ستايلات عملية وانيقة مناسبة للجامعة
البنت في الجامعة بتحتاج ستايل يكون عملي وتحس فيه بالحرية وسهولة التحرك وفي نفس الوقت يكون انيق, والنهاردة هنساعد بنات حوا يطلعوا بلوك عملي وانيق من خلال مجموعة ستايلات عملية وانيقة للجامعة.
الستايلات اللي معانا النهاردة هي لوك كامل ال outfit بالاكسسوار والشوز وكل حاجة عشان نسهل عليكي الموضوع وتختاري منهم اللوك اللي تحبيه اكتر.
هنلاحظ الستايلات منوعة جدا ما بين الشيميز الكاروه اللي يعتبر قطعة تريندي جدا لموسم الخريف والشتا ممكن تنسقيه مع بنطلون جينز وتلبسيه وممكن تلبسي الشيميز لوحده او تنسقي تحته اندر شيرت او بادي وتسيبيه مفتوح, او تلبسي الشيميز وفوقيه بلوفر خفيف اقصر منه, او تلبسي عليه فيست, يعني قدامك اختيارات كتير جدا عشان تنوعي في لبسه.
ممكن تنسقي البنطلون الجينز مع شيرت دريس وتلبسي فوقيه جاكيت جينز قصير, او تنسقي معاه بلوفر او سويت شيرت.
للبنات اللي بيفضلوا لبس الجيبات ممكن تنسقي الجيبة مع بلوفر مناسب, او تيشرت وكارديجان.
بالنسبة للالوان هنلاقي الوان الخريف المعتادة زي النبيتي, الرمادي, البيج, الازرق, الابيض, واكيد اللون الاسود.
طبعا مننساش نكمل اللوك بسكارف مناسب في الايام البرد اوي, وبالنسبة للشوز تقدري تختاري ما بين السنيكرز, الشوز الفلات, او بوت بكعب صغير او متوسط, والافضل متلبسيش كعب عالي اوي عشان ميتعبكيش ومش هيبقى عملي في الجامعة.