نصايح ازاى تنهى ارتباط بحد بتحبيه لو انتى مضطرة

بقلمآية حسان فيعلاقات visibility7435

اوقات كتير بيتحقق اللى انتى عايزاه و بترتبطى بالحد اللى كنتى بتحبيه او نفسك ترتبطى بيه، لكن للاسف اوقات كتير برده الحلو مابيكملش وبتظهر طباع او تصرفات بعد الارتباط بيبان معاها انه العلاقة او الارتباط ده ماينفعش يكمل او انك لازم تنهيه دلوقتى احسن من قدام، رغم انك ممكن تكونى لسه بتحبيه و انهاء العلاقة هيوجعك زيه بالضبط لكن للاسف بيبقى هو ده اللى لازم يحصل لانه الحياة بينكم قدام هتكون صعبة، ولانه الموضوع مش سهل ابدا ، فى المقال ده هنقولك على 4 نصايح تساعدك فى ازاى تنهى ارتباط بحد بتحبيه لو انتى مضطرة

نصايح ازاى تنهى ارتباط بحد بتحبيه لو انتى مضطرة ..

1- انهى ارتباطك in person  : 

العلاقات اللى بتنتهى بـ block  او بمسج او على التليفون بتاخد مجهود ووقت اكتر علشان تنتهى، وده لانه لما تيجى تاخدى خطوة مهمة زى انك بتقطعى او بتنهى ارتباطك بشخص مهم بالنسبة لك، لازم انتوا الاتنين تحترموا حبكم لبعض و علاقتكم و الوقت اللى قضيتوه مع بعض، وتقعدوا سوا و تنهى الارتباط ده بشكل شخصى in person ، لما تتكلموا مع بعض ده هيخليكوا تنهوا العلاقة بشكل متحضر و محترم من غير ما تزودوا جروح بعض و من هنا هتقدروا تتخطوا المرحلة الصعبة دى و تـ move on  . 

2- خليكى قوية وماترجعيش فى كلامك : 

حاجة مهمة جدا لازم توصليلها وتعمليها هى انك تفضلى قوية بعد ما تنفذى قرار انهاء العلاقة و ماترجعيش فى كلامك ، بعد ما تاخدى القرار و تنفذى الخطوة المهمة دى هتبدأ تيجى فى بالك اسئلة زى ” هو اللى انا عملته ده صح ولا غلط؟” ، ” طيب مش كان احسن لو صبرت شوية؟” وحاجات زى كده ، ماتستسلميش للاسئلة دى وخليكى قوية و ماتديش لنفسك اى فرصة فى انك ترجعى فى كلامك.

3- حطى حدود : 

بعد ما تنهى الارتباط، لازم تحطى حدود، و لو قدام لازم هيبقى فى اتصال بينكم لو كنتوا قرايب او زمايل فى الشغل مثلا يبقى لازم تحطى قواعد للاتصال ده و تبينى ملامحه، غير كده .. ابعدى تماما عن اى حاجة ممكن تخليكى تتابعيه زى الفيس بوك او الانستجرام و غيرهم .. من الآخر يعنى لازم تجمدى كده و اوعى انك “تراقبيه فى صمت”.انك تحطى حدود بينك وبينه ده هيساعدكم انتوا الاتنين انكم تتعافوا اسرع و تقدروا تعدوا الفترة الصعبة دى بأقل خساير ممكنة. 

4- خدى وقتك بعيد عنه : 

آخر نصيحة معانا من نصايح ازاى تنهى ارتباط بحد بتحبيه هى انك تاخدى وقتك كفاية بعيد عنه وعن اى حد او اى حاجة تفكرك بيه، و ماتستعجليش و تفكرى فى الارتباط بشخص تانى او تسمحى لحد انه يدخل حياتك من جديد، فى الفترة دى انتى بتبقى هشة جدا و افكارك مشوشة علشان كده لازم تهدى و تاخدى وقت فى انك تتعافى و تنسي الفترة الصعبة دى وتعديها بسلام. ادى لنفسك وقت .. 

اعرفى معانا كمان 5 علامات تحذيرية تعرفك انك لازم تنهى العلاقة دى فورا !