10 طرق طبيعية سهلة وفعالة لازالة الزوائد الجلدية

الزوائد الجلدية من المشاكل اللي بتواجه كتير من البنات, ويمكن يكون في كتير متعايشين مع المشكلة دي وخصوصا انها تعتبر مش مرض جلدي خطير ولا بتسبب الم, لكن شكلها بيكون مزعج جدا وبتشوه شكل الجلد, عشان كده النهاردة احنا هنحل المشكلة دي لبنات حوا من خلال مجموعة طرق طبيعية لازالة الزوائد الجلدية بوصفات بسيطة تعمليها بنفسك في البيت.

طرق طبيعية لازالة الزوائد الجلدية:

1- الزيوت الاساسية:

الزيوت الاساسية كلنا عارفين فوايدها المختلفة للبشرة وفعاليتها في علاج مشاكل الجلد, وواحدة من فوايدها هي علاج مشكلة الزوائد الجلدية.

اخلطي كميات متساوية من زيت شجرة الشاي, زيت الخروع, زيت الزعتر, وزيت اللبان الدكر, خففيهم بكمية من المية عشان متحرقيش الجلد خصوصا للبشرة الحساسة, احتفظي بيهم في اي ازازة عندك, وادهني من الخليط يوميا على الاماكن اللي فيها زوائد جلدية, هتساعد على تجفيفها وهتخليها تقع من غير الم مع الاستمرار.

2- النيتروجين السائل:

الطريقة دي تعتبر واحدة من الطرق اللي بيستخدمها الدكاترة المتخصصين وبيتسمى بالعلاج بالتبريد, والنيتروجين السائل موجود في الصيدليات بس لازم نستخدموا بحذر عشان منضرش الجلد, هنجيب النيتروجين ونلبس جوانتي ونمسك قطعة قطن بملقاط طبي ونغمسها في النيتروجين ونضغط على الزوائد الجلدية, النيتروجين هيساعد على قطع الاكسجين عن الزوائد الجلدية ومع الوقت هتقع.

3- استخدام الفتلة:

طريقة الفتلة واحدة من الطرق الشعبية القديمة اللي ليها فعالية في التخلص من الزوائد الجلدية, طهري مكان الزوائد الجلدية بالكحول الطبي, وهاتي فتلة لفيها حوالين الزوائد كذا لفة واربطيها عشان متتفكش وسيبيها كذا يوم مربوطة, وخلال الفترة دي بين فترة والتانية ادهنيها بالكحول عشان تحافظي عليها من التعرض لاي جراثيم, ده هيمنع وصول الاكسجين للزوائد الجلدية وهيخليها تنشف وتقع, بعد ما تقع ادهني المكان باي مرهم مطهر مضاد للبكتيريا وكرريه يوميا لحد ما المنطقة تخف, وممكن تغطيها بشاشة معقمة او لاصق جروح اثناء الفترة دي.

4- خل التفاح:

خل التفاح كمان من العلاجات الفعالة جدا لازالة الزوائد الجلدية, اول حاجة بلي قماشة او فوطة  بمية سخنة واضغطي على مكان الزوائد الجلدية لمدة دقايق, وبعدين هاتي قطعة قطن اغمسيها في خل التفاح واضغطي بيها على الزوائد لمدة 20 دقيقة, كرريها 3 مرات في اليوم لمدة اسبوع او لحد ما تتخلصي من الزوائد الجلدية.

5- الثوم:

الثوم من العلاجات الفعالة لكتير من المشاكل الجلدية ومنها الزوائد الجلدية, اقطعي فص الثوم لشرايح, حطي الشريحة على الزوائد الجلدية والزقي عليها لاصق جروح وسيبيه طول اليوم وخلال اليوم غيري شريحة الثوم بواحدة تانية من 2 – 3 مرات, او سيبيها من بالليل لحد الصبح, ممكن تدهني الجلد حوالين المكان فازلين عشان الثوم ميلهبش البشرة.

6- استخدام المشرط او المقص:

الطريقة دي ممكن تكون مؤلمة شوية عن الطرق اللي احنا قولناها فوق, ولكن ده يعتبر علاج سريع وهيخلصك من الزوائد الجلدية بشكل فوري, قبل الاستخدام عقمي المشرط او المقص بالكحول الطبي عشان تضمني انه خالي من اي بكتيريا, خدري المنطقة بمكعب تلج, او بمرهم موضعي مخدر, وتقطعي الزوائد الجلدية بسرعة وبعدين اضغطي عليها بقطعة قطن عشان توقفي الدم, وبعدها ادهنيها اي كريم مطهر.

7- عصير الهندباء:

الهندباء من النباتات اللي ليها فوايد فعالة في علاج كتير من المشاكل الجلدية, هنجيب الهندباء نضغط على الساق بتاعه والسائل اللي هيطلع منه نحطه على المناطق فيها زوائد جلدية ونحط عليها لاصق جروح, كرريها اكتر من مرة في اليوم يوميا لحد ما تتخلصي من الزوائد الجلدية.

8- الاسبرين:

حمض الساليسيليك اللي موجود في الاسبرين ليه تأثير فعال في تجفيف الزوائد الجلدية, اطحني الاسبرين “ممكن نستخدم اسبرين ريفو” اعجنيه بالمية, حطي العجينة على مكان الزوائد الجلدية وسيبيها لحد ما تنشف واغسليها, كرري الوصفة اكتر من مرة في اليوم يوميا.

9- البكينج صودا “الكربوناتو”:

الكربوناتو ليه خصائص تقشير للجلد بتساعد على علاج الزوائد الجلدية, اعجني الكربوناتو بمية دافية, حطي العجينة على مكان الزوائد الجلدية وسيبيها لحد ما تنشف واغسليها, كرري الوصفة يوميا هيساعد على تجفيفها وهتقع مع الانتظام في استخدامها.

10- عصير الليمون:

حمض الستريك اللي موجود في الليمون بيساعد على تحلل خلايا الزوائد الجلدية وبالتالي بتأدي لازالتها, ادهني مكان الزوائد الجلدية بعصير الليمون وسيبيه لحد ما ينشف, كرري الوصفة يوميا, الزوائد الجلدية هتنشف بالتدريج وهتقع.

اعرفي معانا ازاي تستخدمي خل التفاح لازالة الشامة