6 اسرار عشان تحولي مظهرك في اسرع وقت وتطلعي بلوك رائع في اي مناسبة خاصة
ساعات بتيجي لنا حاجات مش متوقعة زي مناسبة لحد قريب او صديق, سفر مفاجيء, وممكن منبقاش مستعدين لده وبنبقى محتاجين ننضف بشرتنا او نخس بشكل سريع, والنهاردة من خلال موضوعنا هنقولك اسرار ازاي تطلعي بلوك رائع في اسرع وقت وتحولي مظهرك وتبقي مستعدة لاي مناسبة خاصة او اي حاجة مفاجئة.
ازاي تطلعي بلوك رائع في اسرع وقت:
1- اخسري وزنك في اسبوعين:
هل ممكن تخسري وزن في اسبوعين؟ اكيد ممكن لو قللتي عدد سعراتك الحرارية اليومية من 1000 – 1100 سعر حراري, وعشان تعملي ده اعتمدي على نظام غذائي مليان بالخضروات والفواكه والحبوب الكاملة, والاسماك قليلة الدسم واللحوم, النظام ده هيخليكي تخسري وزن بسرعة لان الجسم هيبقى فيه كمية محدودة من الطاقة وبالتالي الجسم هيبدأ يحرق من الدهون المتخزنة, ومتنسيش تشربي يوميا كمية مية متقلش عن 2 لتر.
2- شد وتخسيس الوسط وتحسين الجلد في اسبوع:
– تخسيس الوزن في 7 ايام ممكن يحصل مع 3 انواع اكل وهي, الحمضيات, والاناناس, والبروتين, الفواكه الحمضية زي اليوسفي والبرتقان والجريب فروت وغيرها من الفواكه بتحتوي على كمية كبيرة من الاحماض اللي بتدوب دهون الجسم وتزيلها, كمان الفواكه الغنية بالفيتامينات وخصوصا فيتامين C بتحسن جهاز المناعة وحالة الجلد والصحة بشكل عام.
– الاناناس واحد من افضل انواع الفاكهة اللي بتساعد على التخسيس, لانه بيحتوي على البروميلين اللي بيساعد على تكسير الدهون بشكل فعال, والبروتينات مهمة لبناء الجسم وتوفير الطاقة, وننسى الكربوهيدرات والدهون شوية في نظامنا الغذائي لمدة 7 ايام.
شوفي من هنا افضل 5 تمارين لوسط نحيف ومثالي في 30 يوم بس تقدري تعمليهم في البيت بسهولة.
3- تخسيس وشد البطن في 3 ايام:
في اكتر من اختيار ممكن نعمله عشان يساعدنا على ازالة دهون البطن بشكل سريع.
– الاختيار الاول: ممكن نعمل عصير بكميات متساوية من الجزر والتفاح, ونشرب منه كوباية كبيرة 6 مرات في اليوم, المشروب ده بيحتوي على عدد سعرات قليلة وفي نفس الوقت بتدي احساس بالشبع , وبتمد الجسم بالفيتامينات, البيتا كاروتين, والبكتين.
– الاختيار التاني: لوجبة الفطار والغدا اعملي خليط من بيضة مسلوقة, و1 معلقة كبيرة Sour cream, 1 جزرة مبشورة, وللعشا اشربي بس شاي اخضر من غير سكر.
شوفي من هنا 10 تمارين لشد البطن وتخسيس الكرش.
4- نضفي جسمك في يومين:
– لو مافيش قدامك وقت غير يومين وعايزة حاجة سريعة, ممكن تعملي مشروب سريع لتنضيف الجسم وللتخسيس في نفس الوقت ممكن تعملي لوجبة الفطار عصير اناناس مع اي نوع فاكهة حمضية, او تشربي قهوة من غير سكر وتعصري عليها ليمون.
– خلال فترة النهار استبدلي المشروبات المعتادة بتاعتك لكوباية مية سخنة وضيفي عليها ليمون شرايح واوراق نعناع, الغدا ممكن تاكلي خضار طازة زي البنجر, الجزر, الخس, وخوخ, وللعشا اشربي كوباية مية مع شرايح الليمون, وممكن تاكلي كام واحدة مشمش مجفف.
شوفي من هنا 5 وصفات لمشروبات الديتوكس.
5- اتخلصي من المية الزيادة في الجسم في يوم واحد:
لو وقتك ضيق اوي ممكن تتخلصي من المية الزيادة في الجسم هيفرق في الوزن وفي شكل جسمك.
– ممكن نضيف من 5 – 6 معالق كبيرة ردة لكوباية لبن قليل الدسم, ونشربها الصبح هتساعد جسمك يتخلص من المية الزيادة.
– او سخني معلقة كبيرة زيت زيتون في طاسة وقلبي فيها مجموعة خضروات منوعة اي خضروات تفضليها وكليها على مدار اليوم قسميها ل 5 او 6 وجبات, وكلي الوجبات على فترات منتظمة, وممكن تسلقي الخضار, ده هيساعد الجسم على التخلص من المية الزيادة.
لكن لازم نعرف ان الحاجات دي نطبقها بس لما نكون محتاجين نتايج سريعة ومعندناش وقت يعني نمشي عليها بس لفترة زي اللي احنا كاتبينها لكل نظام لكن مش على طول لان زي ما قولنا قبل كده الفواكه الحمضية على معدة فاضية على طول مش كويس, والحصول على سعرات حرارية منخفضة لفترة طويلة مش كويس صحيا, وفقدان الوزن لازم يكون تدريجي, والنصايح دي تتنفذ في حالة الطواريء بس.
6- منع ترهل الصدر:
– عشان تحافظي على شكل الصدر من الترهل, حاولي تعملي رياضة بالدامبلز عشان تعززي عضلات الصدر, نامي على ضهرك على سطح مستوي وثابت ممكن على الارض او ترابيزة منخفضة, امسكي الدامبلز, حركي ايدك للجنب وبعدين رفعيها لفوق, كرري التمرين على قد ما تقدري, ومتنسيش تلبسي برا رياضي مريح اثناء التمرين, او ممكن تعملي تمرين ال Push up بيساعد على بناء عضلات الصدر.
– حاولي تنامي على ضهرك افضل من النوم على الجنب عشان تحافظي على الصدر مشدود.
– امشي على نظام غذائي صحي, واتجنبي زيادة وخسارة الوزن بشكل مستمر, لان شكل الصدر بيتأثر وبيبدأ في الترهل.
7 زيوت هتغير مظهرك في 7 ايام بس !
