افكار لتخزين السكارفات والطرح بطريقة مبتكرة وعملية
لو دولابك زحمة وعندك سكارفات وطرح كتير ومش عارفة ترتبيهم ازاي, النهاردة جايبين لكل بنات حوا افكار لتخزين السكارفات والطرح بطريقة مبتكرة وعملية توفرلك في المساحات.
افكار لتخزين السكارفات والطرح:
1- الفكرة دي بسيطة وسهلة جدا, ممكن ورا باب الاوضة بتاعتك تثبتي علاقة كبيرة وتعلقي عليها قطعة خشب وتلزقي عليها بالشمع مشابك غسيل من العادية اللي احنا بنستخدمها بالشكل اللي باين في الصورة, وتعلقي عليها السكارفات والطرح بتاعتك.
2- البرطمانات الكبيرة دي هنلاقيها بتتباع في محلات الادوات المنزلية ممكن ترتبي فيها السكارفات والطرح بتاعتك فوق بعض بالشكل ده, وكمان هتعمل ديكور حلو للاوضة.
3- ممكن تستخدمي الشماعات اللي بيكون فيها مشبكين صغيرين, والطريقة دي هتحافظلك على الطرح مفرودة من غير ما تتكسر.
4- الستاند ده كمان هنلاقيه في محلات الادوات المنزلية هو في الاساس لتخزين الازايز احنا ممكن نستخدمه للطرح والسكارفات نلفها بشكل اسطواني ونرتبها في الستاند بالشكل ده.
5- مافيش بيت مصري مافيش فيه كراتين فاضية ممكن تستغليها بشكل عملي, قصيها ولفي عليها الطرح ورتبيها في الدرج, الطريقة دي كمان هتحافظ عليها مفرودة.
6- استخدمي منظم الادراج وحطي فيه السكارفات والطرح بالشكل ده, بدل ما يبقوا كلهم على بعض ومتعرفيش توصلي للطرحة او السكارف اللي انتي عايزاه بسهولة.
7- ممكن تستخدمي بار خشب او ستانلس زي اللي بنعلق عليه الفوط في الحمام وتثبتيه في الحيطة وتربطي فيه الطرح والسكارفات جنب بعض.
8- ممكن تستغلي كارتونة المناديل بعد ما تخلص وتبرمي الطرحة وتحطيها جواها وترصيهم في الدرج زي الشكل اللي باين في الصورة, او ممكن ترصيهم فوق بعض على رف الدولاب.
9- ممكن ببساطة تثبتي مسمارين في الحيطة وتربطي فيهم حبل طويل, وحطي عليهم الطرح والسكارفات بالشكل ده.
10- لو في البيت سلم مركون مش مستخدم ممكن تستغليه وتعلقي عليه الطرح والسكارفات بتاعتك.
11- البراويز القديمة كمان ممكن نستغلها بالشكل ده نعلقها على الحيطة عادي ونثبت جواها عُلاقات او خطافات صغيرة نعلق عليها الطرح.
12- منظم الاحذية اللي موجود في محلات الادوات المنزلية ممكن نستغله بطريقة تانية في تخزين الطرح والسكارفات, علقية على الباب بالشكل ده وحطي فيه الطرح.
13- ممكن ترتبي الطرح والسكارفات وكمان الاكسسوارات, ممكن تستغلي الاكسسوارات بتاعتك في ترتيب الطرح, طبقي الطرحة او الاسكارف بشكل اسطواني زي ما باين في الصورة كده وحطي فيها الاكسسوار عشان متتفكش ورصيهم جنب بعض في الدرج, وكده هتبقي رتبتي الطرح والسكارفات وكمان الاكسسوارات.