7 عادات طبخ سيئة لازم تبطلى تعمليها .. اعرفيهم

آية حسان
آية حسان
في
مطبخ
1616

مفيش شك انه كلنا بنعمل اخطاء فى المطبخ، خصوصا لما بنكون اول مرة بندخل المطبخ او لسه بنتعود عليه من جديد. لكن لو فضلنا نكرر الاخطاء دى للاسف بتتحول لـ عادات طبخ سيئة ممكن تكمل معانا بعد كده و مع الوقت ممكن تسبب أضرار او تبقى متعبة يالنسبة لك، علشان كده فى المقال ده بنات حوا هتعرفك على اهم  عادات طبخ سيئة علشان تعرفيهم و تتخلصى منهم من دلوقتى، خلينا نعرفهم مع بعض…

7 عادات طبخ سيئة لازم تبطلى تعمليها .. اعرفيهم

1- مابتسخنيش الطاسة كويس قبل ما تستخدميها : 

الحقيقة ، دى ممكن ماتكونش غلطتك اوى، عادة الطاسات فى البيوت بسبب البوتوجازات اللى بنستخدمها بتسخن اقل وفى وقت اكتر من الطاسات على البوتوجازات او المواقد اللى فى  المطاعم ، وده لاختلاف نوع و قوة الاجهزة علشان كده ممكن الطاسة ماتسخنش معاكى للدرجة المطلوبة فى البيت. 

وده بيخلي الموضوع اصعب عليكى فى انك تسوى اللحوم مثلا بالدرجة المظبوطة اوى اللى بتشوفيها فى المطاعم وبالتالى ممكن النكهة تتغير شوية، لانه اللحوم والخضار بيستووا ببطئ اكتر و ده معناه انك بتخسرى النكهة المطلوبة.

الحل الوحيد هو انك تحطى الطاسة او الحلة قبلها بوقت كافى على النار علشان تقرب لدرجة الحرارة المطلوبة قبل ما تبدأى تستخدميها، علشان تطلعى بنتايج افضل لطبخك. 

1

2- مابتبليش الأكل كويس ” مابتستخدميش توابل كفاية” : 

تانى عادة من عادات طبخ سيئة لازم تتخلصى منها هى انك مابتبليش الاكل كويس، مهم جدا انك تستخدمى الملح فى تتبيل اللحوم لكن مش بدرجة زيادة عن اللزوم، لكن لازم يتبلوا كويس. 

كل وصفات الطبخ تقريبا بتعتمد فى استخدم الملح على قاعدة “season to taste,” بمعنى انك تحطى كمية ملح كافية لدرجة انك تدوقيها ومش اقل من كده وطبعا التتبيل بيعتمد على طريقة الطهى كمان، يعنى مثلا تتبيل قطعة ستيك للشوى مش هيبقى نفسه لسلق اللحمة بالطريقة العادية. 

افضل طريقة تتجنبى بيها انك تقدمى اكل مش متبل للدرجة المطلوبة هى انك ترجعى تدوقيه قبل التقديم مباشرة علشان تبقى كل المكونات اتشبعت من بعضها و تقدرى تحكمى على الطعم مظبوط. 

2

3- مابتقريش الوصفات للآخر : 

دى بتعتبر يمكن اسوأ عادة فى المطبخ ممكن تكونى بتعمليها، و للأسف بتبقى هى السبب فى فشل الوصفات اللى بتعمليها كل مرة او انه النتايج مابطتلعش مظبوطة زى ما انتى متوقعة، عمرك قبل كده بدأتى وصفة واكتشفتى انك نسيتى تضيفى مكون معين؟! ده لانه عادة احنا فى المبطخ مابنقراش الوصفات للآخر، وساعتها بتبقى مش عارفة تعملى ايه ! تحطيه وخلاص مش فى مكانه ولا تستغنى عنه وتبقى النتيجة انتى وحظك ؟! 

علشان كده لازم تبطلى العادة دى وتقرى الوصفات كلها الاول كويس وتحضرى كل المكونات اللى هتحتاجيها وتتأكدى انه كل حاجة موجودة. وممكن تقريها مرتين ! 

3

4- بتستخدمى سكاكين مش حامية : 

اسوأ حاجة فى انك تكونى بتستخدمى سكاكين تلمة او dull مش هى انها بتخلى التقطيع اصعب عليكى، لكنها ممكن تجرحك بسهولة جدا وده لأنه لما بتستخدمى سكينة مش حامية بتضطرى تضغطى عليها زيادة علشان تقطع وده بيزود من احتمال انه السكينة تفلت وتجرح ايديكى، ويمكن لا قدر الله يبقى جرح عميق كمان، علشان كده مهم من فترة للتانية انك تجددى من سكاكين مطبخك او تخليها حامية علشان تبقى اسهل فى استخدامها وآمنة اكتر. وعلشان تحافطى على السكاكين وتفضل حامية يفضل ماتحطهاش فى الدرج و تجيبى الحامل الخاص بالسكاكين وتحتفظى بيها فيه . 

4

5- بتعايرى الدقيق بالكوباية : 

معظم الوصفات بتعاير الدقيق بالكوباية ، يعنى بتقول مثلا ” كوبين من الدقيق” و الحقيقة انه استخدام الكوباية كمعيار للمكونات وخصوصا الدقيق غلط وانه لازم يكون بالجرامات، علشان كده مرة تانية بتعتبر دى مش غلطتك اوى، ضرورى جدا انه الدقيق يتقاس او يتعاير بالجرامات لانه ممكن كام جرام زيادة او اقل ” وده بيحصل طول الوقت لما بتيجيى تعايرى الدقيق بالكوباية” يخلوا العجينة اللى بتعمليها تبقى ناشفة اكتر، او سميكة اكتر او يمكن اقل من السمك المطلوب وفى جميع الحالات مش هتطلع المعجنات بتاعتك بالنتيجة اللى تتمنيها، ده غير انك هتبقى بتهدرى كميات من الدقيق على الفاضى. 

الطريقة الافضل هى انك تستخدمى ميزان ديجيتال وتعايرى بيه الجرامات مظبوطة، والميزان الخاص بالمطبخ سعره فى المتناول وممن تشتريه وهتلاقيه متوافر بسهولة، او ممكن لو مش متاح انك تجيبى ميزان ، تعايرى كوباية محددة و تعرفى هى بتاخد كام جرام بالضبط وتستخدميها بعد كده، يعنى مثلا لو الكوباية دى بتاخد 100 جرام من الدقيق يبقى نص الكوباية 50 جرام، فلو الوصفة بتقول 200 جرام من الدقيق يبقى انتى محتاجة كوبايتين وهكذا. 

5

6- بتحتفظى بالزبدة فى التلاجة :

بشكل عام، تبريد وتجميد الاطعمة بيعتبر حاجة مهمة جدا لان درجات الحرارة القليلة بتقلل من سرعة نمو البكتيريا على الاكل  بالتالى بتحافظ عليه لمدة اطول، لكن الحقيقية درجة الحرارة بتعتبر واحدة من 6 عوامل مختلفة بتاثر على صلاحية الطعام و بتأدى الى نمو البكتيريا، زى الرطوبة و البروتين اللى بتتغذى عليه البكتيريا.

وبما انه الزبدة بتعتبر من الاطعمة او المكونات اللى فيها رطوبة عالية جدا و نسبة من البروتين، مش ضرورى اوى انك تحتفظى بيها فى التلاجة لانه فى بعض الاوقات ده ممكن يسرع من نمو البكتيريا عليها، ممكن تسيبي الزبدة فى درجة حرارة الغرفة لحوالى اسبوع من غير ما تفسد او يحصلها اى حاجة. المهم تغطيها كويس علشان تحميها من العفن اللى ممكن يتكون عليها بسبب الاكسجين والضوء.

 
6

7- بتنقعى اللحوم زيادة : 

آخر عادة معانا من عادات طبخ سيئة هى انه فى حاجة معروفة بتقول انه نقع اللحوم فى الخل او الاحماض عموما بيخليها طرية و juicy او tender اكتر لان الاحماض بتكسر الانسجة فبتخلى اللحمة تبقى طرية اكتر، والحقيقة انه ده مش صحيح. اللى بيحصل انه الاحماض دى بتخلى اللحوم لما تستوى تبقى ناشفة وجامدة. فواحدة  من اكبر الغلطات هى ان تنقعى اللحوم بتاعتك زيادة عن اللزوم، استغنى عن ده بأنك تنقعيها فى صوص خالى من الاحماض مع التوابل المفضلة ليكى وبس. 

7

اعرفى معانا كمان 21 حيلة هتسهل حياتك في المطبخ مكنتيش تعرفيهم قبل كده

مقالات متعلقه

10 عادات طبخ سيئة بنعملها ومش عارفين انها خطر على حياتنا.. اعرفيهم واتجنبيهم

10 عادات طبخ سيئة بنعملها ومش عارفين انها خطر على حياتنا.. اعرفيهم واتجنبيهم

بالخطوات .. وصفة الفراخ بالكاجو السهلة واللذيذة

بالخطوات .. وصفة الفراخ بالكاجو السهلة واللذيذة

طريقة عمل Mini Oreo Cheesecakes اللذيذة والسهلة

طريقة عمل Mini Oreo Cheesecakes اللذيذة والسهلة