نصايح ازاى تستخدمى مكواة الشعر Hair Straightener من غير ما تأذى شعرك
اللوك الحلو دايما بيبدأ من شعر حلو و شكله صحى وقوى، ولانه تصفيف الشعر بالمكواه سواء هتخليه أملس او كيرلى بيعتبر من الحاجات المهمة اللى بنستخدمها كتير على شعرنا، ويمكن كتير مننا بتستخدمه بشكل يومى، مهم جدا تعرفى شوية حاجات علشان تحمى شعرك من انه يتأذى بسبب المكواة و حرارتها.. فى المقال ده اعرفى معانا نصايح ازاى تستخدمى مكواة الشعر Hair Straightener من غير ما تأذى شعرك.
نصايح ازاى تستخدمى مكواة الشعر Hair Straightener من غير ما تأذى شعرك
النصيحة الاولى:
نضفى المكواة كويس قبل و بعد استخدامها، ممكن تستخدمى الفوطة الصغيرة اللى بتستخدميها لتنضيف نضارتك، الخطوة دى مهمة علشان تتجنبى تراكم اى اتربة من المكواة على شعرك.
النصيحة الثانية:
درجة الحرارة بتتحدد على حسب نوع شعرك مش على حسب انتى عايزة شعرك يبقى ناعم قد ايه، يعنى لو كان شعرك بطبيعته ناعم يبقى درجة حرارة الـ Hair Straightener ماينفعش تعدى الـ 160 درجة، لانه درجة الحرارة الاعلى ممكن تحرق شعرك لا قدر الله.
النصيحة الثالثة:
علشان فى النهاية يكون شعرك بيلمع و يبان صحى اكتر، جففى شعرك المبلول بالسيشوار او الـ hair dryer قبل ما تفرديه باستخدام الـ Hair Straightener ، افتكرى انه ماينفعش ابدا تستخدمى المكواة مباشرة على الشعر و هو مبلول، حتى لو كان مكتوب فى تعليمات استخدام المكواة انه ده ممكن، لازم تجففى شعرك بالكامل قبل استخدامها.
النصيحة الرابعة:
تمليس الشعر بيبدأ من الاطراف و بعدين تتجهى من تحت لفوق ناحية الجذور. وبعدين ترجعى تعيدى عليها من غير ضغط من فوق لتحت “يعنى من الجذور للأطراف” .
النصيحة الخامسة:
وانتى ماشية على شعرك بالمكواة اتحركى بايدك ببطئ ومن غير ضغط علشان تتجنبى ارتفاع درجة الحرارة او تكسير الشعر تحت المكواة.
النصيحة السادسة :
خلى فى توكة او مشبك شعر جنبك تلمى بيه الجزء اللى لسه مابدأتيش تعمليه من شعرك، لانه لو شعرك كيرلى او بطبيعته خشن هتلاقيه بيتعقد و بيتداخل بسرعة.
النصيحة السابعة :
بعد ما تخلصى استنى دقيقة او دقيقتين على ما شعرك يبرد و بعدين استخدمى السيروم على شعرك علشان يفضل لامع و شكله صحى وجذاب.
اعرفى معانا كمان حيل وخدع للشعر باستخدام المكوى الFlat iron ..
