17 حاجة مفاجئة بتعمليها بتبوظ هدومك..واعرفي الطرق الصح وازاي تحافظي عليها

بقلمريهام محمود فيمنوعات visibility2463

اكيد في كتير مننا اتعرض لموقف ان هدومه تبوظ او تتمط او لونها يبهت وغيرها من الحاجات اللي ممكن تحصل وبنتفاجيء ازاي حصل كده؟ لكن مفكرناش اننا ممكن نكون بنطبق الهدوم او بنغسلها او بنخزنها بطريقة غلط بتخليها تبوظ, وده اللي هنعرفه النهاردة في المقال بتاعنا هنقول لكل لبنات حوا ايه الحاجات اللي بتبوظ الهدوم وايه هي الطرق الصح اللي تعمليها عشان تحافظي على هدومك.

الحاجات اللي بتبوظ الهدوم:

1- بتعلقي الهدوم على شماعة سلك:

لو بتستخدمي الشماعات ال Wire او السلك الافضل انك تغيريها للشماعات المصنوعة من اللباد او الجوج لانه بتبقى انعم على اللبس وهتحافظ على هدومك, لان الشماعات السلك مش بتتحمل الهدوم اللي مصنوعة من خامات تقيلة, وكمان مع الوقت ممكن تغير Shape او شكل الهدوم بتاعتك, لكن الشماعات اللباد مش هتسيب علامات على الهدوم بتاعتك او تغير شكلها, وكمان هتكون افضل للاقمشة الرقيقة والناعمة زي الحرير هتثبت عليها اكتر, وكمان هي ارفع من الشماعات البلاستيك وبالتالي هتوفرلك في المساحة جوه الدولاب.

الحاجات اللي بتبوظ الهدوم
الحاجات اللي بتبوظ الهدوم

2- بتعلقي البلوفرات على الشماعة بالطريقة العادية:

لو بتعلقي البلوفرات زي ما بتعلقي الشيميزات او البلوزات العادية يبقى لازم تغيري الطريقة دي لانها مش صح وبتخلي البلوفر يتمط من عند الرقبة والكتفين, فلو معندكيش مساحة في الدرج او في الدولاب انك تطبقي البلوفر وتشيليه مطبق, يبقى اعملي الطريقة دي, طبقي البلوفر نصين بالطول وحطي الشماعة بالمقلوب وبعدين اتني الكم والجزء اللي تحت على الشماعة زي ما هو باين في الصورة كده.

الحاجات اللي بتبوظ الهدوم
الحاجات اللي بتبوظ الهدوم

3- بتطبقي الهدوم الجلد:

لو عندك جيبة او بنطلون جلد وبتطبقيهم وتشيليهم بدل ما تعلقيهم على شماعة ده هيسبب لهم تجاعيد او كرمشة هيبقى صعب تتخلصي منها لان الجلد مش هينفع يتكوي بالمكوى العادية ولا حتى بالبخار, وعشان تمنعي الكرمشة دي علقيهم على شماعة بكلبسات زي اللي باينة في الصورة دي عشان يبقوا مفرودين, وكمان قبل ما تعلقيهم حطي كارت عند مكان الكلبسات عشان متعلمش على الهدوم.

الحاجات اللي بتبوظ الهدوم
الحاجات اللي بتبوظ الهدوم

4- تخزين الهدوم بالكيس البلاستيك:

اكيد كلنا عندنا هدوم بنوديها للدراي كلين تتنضف ولما بنجيبها كتير مننا بيقع في غلطة اننا بنحطها في الدولاب بالكيس عشان نحافظ عليها نضيفة ومكوية لاطول فترة, لكن ده مش صح المفروض اول ما تجيبيها تشيليها من الكيس, لان النسيج بيبقى محتاج يتنفس, والكيس البلاستيك ممكن يسبب ريحة مش حلوة ورطوبة للهدوم, ولو بتتكسر وبتتكرمش جوه الدولاب ده معناه ان الهدوم قريبة اوي من بعض, دايما خلي ما بين كل شماعة والتانية شبر واحد عشان تمنعي كرمشة وتكسر الهدوم.

الحاجات اللي بتبوظ الهدوم
الحاجات اللي بتبوظ الهدوم

5- بتغسلي الهدوم في الدراي كلين زيادة عن اللزوم:

غسيل الهدوم في الدراي كلين زيادة عن اللزوم ممكن مع الوقت يضعف النسيج بتاعها, لو التيكيت اللي على الهدوم مكتوب عليه dry-clean only ده معناه انه لازم يتغسل في الداري كلين بس, لكن لو مكتوب عليه dry clean بس زي معظم الخامات البوليستر, الكشمير, والنايلون ده معناه انك ممكن تغسليه على ايدك في البيت عادي وتفرديه على حاجة مسطحة وتسيبيه ينشف.

الحاجات اللي بتبوظ الهدوم
الحاجات اللي بتبوظ الهدوم

6- استخدام المجفف مع البرا والاقمشة الناعمة:

– استخدام مجفف الغسالة مع البرا او البانتي او الاقمشة الناعمة بشكل عام بيبوظها, لان حرارة المجفف بتدمر مرونة النسيج, عشان تنشفيهم ياما تفرديهم وتسيبيهم ينشفوا, او تعلقيهم على شماعة من النص مش من الحمالات ولا من الشريط اللي بيقفل البرا عشان متتمطش.

الحاجات اللي بتبوظ الهدوم
الحاجات اللي بتبوظ الهدوم

– ولو عايزة البانتي او البرا ينشف بشكل اسرع ممكن تحطيه في ال salad spinner او مجفف الخضروات وتلفيه كام لفة عشان تتخلصي من المية الزيادة وبعدين علقية عشان ينشف.

الحاجات اللي بتبوظ الهدوم

7- تخزين البرا بطريقة غلط:

تنى الكب بتاع البرا او تطبيقة بالطريقة العادية هيبوظ ال shape بتاعه, عشان كده لما تيجي تشيليهم في الدولاب حطيهم مفرودين فوق بعض زي ما بيبقوا في محلات الملابس الداخلية زي ما هو باين في الصورة كده.

الحاجات اللي بتبوظ الهدوم
الحاجات اللي بتبوظ الهدوم

8- عصر المايوة:

المايوة بيتعمل من خامة مينفعش انها تتعصر بالطريقة العادية لانها هتبوظه وهتخليه يفقد شكله, وبدل العصر عشان تنشفيه وتتخلصي من المية اللي فيه, افرديه على فوطة وحطيه فوقيه فوطة تانية واضغطي عليه, او حطيه على فوطة كبيرة واتني نصها فوق المية واضغطي عليه عشان تتخلصي من المية الزيادة, وبعدين افرديه عشان يكمل تجفيفه وينشف خالص.

الحاجات اللي بتبوظ الهدوم
الحاجات اللي بتبوظ الهدوم

9- غسل المايوة وتجفيفه في الغسالة:

غسل المايوة وتجفيفه في الغسالة بيدمر نسيج المايوة وبيخلي لونه يبهت, الافضل انك تغسليه على ايدك بالمية والمسحوق, وحطيه مفرود على اي حاجة مسطحة وسيبيه ينشف, ولو انتي عايزة تغسليه في الغسالة وتستخدمي معاه المجفف اعملي ده مرة واحدة بس اخر موسم الصيف لكن ميتغسلش كل مرة في الغسالة.

الحاجات اللي بتبوظ الهدوم

10- بتحطي ملابس الرياضة مع باقي الغسيل على طول:

متحطيش ملابس الرياضة مع باقي الهدوم اللي مش نضيفة وهي لسه رطبة او فيها عرق لان ده هيعمل ريحة مش حلوة وهيسبب عفن في الهدوم, الصح انك تعلقيه على شماعة وتسيبيه ينشف من العرق الاول وبعدين حطيه مع باقي الهدوم لحد ما يتغسل.

الحاجات اللي بتبوظ الهدوم

11- بتكوي الهدوم الحساسة او اللي خامتها ناعمة اوي:

الهدوم الحساسة او اللي خامتها بتكون ناعمة اوي زي الحرير او الساتان المكوى ممكن تسبب علامات فيها لو مكنتيش واخدة حذرك وانتي بتكويها, عشان كده الافضل انك تكويها بالبخار, او علقيها على شماعة وافتحي المية السخنة في الحمام لحد ما تعمل بخار كتير وبعدين علقي الهدوم في الحمام كام دقيقة هتتفرد.

الحاجات اللي بتبوظ الهدوم

12- بتخزني الاحذية فوق بعض:

تخزين الاحذية فوق بعض ممكن يبوظها, افضل طريقة انك تخزنيهم بشكل مستقيم كل فردة وراها الفردة التانية بتاعتها, الطريقة دي هتخليكي توصلي لاي شوز بسهولة لان كلهم هيبقوا قدامك.

الحاجات اللي بتبوظ الهدوم

13- تعليق الاكسسوارات على شماعة فوق بعض:

تعليق الاكسسوارات على شماعة فوق بعض ممكن يخليهم يشبكوا ويتعقدوا في بعض وهيبقى فيه صعوبة تفكيهم, وعشان تخليهم مفصولين من بعض ممكن تستخدمي صواني المافن او الكب كيك او قوالب التلج هيبقوا وسيلة عملية جدا ومش مكلفة لتخزين الاكسسوارات بتاعتك بشكل منظم وسهل.

الحاجات اللي بتبوظ الهدوم

14- مش بتقفلي سوستة وزرار البنطلون الجينز وتقلبيه:

قبل ما تحطي البنطلون الجينز في الغسالة اتأكدي انك تقفلي السوستة والزراير بتاعتة وبعدين اقلبيه, لان السوستة لو اتسابت مفتوحة ممكن تشبك في باقي الهدوم في الغسالة وتقطعها وتبوظها, والملابس اللي بتكون مصبوغة بشكل كبير زي الجينز لازم نقلبها قبل الغسيل عشان نحافظ على لونه وميبهتش.

الحاجات اللي بتبوظ الهدوم

15- غسيل الجينز كتير:

البنطلون الجينز من كتر الغسيل ممكن لونه يبهت وصبغته تروح مع الوقت, عشان نحافظ على لونه اطول فترة ممكنة وعلى خامته انها تطرى وشكله يتغير, بدل الغسيل باستمرار ممكن تحطي البنطلون في كيس بلاستيك وتحطيه في الفريزر من بالليل للصبح, الفريزر هيقتل معظم البكتيريا اللي بتسبب ريحة مش حلوة وفي نفس الوقت هتحافظي على لونه.

الحاجات اللي بتبوظ الهدوم

16- بتعلقي الشنط:

الشنط لما تعلقيها مع الوقت ممكن الايد بتاعتها تتمط وشكلها يتغير, عشان كده الطريقة الصح انك تحطيها على رف الدولاب عشان تحافظي على شكلها.

الحاجات اللي بتبوظ الهدوم

17- مش بتحفظي الشنط في الكيس بتاعها:

قبل تخزين الشنط بتاعتك عشان تحافظي على شكلها زي ما هو ومتتطبقش, حطي جواها اي قماش عندك او تيشرتات قديمة مش بتلبسيها عشان متفقدش شكلها وحطيها جوه الكيس بتاعها عشان تحميها من التراب وتحافظي على الجلد بتاعها وعلى لمعانه زي ما هو كأنها لسه جديدة.

الحاجات اللي بتبوظ الهدوم

افكار لتخزين السكارفات والطرح بطريقة مبتكرة وعملية

افكار لتخزين السكارفات والطرح
افكار لتخزين السكارفات والطرح