حيل وخدع عبقرية لترتيب الشنطة للسفر
السفر من اكتر الحاجات اللي بننبسط ونستمتع بيها, وزي ما بنقول في السفر 7 فوايد, لكن اكتر حاجة بتزعجنا في السفر هي ترتيب الشنطة, عشان كده النهاردة هنسهل عليكم المهمة دي وهنقول لكل بنات حوا حيل لترتيب الشنطة للسفر بطريقة ذكية وعملية.
حيل لترتيب الشنطة للسفر:
1- استخدام الاكياس:
من الحاجات المتعبة جدا بالنسبة لنا ان الهدوم بتبقى على بعضها في الشنطة وعشان نطلع حاجة نلبسها ممكن نقلب الشنطة كلها, وعشان نحل المشكلة دي ممكن تحطي كل طقم هتلبسيه مع بعضه في كيس بلاستيك بطريقة منظمة واقفليه, وممكن حتى تكتبي على كل كيس اليوم اللي هتلبسي فيه كل طقم عشان الموضوع يبقى متنظم وسهل عليكي.
2- لفي الهدوم على شكل رول:
تطبيق الهدوم بالطريقة العادية في حالة السفر مش صح او مش عملية, الطريقة الافضل انك تلفي الهدوم لان ده هيوفر معاكي مساحة في الشنطة, وكمان هيحافظ عليها من الكرمشة, اعمليهم بالطريقة زي ما هو باين في الصورة كده طبقي الهدوم نصين بالطول وبعدين لفيها على شكل رول.
3- استخدام الشاور كاب:
الشوزات من الحاجات اللي مش بنعرف نحطها ازاي في الشنطة عشان متوسخش الهدوم, لكن الفكرة دي هتحل لك المشكلة وهو انك تحطيهم في الشاور كاب او كاب الاستحمام, بكده هتقدري تحمي وتحافظي على الهدوم بتاعتك.
4- حافظي على الهدوم من الكرمشة:
لو واخدة معاكي هدوم بخامات حساسة ممكن تتكرمش بسرعة, افضل حل ليها انك تحطيها في كيس بلاستيك Dry cleaning bag اللي بيتحفظ فيه الهدوم بعد التنضيف الجاف, وبعدين طبقيه وحطيه في الشنطة.
5- استخدمي المساحات بطريقة صح:
دايما في الشنطة بتبقى في مساحات فاضية مش بنعرف نستغلها, المفروض انك تستغلي كل مساحة ولو صغيرة انك تحطي فيها اي حاجة, مثلا ممكن تستغلي الشوز انك تحطي جواه الشرابات, علبة كريم او غسول يعني حطي فيه اي حاجة ممكن تيجي في المساحة دي.
6- احمي الحاجات اللي ممكن تتكسر:
لو في حاجات ممكن تتكسر زي ازايز البرفيوم وعايزة تحافظي عليها, ممكن تحطيها جوه الشراب عشان تحميها من الكسر.
7- استخدمي حافظة اللانسيز لمنتجات التجميل:
بدل ما تاخدي علبة الكريم المرطب كلها, او اي منتج عناية بالبشرة وتاخد مساحة كبيرة, معظمنا بيبقى عندنا حافظات لانسيز مش مستخدمة ممكن نستغلها ونحط فيها كمية من الكريم او اي منتج احنا محتاجينه, وبكده هيبقى معاكي كمية كافية لرحلتك وفي نفس الوقت هتوفري في المساحة جوه الشنطة.
8- استخدمي القطن:
موقف كتير بنتعرض له ان اثناء السفر ممكن البودر او الايشادو او البلاشر يتكسر ويبوظ مننا, ولحل المشكلة دي حطي عليه من فوق قطن عشان تحميه انه يتحرك وتحافظي عليه من الكسر.
9- استخدمي علبة التيك تاك:
علبة التيك تاك الفاضية ممكن تستغليها انك تحطي فيها بنس الشعر, او دبابيس الطرحة, عشان متضيعش منك.
10- استغلي علب الاسبرين:
علب الاسبرين كمان ممكن تستغليها انك تحطي فيها الخواتم او الحلقان بتاعتك, او اي اكسسوارات صغيرة.
11- استخدمي الشاليمو:
عشان تحافظي على السلاسل انها تتشابك مع بعض وتتقطع, حطيها في الشاليمو بالطريقة زي ما هو باين في الصورة كده, وبكده هتحافظي عليها.
افكار لتخزين السكارفات والطرح بطريقة مبتكرة وعملية
