10 اسرار جمالية كورية كل بنت محتاجة تعرفهم
النساء الآسيويات من اكتر النساء المشهورين عالميا بصفاء وجمال بشرتهم وبجلد صحي وشباب, وده بيرجع انهم بيهتموا بالعناية ببشرتهم جدا سواء بالعلاجات الطبيعية او بالمنتجات التجميلية الجاهزة, ومش بس العناية الخارجية كمان بيهتموا بالتغذية الصحية اللي اكيد بتنعكس بشكل ايجابي على البشرة, والنهاردة هنعرف مع بعض من خلال موضوعنا اسرار جمالية كورية هتغيرلك بشرتك.
اسرار جمالية كورية:
1- ابدأي من سن مبكر:
على عكس الاوروبيين والامركيين, بيتم توعية النساء الكوريات في سن صغير عن العناية بالبشرة, وازاي يحافظوا على بشرتهم صحية ويعملوا روتيني يومي عشان يحافظوا عليها, وبيأكدوا على ضرورة ترطيب البشرة باستمرار, وتقشيرها, وتدليكها بشكل يومي, لان ده بيساعد على منع حب الشباب, والاكزيما, والرؤوس السودا, ومشاكل الجلد الشائعة بشكل عام.
2- استخدام فرشة البشرة:
المرأة الكورية بتحط في روتينها اليومي للبشرة استخدام فرشة البشرة الناعمة لتدليكها, لانها بتساعد على تحسين لون الجلد, ومنع وتقليل التجاعيد, وتعزيز الدورة الدموية, وبتساعد على ازالة الجلد الميت, كمان بتساعد على زيادة امتصاص اي كريمات او سيروم انتي حطاه على بشرتك.
3- التنضيف المزدوج:
لبشرة صحية ومنورة بيستخدموا التنضيف او التطهير المزدوج للبشرة, استخدام منظف سائل لازالة المكياج والدهون الزيادة من البشرة, وبعدها استخدام منظف زيتي, وبعدها بيتم غسيل البشرة بمية دافية, وبعدين استخدام منظف برغوة خفيفة مع تدليك البشرة باطراف الصوابع, الخطوات دي بتساعد جدا على تنقية البشرة ومنع حب الشباب.
4- استخدام الزيوت الاساسية:
النساء الكوريات بيأكدوا على التأثير الايجابي جدا للزيوت الاساسية على البشرة وانها بتحافظ على بشرتك نقية وصحية, الصبح ممكن تستخدمي خليط من زيت الورد مع اي نوع زيت تاني زي زيت جوز الهند او زيت اللوز الحلو, استخدام زيت اللافندر لمحاربة الشيخوخة ومنع التجاعيد, استخدام زيت اللبان الدكر لتقليل المسام الواسعة على البشرة وتحسين لون الجلد.
5- تقنية Pat Pat Pat:
تقنية مكياج كورية المعروفة باسم Pat Pat Pat بتعتمد على تطبيق منتجات التجميل باستخدام الايدين او السبونج بطريقة الطبطبة, وخبراء المكياج الكوريات غالبا بيستخدموا اطراف الصوابع لتطبيق الكريم المرطب, او السيروم, او ال BB كريم او غيرها من منتجات البشرة وبيبدأوا يدمجوها على البشرة بطريقة الطبطبة بدل فركها على البشرة.
6- اهتمي بجسمك:
كل حاجة كويسة او مفيدة لجسمك هي بالتالي هتكون مفيدة لبشرتك, لان اي حاجة بتشربيها او بتاكليها ليها تاثير مباشر على بشرتك, وروتين العناية بالبشرة للنساء الكوريات مش بس بيعتمد على الكريمات او الترطيب, لكن كمان بيعتمدوا على الاكل الصحي وشرب الديتوكس لتطهير الجسم من السموم عشان يحافظوا على جمال بشرتهم, بيشربوا بشكل يومي شاي اخضر, جنسنج, والطبق الرئيسي في نظامهم الغذائي اليومي هو طبق الكيمتشي الحار وهو عبارة عن مخلل كرنب.
7- تطبيق قناع الورق:
ممكن يستخدم للقناع ده ورق مناديل سميك شوية بيتم غمسها في اي نوع زيوت اساسية اللي بتساعد على ترطيب وتغذية البشرة وبتعزز نمو الخلايا الجديدة, ممكن تستخدمي زيت جوز الهند, زيت الزيتون, زيت اللوز, او تخلطي مجموعة زيوت مع بعض, او تستخدمي سيروم البشرة, وتغمسي فيها المناديل وتحطيها على البشرة لمدة 10 دقايق من مرة لمرتين في اليوم يوميا.
8- تدليك الوجه:
النساء الكوريات بيبدأ وبينهوا يومهم بتدليك الوجه, والخدعة الجمالية دي بتساعد على تحسين الدورة الدموية, وتخليص الجلد من السموم, ممكن تعملي التدليك باي نوع زيت اساسي, او لوشن خفيف, والتدليك بعد البخار بيعمل كمان مفعول هايل جدا للبشرة.
9- التقشير بالفوطة السخنة:
انقعي فوطة في مية سخنة, وابدأي دلكي البشرة بيها بحركات دائرية خفيفة, النساء الكوريات بيستخدموا التقنية دي لمنع التجاعيد, وتحفيز تدفق الدم.
10- شرب شاي الشعير:
شاي الشعير بيلعب دور اساسي في نظام العناية بالبشرة الكورية, لان ليه خصائص مضادة للجراثيم وبيساعد على ازالة السموم من الجسم, وخصائص مضادة للاكسدة, كمان بيساعد على فقدان الوزن, بيحسن لون البشرة, وبيحسن الدورة الدموية, وبيتعمل بطريقة الشاي العادية والشعير هنلاقيه عند العطار.
اسرار لجمال بشرتك بيستخدمهم النساء حول العالم
