5 انواع من البطن بتظهر مش بسبب زيادة الوزن

بقلمريهام محمود فيتخسيس الوزن visibility13079

في بنات كتير بيعانوا من مشكلة البطن او الكرش, لكن البطن مش دايما سببها بيكون زيادة في الوزن, احيانا بنلاقي بنات جسمهم رفيع لكن عندهم بطن, او بنات بيعملوا رجيم ويخسو لكن بيفضل عندهم بطن, عشان كده النهاردة من خلال موضوعنا هنقولكم 5 انواع من البطن مش بسبب زيادة الوزن, وازاي نتخلص منها وا نعالجها.

انواع من البطن مش بسبب زيادة الوزن:

1- Love handles:

شكلها:

شكل البطن دي بتكون مقسومة اتنين وجايه على الجناب شوية.

الاسباب:

– قلة الحركة او الجلوس فترات طويلة.

– اكل حلويات كتير.

– شرب الكحوليات.

– اكل سكريات وكربوهيدرات كتير في نظامك الغذائي زي الكوكيز, الكيك, الخبز الابيض, المكرونة, الارز.

ازاي تتخلصي منها:

– غيري نظامك الغذائي واعتمدي على نظام صحي اكتر كلي بيض ولحوم من غير دهون, خضروات, والدهون الصحية زي الافوكادو والمكسرات والاسماك عالية الدهون.

– حاولي تمارسي رياضة وممكن تمارسيها في البيت لو مش هتقدري تروحي الجيم, ممكن تمارسي رياضة المشي مسافات طويلة, السكوات, Push up.

افضل نصيحة:

افضل حاجة هي ممارسة الرياضة البدنية, والمشي على نظام غذائي صحي, ومع الوقت هتلاقي البطن حجمها بيقل بالتدريج.

انواع من البطن مش بسبب زيادة الوزن
انواع من البطن مش بسبب زيادة الوزن

2- Stress belly:

شكلها:

بتتركز فيها الدهون حوالين منطقة السرة, والبطن بتكون سميكة.

الاسباب:

– الاجهاد المزمن “ارتفاع مستويات الكورتيزول”.

– بتفوتي من الوجبات اليومية.

– شرب القهوة كتير.

– متلازمة الامعاء المتهيجة.

– الاكل الغير صحي “المكسرات المملحة, الشيبسي, وغيرها من الاكلات”.

ازاي تتخلصي منها:

– النوم بدري, لان السهر ممكن يسبب ضغط زيادة وارهاق, وده بيعطل انتاج هرمون اللبتين وده الهرمون اللي بيساعد على ظبط الشهية وعملية التمثيل الغذائي.

– الاسترخاء قبل النوم, بعمل تمارين تنفس, او حمام دافي, او ممارسة التأمل, كل الحاجات دي بتساعد على النوم, قللي من شرب القهوة بالليل, ومتشربيش اكتر من مرتين في اليوم.

– مارسي الرياضة لكن متجهديش جسمك زيادة برياضة عنيفة او تبالغي في ممارستها لانها هتزود مستويات الكورتيزول اكتر, ممكن تمارسي اليوجا, او المشي مسافات طويلة.

– دخلي المغنسيوم في نظامك الغذائي, لانه بيساعد على الاسترخاء, وهتلاقيه موجود في الخضروات الخضار الداكنة, المكسرات, ونخالة القمح.

افضل نصيحة:

افضل نصيحة هي ممارسة اليوجا, وشرب كوباية شاي بابونج قبل النوم كل يوم, هتساعد على تقليل الكورتيزول وتخلي جسمك في حالة استرخاء ومستعد للنوم.

انواع من البطن مش بسبب زيادة الوزن
انواع من البطن مش بسبب زيادة الوزن

3- Low belly:

شكلها:

البطن دي بتظهر عادة بيكون الجسم نحيف او مظبوط لكن البطن بتكون بارزة شوية في المنطقة السفلية.

الاسباب:

– ممكن تكون بسبب ولادة حديثة.

– قلة الحركة, او العكس ممارسة رياضة بشكل مفرط في الجيم لتمرين ال crunches, او استخدام ال ab wheel.

– عدم تغيير النظام الغذائي.

– انحناء العمود الفقري.

ازاي تتخلصي منها:

– امشي على نظام غذائي صحي يكون غني بالالياف وهنلاقيها موجود في الخضروات الخضرا الورقية, خبز بالحبوب الكاملة او البني, وغيرها من الاكلات الغنية بالالياف.

– لو بتعملي سكوات مع نفسك في البيت ممكن يكون هو السبب لو انتي بتمارسيه بطريقة غلط, بيكون في جهد زيادة على منطقة اسفل الضهر وده بيسبب انحناء في العمود الفقري وبيخلي البطن تظهر بالشكل ده, عشان كده الافضل في الحالة دي تمارسي السكوات في الجيم مع متخصص.

– وزعي ممارسة الرياضة بشكل متساوي, يعني متبالغيش في ممارسة الرياضة لجزء معين في الجسم والباقي لا, لازم تشتغلي على كل مجموعة العضلات في الجسم.

افضل نصيحة:

شرب كمية مية كتير خلال اليوم, اختيار الاكل سهل الهضم زي الخضروات الخضرا, والبروتينات الخفيفة زي الاسماك والفراخ.

انواع من البطن مش بسبب زيادة الوزن
انواع من البطن مش بسبب زيادة الوزن

4- Mommy’s belly:

الشكل:

البطن بتكون كأنك حامل.

الاسباب:

– البطن دي غالبا بتحصل بعد الولادة لان الرحم بينزل لتحت وانتي بتهمليها ومش بتمارسي رياضة, وهتاخدي على الاقل 6 اسابيع عشان ترجع لحجمها الطبيعي.

– او ممكن يكون سببها العكس انك بتمارسي الرياضة بدري اوي بعد الولادة مباشرة, افضل وقت هو ممارسة الرياضة بعد الولادة من 2 – 3 شهور.

– ممكن يكون سببها ضعف عضلات الحوض.

ازاي تتخلصي منها:

– دخلي زيت السمك في نظامك الغذائي.

– كلي الدهون الصحية بشكل يومي زي المكسرات, الزيوت النباتية وزيت الزيتون, لانها بتساعد على محاربة التعب والاجهاد.

– مارسي تمارين Kegel “كيجل” لانها تعتبر مشد طبيعي لجسمك, والتمرين بيكون انك تنامي على الارض على ضهرك وتمدي الايد جنبك تخليها مفرودة, اتني الركبتين, ارفعي منطقة الحوض لفوق وبعدين نزليها, كرري التمرين من 15 – 20 مرة, 5 مرات في اليوم.

– طول ما انتي قعدة اشفطي بطنك, دي تعتبر عادة صحية جدا وبتظبط عضلات البطن.

– متمارسيش تمارين السكوات او ال Crunches بعد الولادة على طول لانها تعتبر اسوأ تمارين بعد الولادة, ادي فرصة لجسمك يستعيد شكله الطبيعي الاول.

افضل نصيحة:

خدي قيلولة بعد الضهر او نامي خلال النهار, واعملي استرتشنج لجسمك قبل النوم, هرمون النوم خلال النهار هيساعد على تكثيف حرق الدهون.

انواع من البطن مش بسبب زيادة الوزن
انواع من البطن مش بسبب زيادة الوزن

5- Inflated belly:

شكلها:

المعدة بتبقى مسطحة الصبح, لكن بتظهر بالتدريج خلال النهار, بغض النظر انتي عندك وزن زيادة او لا.

الاسباب:

– الحساسية الغذائية من اكلات معينة.

– كسل او خمول الامعاء.

– عدم التوازن في الامعاء.

ازاي تتخلصي منها:

– استبعدي الاكلات اللي مش بتناسب جسمك وبتحسي بعدها ان حجم بطنك بيكبر, ومن اكتر الاكلات غالبا اللي بتسبب البطن هي اللي بتحتوي على الجولتين زي الخبز والمكرونة والحلويات, والاكلات اللي فيها خميرة, ومنتجات الالبان المعالجة زي الجبن واللبن والزبدة.

– اختيار نظام غذائي غني بالخضروات الطازة, اللحوم, الفراخ, الاسماك, وحاولي تتجنبي المعجنات والخبز لمدة اسبوعين ولاحظي بطنك حجمها قل ولا لا.

– متهمليش وجبة الفطار واهتمي بيها كويس جدا وافطري فطار متكامل وصحي, لانها تعتبر اهم وجبة في اليوم لان الهضم بيكون في ذروته الصبح, متاكليش بالليل قبل النوم, امضغي الاكل كويس, واشربي مية كتير.

– ممكن تكون البطن دي زي ما قولنا بسبب عدم التوازن في الامعاء, وهنا الحل انك تاكلي حاجات بتحتوي على البروبيوتيك ودي هنلاقيها موجودة بعض انواع الفاكهة والخضار زي الكرنب, الثوم, والبصل, وهتلاقيها في القشطة الحامضة “sour cream”.

افضل نصيحة:

اعملي تمرين تنفس كل يوم الصبح, نامي على ضهرك, واسترخي تماما, وخدي شهيق وزفير بعمق 10 مرات, واتمشي بعد اكل الوجبات.

انواع من البطن مش بسبب زيادة الوزن
انواع من البطن مش بسبب زيادة الوزن

11 طريقة تتخلصي بيهم من انتفاخ البطن من غير تمارين

طرق للتخلص من انتفاخ البطن