13 سؤال تسأليهم للكراش في الرسايل لو عايزة تعرفيه اكتر
لو عندك كراش او معجبة بشخص من بعيد ومش عارفة تتقربي منه او تكلميه وتتعرفي عليه وجه لوجه في الحالة دي الرسايل النصية بتكون افضل وسيلة عشان تبعتي له وتعرفي عنه اكتر لان ورا الشاشة بيكون عندنا جراءة بشكل اكبر اننا نقول اللي مش بنقدر نقوله والشخص قدامنا, والنهاردة هنقول لكل بنات حوا ايه الاسئلة اللي ممكن تسأليها للكراش وازاي تفتحي معاه موضوعات للكلام تخليكي تتعرفي عليه وعلى شخصيته اكتر وتتقربي منه.
الاسئلة اللي ممكن تسأليها للكراش:
1- افضل يوم ليك ممكن يكون شكله ايه؟
السؤال ده مهم جدا لانه هيعرفك تقريبا شخصيته بشكل عام عاملة ازاي من خلال ايه اكتر حاجة هو بيحب يعملها, وكمان هتقدري تعرفي هل هو متوافق مع شخصيتك وبيحب نفس الحاجات او لا, يعني مثلا بيحب يقضي يومه في مكان معين, بيحب الاماكن الهادية اكتر, بيحب يطلع على البحر, بيحب الطبيعة وهكذا هتقدري تعرفي من اجابته شخصيته بشكل عام.
2- ايه الحاجة اللي عملتها وفخور بيها؟
من خلال السؤال ده هتقدري تعرفي قيمة ومبادئة وانواع الحاجات اللي ممكن تحسسه بالفخر بنفسه وهتقدري تحددي شخصيته من خلالها, يعني مثلا هل الشخص ده كل اللي بيفتخر بيه انه محافظ على عضلات جسمة, او فخور مثلا انه انقذ قطة او اي حيوان اليف من اذى كان هيحصله, او ساعد شخص معين او قدم خدمة لحد.
3- ايه اسوأ عادة ليك؟
اكيد اكتر حاجة هتبقي عايزة تعرفيها في اقرب فرصة, هي اسوأ عادة عنده, لانه هيتحدد عليها مثلا هل انتي متقبلة العادة دي ولا لا, وممكن تكملي مع الشخص ده بالعادة دي ولا لا.
4- ايه الحاجة اللي بتخوفك, ولكن في نفس الوقت نفسك تعملها باي شكل؟
ممكن يكون بيخوفه مثلا انه ينط من طيارة, او بيخاف من الحب او انه يتعلق بحد اوي, في كل الاحوال مهما كانت الاجابة انتي هتبقي عرفتي معلومة جديدة عنه تقدري تتعاملي معاه على اساسها.
5- لو بتتمنى تروح اي مكان في العالم, هيكون فين وهتعمل ايه؟
السؤال ده هتقدري تعرفي منه هل هو مثلا انسان بيحب المغامرة وعايزة يسافر ويلف العالم ويعمل مغامرات ولا شخص روتيني, على حسب اجابته هتقدري تعرفي ده.
6- ايه معتقداتك الدينية؟
اسأليه عن معتقداته الدينية الحاجات اللي مؤمن بيها هتقدري تعرفي من السؤال ده هل هو انسان متعصب ولا متسامح وبيقبل الغير وبيتقبل الاختلاف عادي.
7- مين اقرب شخص ليك في حياتك؟
اعرفي مين اقرب شخص ليه في حياته, هل مامته مثلا, صديق, او غيره, هتقدري تعرفي بردو من السؤال ده هو بيكون اقرب لاهله ولا لاصحابه وسره بيكون مع مين اكتر.
8- ايه اهم 3 اهداف في حياتك؟
السؤال ده مش بس هيديكي لمحة عن مستقبله او بيفكر ازاي, لكن كمان هيقولك هو انسان واقعي وبيعمل الحاجات اللي ممكن توصله لتحقيق اهدافه, ولا انسان خيالي وحالم وعنده خطط واهداف مستحيل تحقيقها في حياته.
9- ايه اكتر حاجة معظم الناس بتتفق عليها وانت لا؟
اسأليه ايه الحاجات اللي ممكن يكون معظم الناس حواليه بيتفقوا او بيكونوا موافقين عليها وهو لا, ممكن تكون حاجة بسيطة فيلم معين مثلا مش بيحبه, او تكون حاجة كبيرة انه مش مؤمن بمؤسسة الزواج.
10- هل شايف ان المرأة بتساوي الرجل؟
طبعا من خلال اجابته على السؤال ده هتقدري تحددي ممكن تكملي مع الشخص ده ولا لا, هل بيشوف انه المرأة مساوية للرجل ومش اقل منه, ولا بيشوف الراجل افضل والست اقل, في كل الاحوال هتقدري تحددي شخصيته وهل ممكن الشخص ده يكون شريكك في يوم من الايام ولا لا.
11- هل انت شخص مودرن او تقليدي؟
اكيد لو عايزة تدخلي في علاقة رومانسية مع شخص هتبقي عايزة تعرفي تفكيره زي تفكيرك ولا مختلف عنك, والاجابة على السؤال ده هتعرفك اذا كان هو شخص متزمت وصعب ولا شخص تفكيره واسع وواعي وعارف ان دور الست ميقلش عن دور الراجل في المجتمع.
12- ايه اللي بتحتاجه في اي علاقة من الطرف التاني؟
السؤال ده هيخليكي تقدري تعرفي ايه رؤيته لعلاقة الحب المثالية وبتتفق معاكي ولا لا, ايه اللي هو متوقعه من الطرف التاني في علاقة الحب, وافكاره ورؤيته قريبة منك ولا لا, وعلى اساسه هتحددي ممكن تكملي مع الشخص ده ولا مش هتكلمي.
13- ايه شعورك من ناحيتي؟
اكيد ده اكتر سؤال هتبقي عايزة تسأليه وتعرفي اجابته, اسأليه بكل بساطة وصراحة ايه هو شعوره من ناحيتك, شايفك اخت, صديقة, او ممكن تكون في مشاعر من ناحيته ليكي.
دي تقريبا اكتر الاسئلة اللي ممكن تعرفك على شخصيته اكتر وتقدري تحددي على اساسها, هل الشخص ده مناسب ليكي ولا لا؟ ممكن تكملي ولا لا؟ وياريت بنات حوا يقولوا لنا لو في اسئلة تانية شايفة ان ممكن تسأليها للكراش من خلال الرسايل غير اللي قولناها في المقال بتاعنا.
افضل رسالة نصية تبعتيها لشخص مر بيوم سيء هتحسن يومه
