5 علامات تحذيرية تعرفك انك لازم تنهى العلاقة دى فورا !
اوقات كتير بتحسي انك لقيتى الشخص المناسب او زى ما بنقول the one و من كتر تعلقك بيه او انبهارك عينيكى مابتشوفش علامات و حاجات كتير مهمة لازم تاخدى بالك منها، لانه زى ما بنقول دايما “مراية الحب عمياء” .. وعلشان مايبقاش بيفوتك حاجة و يفضلوا عينيكى مفتحين، فى المقال ده بنات حوا هتلفت نظرك لـ 5 علامات تحذيرية تعرفك انك لازم تنهى العلاقة دى فورا لو لقيتيهم بيحصلوا معاكى.. خلينا نعرفهم مع بعض ..
5 علامات تحذيرية تعرفك انك لازم تنهى العلاقة دى فورا !
1- انك تبقى مستنية منه انه هيفضل ملازمك طول الوقت :
اى بنت فى اول اى ارتباط خصوصا لو جاد بتبقى متعلقة جدا بشريكها و عايزاه يفضل جنبها طول الوقت و مايغيبش عن عينيها ولا لحظة، لكن فى فرق بين التعلق و الحماس اللى بتحسيه فى اول الارتباط وانك تبقى متعلقة بيه اكتر من اللازم و متوقعه منه انه هيفضل معاكى 24ساعة بشكل او بآخر، لازم رغم حبك ليه تبقى عارفه انه هو عنده حياة بعيد عنك وعنده اهل واصحاب و من حقه يقضى وقته براحته حتى لو مش معاكى، لكن لو ماقدرتيش تعملى ده و فضلتى تتخانقى علشان هو بيغيب عنك ومش معاكى طول الوقت لازم تعرفى انه دى علامة مهمة من العلامات اللى بتحذرك انه العلاقة دى ممكن تتدمر و تنتهى ، التعلق الزيادة هيخنقك و يخنقه و بالتالى هيتعبكم انتوا الاتنين.فى العلاقات الصحية لازم الطرفين يبقى عندهم وقتهم ومساحتهم الشخصية الخاصة بيهم، خليكى حريصة انه المساحة دى تفضل موجودة فى علاقتكم.
2- انه الارتباط ده يشغلك عن اهلك و اصحابك :
اكيد العيلة والاصحاب ممكن يشكلوا ضغط عليكى خصوصا لو كنتى مرتبطة وبيسألوكى عن كل التفاصيل اللى تخص علاقتك، لكن ماتنسيش انه وجودهم مهم جدا فى حياتك علشان كده ماينفعش انه شريكك يشغلك عنهم او يبدأ تدريجيا يخليكى تبطلى تخرجى معاهم او تهتمى بيهم و تشوفيهم، الكلام ده معناه انه لو الارتباط ده بيشغلك عن اهلك و اصحابك يبقى لازم تاخدى بالك انه دى واحدة من علامات تحذيرية تعرفك انك لازم تنهى العلاقة لانه لو شريكك بياخد دورهم كله و انه يتواصل معاكى او يدعمك ومايبقاش فى حياتك غيره ده معناه انه هيبقى هو المتحكم الاكبر فى ارائك وتفكيرك و بالتالى هيقدر يلعب بمشاعرك اكتر.
3- لو بيقلب فى تليفونك او طلب منك الـ password بتاعتك :
لو شريكك بيطلب منك الـ passwords بتاعتك ده معناه حاجة من اتنين، اما انه الثقة بينكم مش موجودة و انتوا محتاجين تشتغلوا على النقطة دى ، او انه بيحاول يتحكم فيكي و يسيطر عليكى عن طريق انه مايبقاش ليكى اى خصوصية . الطرف المتحكم هيبقى عايز يكون ليه access لأى حاجة تخصك ، سواء الـ email او التليفون او الفيسبوك اكونت، علاقتك لو فيها النقطة دى يبقى لازم تفكرى فى انهائها فورا.
4- لو بيغير طول الوقت بسبب او من غير سبب :
الغيرة من العلامات المخادعة شوية لانها ممكن تحسسك انه بيحبك و مهتم بيكى لكن لو زادت عن حدها زيها زى اى حاجة تانية فى اى ارتباط، بتنقلب ضدها و بتبقى من الحاجات السيئة و اللى ممكن تدمر العلاقة دى. لازم تعرفى انه الغيرة كويسة لكن لما تبقى فى محلها و معقولة انما لو بيغير عليكى بسبب و من غير سبب لدرجة انك حاسه انه بدأ يشك فيكى و يشكل حمل او ضغط يبقى لازم تفكرى فى مصير العلاقة دى و يا ترى هتقدرى تستحملى التصرفات دى منه ولا لاء ، العلاقات اللى فيها الغيرة زيادة بتعبتر علاقات مريضة و هتأذيكى نفسيا و معنويا.
5- لما بتتخانقوا ، بيقلب الطرابيزة عليكى :
عمرك كنتى فى خناقة مع شريكك و هو اضح جدا انه هو الغلطان بخصوص الموضوع اللى بتتكلموا عنه و فجأة لقيتيه بيطلعك انتى الغلطانة و بيقول مبررات لده كمان ؟! و تفكرى كده بينك و بين نفسك ” ايه ده ، هو انا الغلطانة فعلا ؟” كده يبقى هو بيعرف يتلاعب بعقلك و مشاعرك و بيعرف ازاى يقلب الطرابيزة عليكى و يطلعك انتى اللى غلطانة حتى لو مفيش مبرر منطقى لده، و هنا لازم اول ما تاخدى بالك من التصرفات اللى زى دى يبقى لازم تنهى علاقتك فورا، لانه بعد كده هيبقى مسيطر بشكل كامل على عقلك و مشاعرك وبالتالى كل تصرفاتك.
