طرق ازاي تتعرفي على الاشخاص مصاصين الطاقة..وازاي تتعاملي معاهم وتحمي نفسك منهم

بقلمريهام محمود فيعلاقات visibility1506

الاشخاص مصاصين الطاقة حوالينا منهم كتير وبيأثروا بشكل مباشر على نجاحنا وسعادتنا من غير ما نحس, والنوعية دي من الاشخاص بيبقى عندهم مستوى الطاقة الايجابية منخفض فبيبدأوا انهم يتغذوا من طاقة غيرهم ويحبطوا اللي حواليهم عشان هما يحسوا بالسعادة والرضا, هتلاقيهم دايما بيدخلوا في حياتك زيادة عن اللزوم, ومهتمين بكل تفاصيلها, ودايما بيخلقوا دراما حواليكي, والنهاردة من خلال موضوعنا هنقولك ازاي تتعرفي على الاشخاص مصاصين الطاقة, وازاي تتعاملي معاهم وتحمي نفسك منهم.

– ازاي تتعرفي على الاشخاص مصاصين الطاقة:

عشان تتعرفي على الاشخاص مصاصين الطاقة حواليكي لازم تسألي نفسك شوية اسئلة:

1- هل استنفذتي طاقتك بعد القعدة معاهم؟

لو قعدة مع مجموعة سواء اصحاب او معارف او ايا كان الاشخاص اللي انتي كنتي معاهم اسألي نفسك هل بعد ما سبتيهم حسيتي بتعب واجهاد وان اي نقاش معاهم بينتهي باستنفاذ طاقتك؟ وانك معندكيش طاقة لاي حاجة تانية بعدها, في الحالة دي يبقى الاشخاص دول مصاصين طاقة.

2- هل انتي مش قادرة تقولي جملة مفيدة في المحادثة؟

كلنا يمكن عندنا الصديق او الشخص اللي طول قعدته او الكلام معاه في التليفون انتي مش بتقولي جملة مفيدة على بعضها وهو اللي طول المحادثة بيتكلم عن مشاكله وبيشتكي بدل ما يتكلم في حلول, يعني الاشخاص اللي بيتكلموا اكتر ومش بيدوكي فرصة انك تتكلمي طول الوقت اعرفي انهم مصاصين طاقة.

3- هل بيحترموا وقتك؟

الاشخاص اللي ممكن يفضلوا يتكلموا حتى لو انتي قولتي لهم انهم مشغولة دلوقتي ومش قادرة تتكلمي ومع ذلك بيكملوا ومش بيحترموا وقتك, في الحالة دي انتي محتاجة تاخدي موقف حازم معاهم لان ده وقتك وحياتك المفروض تكوني متحكمة فيهم ومينفعش تستنفذي وقتك اللي انتي محتاجاه لنفسك مع شخص تاني.

4- بتحسي بايه؟

اثناء حديثك مع اشخاص معينين هل بتحسي جسمك مرتاح وريلاكس ولا بتحسي بتعب,او وهما بيتكلموا بتبقي عايزة تقطعي كلامهم وتغيري الموضوع, دي تعتبر علامات تبين لك انك قعدة مع مصاصين طاقة, لان الصديق او الشخص الصحي او الطبيعي هتسيبيه وانتي مبتسمة ومبسوطة وجسمك مرتاح وريلاكس.

في كمان اعراض تانية ممكن تحسي بيها لو قعدة مع مصاصين طاقة زي الشعور بغثيان مفاجيء, آلام في المعدة, آلام في الضهر والصدر والرقبة والكتفين, صداع, العرق الزيادة, الاحباط والغضب من غير سبب محدد, ضيق تنفس او ضيق في الصدر, قلق واجهاد من غير سبب واضح, الاحساس بعدم الراحة اتجاه شخص معين, لو بتحسي بحاجة او اتنين او اكتر من الاعراض دي اثناء او بعد القعدة مع اشخاص معينين دول اكيد يبقوا مصاصين طاقة.

5- هل وقعتي في فخ النميمة؟

الاشخاص اللي كل قعدتك معاهم نميمة وقيل وقال بس وكل كلامهم دي قالت ودي عملت دول يبقوا مصاصين طاقة وبيستنفذوا طاقتك, عشان كده حاولي تتجنبي قعدات النميمة وتقفلي الباب على الاشخاص اللي كل قعدتهم بتبقى بالشكل ده, لان في نهاية المطاف النميمة هتبقى بعد كده عليكي.

6- هل بتخبي عنهم الاخبار الايجابية عشان ميغيروش منك؟

الاصدقاء الحقيقين هيكونوا مبسوطين ليكي لما يسمعوا اي خبر حلو عنك, والاصدقاء مصاصين الطاقة هيبقوا غيرانين منك وهيقارنوا دايما حياتهم بحياتك بدل ما يفرحولك.

يعني عدم احترام وقتك, السلبية المستمرة, النميمة, الشكوى المستمرة بدل حل المشكلة, بياخدوا منك اكتر ما بيدوكي, دي كلها سلوكيات الاشخاص مصاصين الطاقة, اللي لازم تطهري حياتك منهم, ومع الوقت هتقدري تعرفي مين الشخص اللي لازم تتخلصي منه ومين الصديق الحقيقي اللي يستحق يفضل في حياتك.

ازاي تتعرفي على الاشخاص مصاصين الطاقة
ازاي تتعرفي على الاشخاص مصاصين الطاقة

– ازاي تتعاملي مع مصاصين الطاقة وتحمي نفسك منهم؟

1- اول حاجة لازم تحددي تعاملاتك معاهم وتقللي التواصل بينكم على قد ما تقدري, عشان تتجنبي الطاقة السلبية اللي بينقلوها ليكي في كل مرة تقعدي معاهم فيها.

2- متحاوليش تدخلي في مشاكلهم او تركزي تفكيرك كله ازاي تحلي لهم مشكلتهم او تغيري لهم حياتهم, لان مصاصين الطاقة في العادة بيحبوا يعملوا دراما زيادة في حياتهم, فمتفكريش انك ممكن تغيري حياتهم او تصلحيها لان حتى افضل المتخصصين او المعالجين مش هيقدروا يعملوا لهم تغيير, يعني باختصار هما مشاكلهم ابعد او اكبر من قدرتك انتي على اصلاحها, وافضل حاجة معاهم انك تحطي حدود ثابتة وواضحة, مثلا لو حد مصمم يدخلك في مشكلته بالعافية ابسط حاجة قوليله ” انا عارفة انك تقدر تعدي من المشكلة دي وتوصل للحل المناسب” عشان تبعدي نفسك من انه ممكن يستنفذ طاقتك, وهتبقي بالطريقة دي بعدتي نفسك باسلوب مافيهوش جرح للي قدامك وفي نفس الوقت بينتي له انك متعاطفة معاه.

3- خليكي في كل الاحوال لطيفة مع الاشخاص دي لان مصاصين الطاقة في الغالب بيكونوا مش عارفين ان هما كده, يعني زي ما قولنا في النقطة اللي فاتت حاولي تبعدي عن مشاكلهم بطريقة كويسة ولطيفة من غير ما تجرحي مشاعرهم باسلوب حاد او مش كويس.

4- في انواع كريستال واحجار كريمة معروفة انها بتحمي من الطاقة السلبية الكريستال زي التورمالين الاسود, السموكي كوارتز, التورمالين الاسود والسموكي كوارتز مع بعض, الاحجار الكريمة زي الامتيست الجمشت “الياقوت الجمري الشرقي”, العقيق الاحمر او الابيض او الازرق البسية كخاتم في الايد اليمين, المرجان ممكن تلبسيه كخاتم او اسورة في الايد اليمين, الايفنترين, الكارنالين المشمشي, كل الاحاجات دي ممكن تلبسيها كأكسسوار عشان تحمي نفسك من الطاقة السلبية وتخلصك منها وفي نفس الوقت بتجلب طاقة ايجابية للجسم.

5- حاولي على قد ما تقدري تختاري محيطك والناس اللي حواليكي بعناية جدا, عشان متقعيش مع الاشخاص السلبيين.

6- لو اتعاملتي مع اشخاص مصاصين طاقة اعتبريها خبرة حياتية ليكي وانك اتعلمتي حاجة من تعاملك معاهم, وانك هتقدري تعرفي بعد كده تتعاملي ازاي مع النوعية دي من الاشخاص.

7- خلي دايما مشاعرك قوية ومتصلة ومتصالحة مع نفسك.

8- خليكي دايما ايجابية على قد ما تقدري وحافظي على افكارك الايجابية وطاقة الحب جواكي, وحافظي على الهالة اللي حواليكي واضحة ونضيفة وقوية.

ازاي تتعرفي على الاشخاص مصاصين الطاقة
ازاي تتعرفي على الاشخاص مصاصين الطاقة

ازاي تتعاملي مع قرايبك اللي بتكرهيهم !

نصايح للتعامل مع قرايبك اللي بتكرهيهم
نصايح للتعامل مع قرايبك اللي بتكرهيهم