوفاة المبكرة, ولكن مش معنى ده اننا ننام ساعات نوم زيادة او بشكل مبالغ فيه, النوم السليم مهم جدا لصحتك لكن النوم الزيادة ممكن يسبب مشاكل صحية, والنهاردة من خلال موضوعنا هنعرف ايه المشاكل اللي بيسببها النوم الزيادة.

ولازم نعرف الاول ان لو انتي بتحسي بحالة نعاس او كسل مفرط وبتنامي زيادة عن اللزوم دي ممكن تكون علامة لمشكلة صحية, ممكن تكون سبب التعب المزمن, مشاكل الغدة الدرقية, امراض القلب, انقطاع التنفس اثناء النوم, الاكتئاب, تأثير جانبي لبعض الادوية اللي ممكن تكون بتسبب النوم.

دلوقتي تعالوا نعرف المشاكل اللي بيسببها النوم الزيادة:

1- مشاكل القلب:

لو بتنامي عدد ساعات نوم كتير ده ممكن يأدي لخطر اكبر للاصابة بأمراض القلب, واللي تعتبر واحدة من الاسباب الرئيسية للوفاة, واثبتت واحدة من الدراسات اتنشرت في المجلة الامريكية لامراض القلب ان النوم لوقت طويل بيزود من خطر تطور كتلة البطين الايسر وبتخليه اكتر سمك, وده بيزود من خطر امراض القلب.

ودراسة تانية تمت في علم الاعصاب, اثبتت ان النوم الطويل ممكن يزود خطر الاصابة بالسكتة الدماغية بنسبة 46%, مع خطر الاصابة بامراض القلب والاوعية الدموية.

المشاكل اللي بيسببها النوم الزيادة 1
المشاكل اللي بيسببها النوم الزيادة 1

2- السمنة او زيادة الوزن:

في علاقة مباشرة ما بين السمنة او زيادة الوزن والنوم عدد ساعات طويلة, لان الجسم بيكون مش نشط لمدة طويلة, والنشاط البدني القليل معناه حرق سعرات حرارية اقل, واللي بدورها هتأدي لزيادة الوزن.

واثبتت الدراسات ان النوم اكتر من 8 ساعات بيرتبط ارتباط مباشر مع خطر الاصابة بالسمنة, والسكر, وارتفاع ضغط الدم, وامراض القلب والاوعية الدموية.

المشاكل اللي بيسببها النوم الزيادة 2
المشاكل اللي بيسببها النوم الزيادة 2

3- زيادة خطر الاصابة بمرض السكر:

النوم الكتير ممكن يأثر على قدرة الجسم على معالجة السكريات, وده معناه ضعف تحمل الجلوكوز مقاومة الانسولين, وده ممكن يأدي لخطر الاصابة بمرض السكر من النوع التاني.

وزي ما قولنا في النقطة اللي فاتت ان النوم الكتير يعني نشاط بدني اقل, والحركة والنشاط مهمة للوقاية من مرض السكر, لان قلة الحركة هتأدي للسمنة واللي تعتبر واحدة من الاسباب الرئيسية لزيادة خطر الاصابة بمرض السكر.

واثبتت الدراسات ان الاشخاص اللي بيناموا عدد ساعات زيادة اكتر عرضه للاصابة بمرض السكر من النوع التاني, وضعف تحمل الجلوكوز, وان خطر الاصابة للاشخاص اللي بيناموا كتير بيكون اعلى مرتين من الاشخاص اللي بيناموا اقل من 7 – 8 ساعات يوميا.

المشاكل اللي بيسببها النوم الزيادة 3
المشاكل اللي بيسببها النوم الزيادة 3

4- الاكتئاب:

اضطراب النوم يعتبر واحد من اعراض الاكتئاب, والدراسات اثبتت كمان ان النوم الكتير ممكن يأثر على المزاج بشكل سلبي ويسبب الاكتئاب, النوم بيأثر على الناقلات العصبية في المخ, والنوم الطويل بيأدي بطبيعة الحال لانخفاض النشاط البدني, والنشاط البدني مهم جدا لزيادة مستويات الناقلات العصبية “الدوبامين, والسيروتونين” اللي بتساعد على تحسين المزاج.

والنشاط البدني كمان بيساعد على التخلص من المحفزات المجهدة, وبيحسن تقدير الذات.

المشاكل اللي بيسببها النوم الزيادة 4
المشاكل اللي بيسببها النوم الزيادة 4

5- ضعف المخ:

النوم الاكتر من اللازم ممكن يأثر على قوة المخ, والنوم المفرط ممكن يكون علامة على اضطراب الساعة البيولوجية الاساسية او المشاكل الصحية واللي بدورها ممكن تأدي لتغيير هيكلة المخ وسوء الاداء.

واثبتت الدراسات ان النوم الطويل بترتبط بشكل مباشر مع ضعف الذاكرة, وبتزود من خطر الاصابة بالضعف الادراكي لكبار السن, واثبتت الدراسات ان مدة النوم ممكن تتنبأ او يقدروا يعرفوا منها المخاطر المستقبلية للزهايمر او الخرف, بالاضافة كمان لخطر الاصابة بأمراض الاوعية الدموية.

المشاكل اللي بيسببها النوم الزيادة 5
المشاكل اللي بيسببها النوم الزيادة 5

6- الموت المبكر:

النوم الطويل ممكن يأدي للموت المبكر, وعلى قد ما الموضوع مخيف لكن الدراسات اثبتت زيادة خطر الموت المبكر بسبب النوم ساعات طويلة زيادة عن اللزوم, وده ممكن يكون بيرجع ان النوم الطويل مرتبط بزيادة خطر الاصابة بمرض السكر وامراض القلب والاكتئاب والسمنة.

المشاكل اللي بيسببها النوم الزيادة 6
المشاكل اللي بيسببها النوم الزيادة 6

7- الصداع:

النوم الكتير ممكن يسبب الصداع, وده بيحصل بسبب التقلبات في الناقلات العصبية في المخ اثناء النوم زي السيروتونين, وده بدوره ممكن يأدي للصداع.

ولو انتي بتنامي كتير وبتصحي متأخر الصبح يعني بتفوتي الوقت الطبيعي للفطار والقهوة, في الحالة دي الصداع ممكن يكون مرتبط بسحب الكافيين, وانخفاض نسبة السكر في الدم او الجفاف.

والاشخاص اللي بيناموا كتير خلال فترة النهار هيعانوا من الصداع تاني يوم بسبب انقطاع النوم بالليل بالليل.

المشاكل اللي بيسببها النوم الزيادة 7
المشاكل اللي بيسببها النوم الزيادة 7

8- آلام الضهر:

لو بتقعدي ساعات طويلة في شغلك, وبعدها بتروحي مباشرة للسرير, وبتنامي الصبح لحد وقت متأخر, ده بيزود احتمالات الاصابة بآلام الضهر.

لان القعدة او النوم لفترات طويلة بيقلل من مستويات النشاط البدني, وده ممكن يأثر بشكل سلبي على العضم والعضلات, وده هيأدي اكيد لمشاكل الضهر.

كمان النوم لفترة طويلة على وضعية معينة وقلة حركة الجسم اثناء النوم ممكن يأدي لعلامات الالتهاب, وده ممكن يسبب زيادة لوجع وألام الضهر.

المشاكل اللي بيسببها النوم الزيادة 8
المشاكل اللي بيسببها النوم الزيادة 8

– نصايح هتساعدك على نوم صحي:

1- حافظي على جدول منتظم للنوم, يعني نامي واصحي كل يوم في نفس التوقيت, حتى في الويك اند او الاجازة حافظي على نفس النظام, واخلقي بيئة نوم مثالية عشان تساعدك على النوم السليم يعني لازم تكون الاوضة درجة حرارتها مناسبة وضلمة وهادية عشان تعرفي تنامي كويس.

2- استخدمي سدادات الاذن عشان تتجنبي اي ضوضاء ممكن تخليكي متعرفيش تنامي.

3- متخليش الموبايل او اللاب او التليفزيون في الاوضة اللي هتنامي فيها.

4- متشربيش قهوة او اي مشروبات فيها كافيين قبل النوم.

5- حاولي تمارسي رياضة التأمل Meditaion قبل النوم.

6- بعد ما تاكلي وجبة العشا حاولي تتمشي لمسافة قصيرة قبل ما تنامي.

7- دخول الضوء واشعة الشمس للاوضة الصبح هتساعدك تقومي من النوم اسرع وتتحركي.

8- اتجنبي تدوسي على زرار الغفوة Snooze في المنبه, اول ما يضرب تقومي على طول.

9- خلي روتينك اليومي ايجابي ومنظم.

ومعظم الاعراض اللي قولناها تقريبا ممكن تحصل بسبب النوم زيادة عن اللزوم او كمان قلة النوم, يعني مهم جدا انك تاخدي ساعات نومك اللي محتاجاها بس بشكل يومي مش اكتر ولا اقل.

المشاكل اللي بيسببها النوم الزيادة 9
المشاكل اللي بيسببها النوم الزيادة 9

– مؤسسة النوم الوطنية حددت عدد ساعات النوم اللي بيحتاجها كل شخص بشكل يومي حسب عمره:

– البيبي من يوم – 3 شهور: محتاج من 14 – 17 ساعة نوم يوميا.

– من 4 – 11 شهر: محتاج من 12 – 15 ساعة يوميا.

– من 1 – 2 سنة: محتاج من 11 – 14 ساعة يوميا.

– من 3 – 5 سنين: محتاج من 10 – 13 ساعة يوميا.

– من 6 – 13 سنة: محتاج من 9 – 11 ساعة يوميا.

– من 14 – 17 سنة: محتاج من 8 – 10 ساعات يوميا.

– من 18 – 25 سنة: محتاج من 7 – 9 ساعات يوميا.

– من 26 – 64 سنة: محتاج من 7 – 9 ساعات يوميا.

– من 65 سنة وفيما فوق: محتاج من 7 – 8 ساعات يوميا.

المشاكل اللي بيسببها النوم الزيادة 10
المشاكل اللي بيسببها النوم الزيادة 10

ازاي تستعدي للنوم .. الحاجات اللي لازم تعمليها وتتجنبيها قبل النوم

افضل طريقة للتحضير للنوم
افضل طريقة للتحضير للنوم

مقالات متعلقه

6 طرق غير تقليدية جسمك بيحذرك بيهم ان في حاجة غلط

6 طرق غير تقليدية جسمك بيحذرك بيهم ان في حاجة غلط

6 عادات بتأثر بشكل سلبي على صحتك العقلية وإزاي تصلحيها

6 عادات بتأثر بشكل سلبي على صحتك العقلية وإزاي تصلحيها

6 علامات واضحة تقولك انك بتعاني من مشاكل صحية

6 علامات واضحة تقولك انك بتعاني من مشاكل صحية