افضل علاجات طبيعية للشعر مكوناتها من مطبخك
مصفف الشعر موريسيو سيفونتيس واحد من اشهر مصففين الشعر في نيويورك, بيشاركنا النهاردة اسراره في العناية بالشعر من خلال افضل علاجات طبيعية للشعر بيستخدمها في صالون التجميل بتاعه وليها تأثير فعال على الشعر.
افضل علاجات طبيعية للشعر:
– تطهير وتنضيف الشعر:
اول حاجة قبل استخدام اي علاج من علاجات الشعر لازم نطهر الشعر بالخل الابيض الاول عشان نزيل منه اي اثر او بقايا لاي منتجات, والشعر يبقى مستعد يستقبل العناصر الغذائية لاي علاج, بعد غسيل الشعر بالشامبو اشطفيه بالخل.
1- العسل الاسود:
العسل من الحاجات اللي بتمنع اكسدة الشعر وبتحافظ على لونه, بيغذي الشعر, ويعتبر مثالي جدا للشعر الخشن لانه بيساعد على تنعيمه وترطيبه, ضيفي كمية من العسل الاسود للبلسم او حمام الكريم بتاعك كمية تناسب طول وكثافة شعرك, ادهني الشعر بالخليط الصبح وسيبيه طول اليوم واغسليه بالليل, لو مش هتقدري تقعدي بيه طول اليوم ممكن تستخدمي معاه طريقة البخار يعني سخني فوطة وحطيها على الشعر لمدة 25 دقيقة وبعدين تغسليه.
2- الافوكادو:
الافوكادو بيساعد على ترطيب الشعر وفرد الشعر المجعد, اخلطي ¼ ثمرة افوكادو مهروسة مع كمية من البلسم او حمام الكريم, طبقي الماسك على شعر رطب ولفيه بفوطة سخنة لمدة 20 دقيقة وبعدين اغسليه.
3- بياض البيض:
بياض البيض بيساعد على تنعيم الشعر وبيديه لمعه قوية جدا, اخلطي من 3 – 6 بياض بيض حسب طول وكثافة الشعر, مع 3 معالق كبيرة حمام كريم او بلسم, طبقي الخليط على الشعر لفيه بفوطة سخنة وسيبيه لمدة 15 دقيقة, بياض البيض بيحتوي على البروتينات الكاملة والاحماض الامينية اللي بتعمل على الشعر حاجز حماية من التكسر والتقصف.
4- زيت الزيتون:
زيت الزيتون من الزيوت اللي بتعوض الزيوت الطبيعية اللي بتفقدها فروة الراس من استخدام الشامبو ومنتجات الشعر القاسية اللي فيها مواد كيميائية, حطي الزيت الزيتون بشكل مباشر على فروة الراس قبل الشامبو سيبيه من 20 – 30 دقيقة وبعدين اغسليه بالشامبو.
5- زيت جوز الهند:
زيت جوز الهند بيحتوي على الاحماض الدهنية غير المشبعة والمركبات الاساسية اللي بتخترق فروة الراس وبتساعد على الترطيب العميق للشعر, كمان بيحتوي على المواد النباتية المضادة للاكسدة اللي بتجدد وتمنع تكسر الشعر, طبقي زيت جوز الهند على الشعر كله وركزي على المناطق الجافة اكتر, سيبيه من 20 – 30 دقيقة وبعدين اغسليه بالشامبو, وزيت جوز الهند بيساعد كمان على السيطرة على جفاف الشعر والقشرة.
6- القرفة وجوزة الطيب:
النوعين دول من التوابل ليهم قدرة على تحفيز نمو الشعر, ضيفي كمية من جوزة الطيب والقرفة المطحونة لازازة الشامبو العادي بتاعك, او ممكن تضيفي على كمية الشامبو اللي هتغسلي بيها شعرك بس كل مرة معلقة جوزة الطيب ومعلقة قرفة, وبعدين دلكي بيه الشعر وفروة الراس لمدة دقايق وبعدين اغسليه.