اخطاء موضة كلنا بنقع فيها ! واعرفي ازاي تختاري لبسك صح
ممكن يكون جسمك مظبوط او في ديفوهات بسيطة جدا ممكن تدارى باللبس, ولكن مع ذلك ممكن تلاقي شكلك مش حلو مع لبس معين, وده لانك بتختاري اللبس الغلط او بتنسقي اللبس مع بعضه بطريقة مش صح, والنهاردة من خلال المقال بتاعنا هنقولك اخطاء موضة ممكن نكون كلنا تقريبا بنقع فيها او بنقع في بعض منها, وهنقولك ازاي تنسقي اللبس بطريقة صح.
اخطاء موضة كلنا بنقع فيها:
1- المربعات الكبيرة:
اللبس اللي بيكون مطبوع بمربعات كبيرة او رسمة كبيرة بشكل عام بتضيع تقريبا شكل وتقسيمات الجسم, وبتبين منطقة الوركين اعرض, عشان كده الافضل انك تلبسي تصاميم بمطبوعات او رسومات محايدة, ولو انتي من محبات الكاروه او المربعات الافضل انك تختاري المربعات الصغيرة بدل الكبيرة.
2- طباعة بالعرض:
اللبس اللي بيكون مطبوع او مرسوم بالعرض بيدي انطباع بحجم اكبر من الحجم الطبيعي للجسم وبيتخن, ولو انتي بتحبي اللبس المقلم او المخطط ممكن تختاري المقلم بالطول لانه هيعمل معاكي العكس ويبين الجسم ارفع وهيبينك اطول, او تختاري الالوان الكلاسيكية العادية وتنسقي بينها.
3- تفاصيل او ديكور كتير:
التفاصيل في اللبس اكيد مطلوبة بس لما بتكون زيادة عن اللزوم هتخلي اللوك في الاخر يطلع مش حلو, يعني مثلا زي الكشكشة الكتير هتبينك اتخن بكتير من الطبيعي, عشان كده الافضل تختاري قطع بتفاصيل بسيطة هتطلع احلى, كمان موديل الجيبة اللي فيها سوستة زي اللي باينة في الصورة قدامنا كده بتدي طول اكتر.
4- رسومات كبيرة بالعرض:
زي ما قولنا في النقطة اللي فاتت ان الطباعة بالعرض بتدي حجم اعرض للجسم, كمان لبس الصنادل مع اشرطة طويلة بتخلي الرجل تبان اقصر من الطبيعي فلو لبستي الاتنين مع بعض هيطلع اللوك في النهاية مش حلو وهيبينك اتخن واقصر, لكن بدل كده ممكن تختاري بلوزة بخط رقبة على شكل حرف V مع جيبة بفتحة من قدام هتديكي طول اكتر, واعتمدي دايما على القطع اللي بلون واحد, واختاري الشوز القريب من لون بشرتك يعني بالالوان النيود لانها هتساعد انها تبين رجلك اطول وبحجم اقل.
5- خط رقبة Boat neckline:
خط الرقبة على شكل قارب Boat neckline مع الفساتين هيدي انطباع اعرض لجسمك من الطبيعي, على عكس خط الرقبة على شكل حرف V هيبان بشكل انيق اكتر في اللبس, وحاولي تتجنبي اللبس اللي في كسر او تنيات كتير لانه هيدي عرض اكتر للوسط.
6- خطوط واسعة بالعرض:
اسوأ حاجة بعد اللبس المقلم بالعرض انه يكون مقلم تقليمات واسعة وبألوان فاقعة او زاهية اوي, لانه هيظهر الجسم اعرض وهيدي حجم اكبر لمنطقة الوسط, والافضل انك تلبسي فستان بلون واحد يكون مطبوع برسومات حجمها صغير مع حزام اسود عريض لتحديد منطقة الوسط, هتبين جسمك بحجم اقل واللوك هيطلع انيق اكتر.
7- الالوان الفاقعة او الزاهية:
الالوان الزاهية اوي بتدي للجسم حجم اكبر من الالوان الهادية, يعني لو بصينا للصورة كده الاتنين بنفس الموديل ونفس التقليمة لكن الاختلاف بس في الالوان, هنلاحظ ان الصورة اللي فيها الوان زاهية باين فيها منطقة الكتفين والوسط اعرض من التاني, وبالنسبة للنص اللي تحت زي ما كلنا عارفين ان الاسود بيدي حجم اقل للجسم لكن التصميم ممكن يدمر تأثير اللون, زي ما باين في الصورة كده ان الموديل الاسود الواسع هتديكي حجم اكبر بعكس البنطلون الاسود اللي واخد شكل الجسم.
8- اختيار الجينز المناسب:
مهم اننا نختار الجينز المناسب عشان يطلع بشكل حلو, وعشان تختاري الجينز الصح لما تروحي تشتري حطي في اعتبارك النقط دي:
– اول حاجة كل شكل جسم ليه الموديل المناسب ليه, فلازم تعرفي شكل جسمك عشان تختاري الموديل الصح اللي يناسبك.
– لما تروحي تشتري هاتي مقاس اصغر شوية من مقاسك لان الجينز مع الوقت بيريح وبيوسع.
– اختاري دايما الالوان الغامقة لانها هتديكي اختيارات اكتر انك تنسقي عليها قطع كتير.
– اتأكدي كويس من الخياطة, الجيوب, النسيج بتاعه, يعني اتحققي منه كويس وان كل حاجة فيه تمام قبل ما تشتريه.
اخطاء في الموضة ممكن تكوني بتعمليهم في لبسك..تجنبيهم
