7 جمل بتأثر بشكل سلبي على طفلك المفروض متقوليهمش ابدا !

ريهام محمود
ريهام محمود
2737

تربية الاطفال مسئولية اكيد مش سهلة, والكلمة حتى الموجهة للطفل بتكون مؤثرة جدا على تكوين شخصيتة ونفسيته, واوقات كتير الاب او الام بيوجهوا كلمات من غير قصد لاطفالهم ممكن تأثر فيهم وفي نظرتهم للحياة وفي شخصيتهم بشكل سلبي وتأثر على نموهم العقلي, والنهاردة من خلال موضوعنا هنقولكم اكتر 7 جمل بتأثر بشكل سلبي على طفلك, وايه العبارات الصح اللي المفروض تتقال بدالها.

جمل بتأثر بشكل سلبي على طفلك:

1- لازم تسمع كلام البالغين او الكبار:

تقولي للطفل “كل البالغين والكبار كويسين ولازم تعمل كل اللي بيقولوه” الجملة دي في منتهى الخطورة على الطفل لانك بتخليه يبني ثقة مطلقة في كل اي شخص اكبر منه حتى الاغراب عنه وبتخليه ميتوقعش منهم اي حاجة سيئة او مش كويسة.

الجملة الصح: “المفروض تسمع كلام ماما وبابا” ده بيساعد الطفل على تطوير تفكيره وعقله, وبتزرعي فيه عدم الثقة الصحية في الناس الاغراب عنه.

جمل بتأثر بشكل سلبي على طفلك 1
جمل بتأثر بشكل سلبي على طفلك 1

2- متعيطش:

الطفل اول ما يسمع كلمة متعيطش بيتكون في تفكيره ان التعبير عن المشاعر واظهارها دي حاجة مش كويسة, وده هيخليه لما يكبر يخبي مشاعره ومش هيحاول يظهرها او يعيط لانه هيبقى شايف انه دي حاجة سلبية, وممكن العواطف المكبوتة دي في المستقبل تظهر بشكل عدواني.

الجملة الصح: “ايه اللي مضايقك”, “بتعيط ليه”, المفروض الصح انك تسأليه بيعيط ليه او ايه اللي مضايقه, لان ده هيفتح مجال للمحادثة ممكن انها تساعد الطفل في تحديد مشاعره.

جمل بتأثر بشكل سلبي على طفلك 2
جمل بتأثر بشكل سلبي على طفلك 2

3- متبقاش طماع او اناني:

سماع الطفل للكلمة دي ممكن تترجم او تتفسر في تفكيره انه لازم يشارك كل حاجة تخصه مع غيره ومافيش حاجة خاصة بيه هو لوحده, ومع مرور الوقت ده هيتطور عند الطفل لسلوك التضحية بكل حاجة ومش هيقدر يحمي ممتلكاته او حاجته الخاصه بيه, وهيفكر انه ميستهلهاش.

الجملة الصح: “ممكن تخلي صاحبك يلعب بلعبتك شوية”, “ممكن تبدل لعبتك معاه شوية”, وادي فرصة للطفل انه يدير اموره بنفسه وياخد القرار لو مش حابب يشارك يبقى متصمميش انه لازم يعمل كده خليه هو اللي يختار اللي عايز يعمله.

جمل بتأثر بشكل سلبي على طفلك 3
جمل بتأثر بشكل سلبي على طفلك 3

4- مين علمك تعمل كده؟

لو عمل حاجة غلط وانتي قولتيله مين علمك تعمل كده؟ ومش انه هو اللي عمل التصرف ده من نفسه, كده الطفل هيتكون في تفكيره انه يرمي اي حاجة غلط على غيره وانه ممكن يعمل الغلط ويخرج من الموقف من غير عقاب.

الجملة الصح: “ليه عملت كده؟”, الصح انك تسأليه بشكل مباشر ليه عملت التصرف ده وده هيخليكي تعرفي اذا كان هو اللي عمل ده من نفسه او بتشجيع من شخص تاني, وايه فرصه انه يفسر تصرفاته.

جمل بتأثر بشكل سلبي على طفلك 4
جمل بتأثر بشكل سلبي على طفلك 4

5- بص للطفل ده قد ايه شكله حلو:

انك تقولي له بص للطفل ده مثلا قد ايه منظم او محافظ على هدومة نضيفة مجرد ما الطفل يسمع الجملة دي هيتكون في تفكيره على طول ان هو اسوأ من غيره ومالوش لازمة انه يحاول حتى يعمل اي حاجة عشان يبقى احسن, المقارنة مع الغير بتأثر بشكل سلبي جدا على تقدير الطفل لنفسه, وتخليه يفكر انه مش هيحقق اي حاجة في حياته.

الجملة الصح: “انا بحبك, انت تقدر تعمل كده”, لازم تنبهي طفلك لقدراته انه يقدر يعمل اي حاجة وتبيني له انك واثقة فيه وفي قدراته, وخلي في تفكيرك دايما ان طفلك فريد من نوعه وليه موهبة خاصة بيه.

جمل بتأثر بشكل سلبي على طفلك 5
جمل بتأثر بشكل سلبي على طفلك 5

6- هنتكلم في البيت:

الجملة دي بتكون رهبة وخوف جوه الطفل وبتخليه يفكر انه هيتعرض للاذيه او العقاب مجرد ما يروح البيت وده هيخليه يكره انه يرجع البيت, وان الام او الاب بيهددوه ومش بيحبوه, والبيت هيتحول عنده لمكان للعقاب.

الجملة الصح: “هقولك ايه اللي مضايقني”, قولي للطفل وجهة نظرك بهدوء وايه اللي مضايقك بعد تصرفه على طول, ده هيعلم الطفل انه يحط مشاعرك في الاعتبار قبل ما يعمل اي تصرف تاني في المستقبل.

جمل بتأثر بشكل سلبي على طفلك 6
جمل بتأثر بشكل سلبي على طفلك 6

7- انت صغير جدا للتفكير في ده:

لما الطفل يجي يسأل على حاجة اول ما يسمع منك جملة انت صغير جدا انك تفكر في ده, ساعتها هيفكر انه يسأل شخص تاني لانه هيبقى عايز يعرف اجابة سؤاله, ولو اتكرر ان طفلك بيسألك اسئلة في اي موضوع ومش بياخد منك اجابة او معلومة هيروح يدور على مصادر تانية غيرك وممكن تكون مش متخصصة وياخد معلومة غلط.

الجملة الصح: “مش مستعدة للرد دلوقتي اديني شوية وقت”, لو سألك سؤال في موضوع محرج مثلا مترفضيش الاجابة بشكل مطلق ممكن تفكري في اجابة بشكل مناسب وفي نفس الوقت بمعلومات صح, ولو سؤاله عادي حاولي تجاوبي عليه على طول, وبالطريقة دي هتبقي انتي القوة في نظره او السلطة اللي بيرجع لها ومش هتفقدي ثقته.

جمل بتأثر بشكل سلبي على طفلك 7
جمل بتأثر بشكل سلبي على طفلك 7

ازاي تتعاملي مع قرايبك اللي بتكرهيهم!

نصايح للتعامل مع قرايبك اللي بتكرهيهم
نصايح للتعامل مع قرايبك اللي بتكرهيهم

مقالات متعلقه

5 اسئلة يومية تسأليهم لاطفالك هتساعدهم على تقوية عقلهم

5 اسئلة يومية تسأليهم لاطفالك هتساعدهم على تقوية عقلهم

12 حيلة لتطوير نمو الطفل بشكل افضل هتريحك في المستقبل

12 حيلة لتطوير نمو الطفل بشكل افضل هتريحك في المستقبل

علميا ازاي الكذبات البيضا الصغيرة ممكن تأذي اطفالنا

علميا ازاي الكذبات البيضا الصغيرة ممكن تأذي اطفالنا