10 حيل ميعرفهمش غير مصففين الشعر المحترفين

مصففين الشعر اكيد بيكون عندهم اسرار كتير وحيل بيستخدموها للشعر ميعرفهاش غيرهم, والنهاردة احنا جايبين لكل بنات حوا مجموعة من الاسرار دي و حيل للشعر من المحترفين.

حيل للشعر من المحترفين:

1- اضافة سكر للصبغة:

كلنا عارفين ان المواد الكيميائية اللي موجودة في الصبغة زي الامونيا من اكتر الحاجات اللي ممكن تضر الشعر, وتسبب تهيج وحكة لفروة الراس, وعشان نتجنب ده جايبين سر من واحد من المحترفين وهو انه بيضيف معلقة سكر كبيرة للصبغة, مستويات الرقم الهيدروجيني الموجود في السكر بتساعد على تقليل التأثير الجانبي للامونيا على الشعر.

2- استخدام الصن بلوك لحماية الشعر من التجعد والهيشان:

واحد من الاسرار اللي بيستخدمها اشهر مصفيين الشعر في العالم لحماية الشعر من التجعد والهيشان, استخدام الصن بلوك على الشعر, حطي كمية بسيطة من الصن بلوك على ايدك وادهني بيها الشعر, هتحميه من التجعد والهيشان, وكمان هتحمي الشعر وفروة الراس من اضرار اشعة الشمس اللي ممكن تسبب جفاف الشعر.

3- استخدام البيبي بودر كبديل للشامبو الجاف:

احنا اتكلمنا قبل كده عن الشامبو الجاف و ازاي نعمله في البيت وقولنا ان هو بديل لغسيل الشعر لو انتي حابة تنضفي شعرك من غير ما تغسليه, وواحدة من اسرار مصففين الشعر انهم بيستخدموا البيبي بودر كبديل للشامبو الجاف لتنضيف الشعر وفروة الراس وعشان يدوا Volume او حجم اكبر للشعر.

4- ديل حصان مخفي Hidden ponytail:

ديل الحصان واحدة من التسريحات السهلة والسريعة والعملية, والنهاردة جايبين لكم طريقة جديدة ليه, قسمي الشعر تلات اقسام قسم كبير ورا, وقسمين تانين اصغر في كل جنب, الجزء اللي ورا اعمليه ديل حصان منخفض وجيبي الجزئين اللي في الجنب على الجزء اللي ورا وثبتيه بالبنس, بالطريقة دي هتخفي ديل الحصان.

5- زبدة الكاكاو للحماية من بقع الصبغة:

اسوأ حاجة ممكن تحصل هي بقع الصبغة على الجلد, وعشان نمنعها قبل الصبغة ادهني الجلد عند منطقة منابت الشعر بزبدة الكاكاو هتعمل حاجز بين الجلد والصبغة.

6- استخدام مثبت الشعر:

استخدام مثبت الشعر كلنا عارفين انه من الحاجات اللي بتساعد على التخلص من البيبي هير, لكن مصففين الشعر مش بيستخدموه بالطريقة المعتادة اللي احنا بنفكر فيها, واحدة من اشهر مصففين الشعر بتستخدم السبراي بطريقة مختلفة, امسكي العلبة نفسها زي الفرشة المستديرة بتاعة السيشوار وحطيها على الشعر ولفيها عليه من الجذور للاطراف, يعني زي الطريقة اللي بنستخدم بيها فرشة السيشوار كده.

7- استخدام الكريم المرطب لشعر سلس:

السر ده من واحد من مصففين المشاهير, بينصح باستخدام الكريم المرطب لشعر سلس وسهل التعامل معاه ولاضافة لمعة للشعر والتخلص من جفاف الاطراف, خدي كمية من الكريم المرطب العادي اللي بتستخدميه لبشرتك وافركيه بين صوابعك وادهني بيه الشعر وركزي على الاطراف الجافة هتلاقي بقى شكله صحي وفيه لمعة بشكل فوري.

8- ثبتي البنس بالشامبو الجاف:

عشان تثبتي بنس الشعر ومتقعش او تتحرك منك وتسريحتك تبوظ, نصيحة مصففين الشعر ليكي انك ترشي البنس بالشامبو الجاف, هيساعد على تثبيتها.

9- الايشادو لتغطية الشعر الابيض:

عشان تغطي الشعر الابيض على جذور الشعر بشكل فوري, واحد من مصففين شعر المشاهير بينصحك باستخدام ايشادو بنفس درجة لون شعرك على الشعر الابيض.

10- القهوة لتلوين الشعر:

القهوة تعتبر ملون طبيعي للشعر تحميكي من ضرر الصبغة, وكمان بتساعد على تقوية الشعر, عشان تعملي لون شوكولاتة غامق وقوي, اعملي القهوة بالطريقة العادية سيبيها تبرد واخلطي كوباية قهوة مع كوبايتين بلسم شعر ومعاهم 2 معلقة كبيرة قهوة بودرة مطحونة, وحطي الخليط على الشعر زي طريقة الصبغة وسيبيه ساعة وبعدين اغسليه.

ازاي تعملي علاج الشعر بالبخار في البيت..واتعرفي على فوايده